អង្គការសុខភាពពិភពលោកអំពាវនាវចិនឲ្យចែករំលែកជាប្រចាំនូវទិន្នន័យស្តីពីជំងឺកូវីដ
ក្នុងកាលៈទេសៈ ដែលជំងឺកូវីដកំពុងផ្ទុះខ្លាំងនៅប្រទេសចិន អង្គការសុខភាពពិភពលោកបានជួបប្រជុំជាមួយមន្រ្តីជាន់ខ្ពស់ចិនទទួលបន្ទុកជំងឺឆ្លង កាលពីថ្ងៃសុក្រ ទី ៣០ធ្នូ ដើម្បីទទួលព័ត៌មានគ្រប់គ្រាន់ស្តីពីស្ថានភាពជំងឺកូវីដផង និងដើម្បីផ្តល់ជំនួយគាំទ្ររបស់អង្គការសុខភាពផង។ កិច្ចប្រជុំដែលជាការទាមទារចង់បានរបស់អង្គការសុខភាពពិភពលោក ធ្វើឡើងនៅប៉ុន្មានថ្ងៃក្រោយ ប្រធានរបស់ស្ថាប័នអន្តរជាតិមួយនេះអំពាវនាវសុំឲ្យចិនមានតម្លាភាពស្តីពីស្ថានភាពជំងឺកូវីដ។
ចុះផ្សាយនៅថ្ងៃ៖
ស្តាប់ - ០២:០៣
កិច្ចប្រជុំរបស់អង្គការសុខភាពពិភពលោកជាមួយមន្រ្តីនៃគណៈកម្មការសុខភាពជាតិចិនកាលពីថ្ងៃសុក្រផ្តោតសំខាន់ទៅលើសន្ទុះកំណើនឆ្លងកូវីដនៅប្រទេសចិន។ តាមសេចក្តីប្រកាសព័ត៌មានរបស់អង្គការសុខភាពពិភពលោក នៅក្នុងអំឡុងកិច្ចប្រជុំជាមួយភាគីចិន អង្គការសុខភាពពិភពលោកបានអំពាវនាវសាជាថ្មីសុំឲ្យចិនចែករំលែកយ៉ាងទៀងទាត់ នូវតួលេខដ៏ជាក់លាក់ស្តីពីស្ថានភាពជំងឺឆ្លង ការព្យាបាលនៅមន្ទីរពេទ្យ ចំនួនអ្នកជំងឺធ្ងន់ធ្ងរនៅបន្ទប់សង្រ្គោះបន្ទាន់ និងចំនួនអ្នកស្លាប់ដោយសារជំងឺកូវីដ។
ឆ្លើយតបទៅនឹងការទាមទាររបស់អង្គការសុខភាពពិភពលោក មន្រ្តីតំណាងគណៈកម្មការសុខភាពជាតិចិន និងទីភ្នាក់ងារជាតិគ្រប់គ្រងនិងបង្កាជំងឺឆ្លងនៅប្រទេសចិនបានរៀបរាប់ពីយុទ្ធសាស្រ្តនិងសកម្មភាពសម្រាប់ជំងឺឆ្លងកូវីដ ដូចជាតាមដាន ការបំប្លែងខ្លួនរបស់មេរោគ ការចាក់វ៉ាក់សាំង ការព្យាបាល និងការស្រាវជ្រាវអភិវឌ្ឍ។
នៅក្នុងជំនួបជាមួយមន្រ្តីសុខភាពចិន ស្ថាប័នសុខភាពរបស់អង្គការសហប្រជាជាតិសង្កត់ធ្ងន់ពីសារៈសំខាន់នៃយុទ្ធការចាក់វ៉ាក់សាំង ជាពិសេសនៅក្នុងចំណោមមនុស្សងាយនឹងរងគ្រោះខ្លាំង និងមនុស្សចាស់ ដើម្បីជៀសវាងស្ថានភាពជំងឺធ្ងន់ធ្ងរ និងមរណភាពដោយសារកូវីដ។
នៅក្នុងសេចក្តីប្រកាសព័ត៌មាន អង្គការសុខភាពពិភពលោកអះអាងថា គេត្រូវការចង់បានព័ត៌មាន ទិន្នន័យជាក់លាស់ស្តីពីចំនួនអ្នកឆ្លង អ្នកស្លាប់ និងជាពិសេសអត្តសញ្ញាណរបស់មេរោគកូវីដែលកំពុងឆ្លងរាលដាលខ្លាំងនៅចិន ក៏ដើម្បីអាចជួយឲ្យប្រទេសដទៃទៀតត្រៀមខ្លួនដោះស្រាយបញ្ហាជំងឺកូវីដប្រកបដោយប្រសិទ្ធិភាព។
នៅមុនកិច្ចប្រជុំជាមួយភាគីចិន ប្រធានអង្គការសុខភាពពិភពលោក លោកតេដ្រូសផ្ទាល់ធ្លាប់បាននិយាយកាលពីថ្ងៃព្រហស្បតិ៍ថា កង្វះព័ត៌មានលម្អិតស្ថីពីស្ថានភាពជំងឺនៅប្រទេសចិន ធ្វើឲ្យគេយល់ពីប្រទេសមួយចំនួននៅក្នុងពិភពលោកដែលចាត់វិធានការត្រួតពិនិត្យយ៉ាងតឹងរ៉ឹងរាល់អ្នកដំណើរមកពីប្រទេសចិន តាមរយៈការធ្វើតេស្តរកមេរោគកូវីដ និងការធ្វើចត្តាឡីស័ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ