បោះឆ្នោត១១ជុំ គណបក្សសាធារណរដ្ឋនៅតែខ្វែងគំនិតគ្នា មិនទាន់រើសបានប្រធានរដ្ឋសភា
ចំណាយពេល ៣ថ្ងៃ បោះឆ្នោត ១១ជុំ គណបក្សសាធារណរដ្ឋនៅតែមិនទាន់ចុះសម្រុងគ្នាដើម្បីរើសប្រធានរដ្ឋសភាថ្មី។ ទទួលបានអាសនៈភាគច្រើននៅរដ្ឋសភា គណបក្សសាធារណរដ្ឋរបស់អតីតប្រធានាធិបតី លោកដូណាល់ ត្រាំ នឹងបន្តចរចាបោះឆ្នោត នៅថ្ងៃសុក្រនេះ រហូតដល់រើសបានប្រធានរដ្ឋសភាថ្មី។ រដ្ឋសភានីតិកាលទី១១៨ ត្រូវជាប់គាំងដោយសារគ្មានប្រធាន។ នេះជាព្រឹត្តិការណ៍ដ៏កម្រ ដែលអាមេរិកមិនធ្លាប់ជួបប្រទះ នៅក្នុងរយៈពេល១៦០ឆ្នាំមកនេះ។
ចុះផ្សាយនៅថ្ងៃ៖
ស្តាប់ - ០២:៣៦
ការបោះឆ្នោតពាក់កណ្តាលអាណត្តិបានបើកផ្លូវឲ្យគណបក្សសាធារណរដ្ឋមានសំឡេងភាគច្រើននៅរដ្ឋសភា ប៉ុន្តែ សមាជិករបស់បក្សស្តាំនិយមមួយនេះនៅតែមិនទាន់ចុះសម្រុងគ្នា ដើម្បីបោះឆ្នោតជ្រើសរើសអ្នកតំណាងរបស់ខ្លួនម្នាក់សម្រាប់កាន់តំណែងប្រធានរដ្ឋសភាថ្មី។
នៅក្នុងការបោះឆ្នោតជុំទី១១កាលពីព្រហស្បតិ៍ បេក្ខជននាំមុខគេរបស់គណបក្សសាធារណរដ្ឋ លោកKevin McCarthy នៅតែទទួលសំឡេងមិនគ្រប់គ្រាន់ដើម្បីចូលកាន់តំណែងប្រធានរដ្ឋសភា។ ទទួលបានសំឡេងគាំទ្រពីសមាជិកបក្សសាធារណរដ្ឋចំនួន២០១ អ្នកតំណាងរាស្រ្តមកពីរដ្ឋកាលីហ្វនីញ៉ា នៅខ្វះតែ១៧សំឡេងទៀតប៉ុណ្ណោះ ដើម្បីបានសំឡេង ២១៨។ ដើម្បីបញ្ចុះបញ្ចូលសមាជិកគណបក្សដែលរឹងទទឹងមិនបោះឆ្នោតគាំទ្រ លោកKevin McCarthy បានធ្វើសម្បទានជាច្រើន ដូចជាយល់ព្រមឲ្យមានច្បាប់ដើម្បីបណ្តេញប្រធានរដ្ឋសភាចេញពីតំណែង។ ប៉ុន្តែ សមាជិកបក្សសាធារណរដ្ឋដែលមាននិន្នាការអភិរក្សនិយមជ្រុល និងជាអ្នកគាំទ្រអតីតប្រធានាធិបតីលោកដូណាល់ ត្រាំ នៅតែមិនទុកចិត្ត និងសន្យាផ្លាស់ប្តូរប្រពៃណីបោះឆ្នោតនៅរដ្ឋសភា ។
គ្មានការគាំទ្រពីក្រុមលោកដូណាល់ ត្រាំ បេក្ខជននាំមុខរបស់បក្សសាធារណរដ្ឋ លោកKevin McCarthy នៅតែគ្មានទម្ងន់ឆ្នោតដើម្បីចូលកាន់តំណែងប្រធានរដ្ឋសភា។
ជាលទ្ធផល អាមេរិកនៅតែគ្មានប្រធានរដ្ឋសភា ដែលជាមនុស្សមានអំណាចសំខាន់ទី៣ នៅអាមេរិក បន្ទាប់ពីប្រធានាធិបតី និងអនុប្រធានាធិបតី។
គ្មានប្រធានរដ្ឋសភា សមាជិករបស់សភាអាមេរិកក៏មិនអាចស្បថចូលកាន់តំណែង ដែលជាហេតុធ្វើឲ្យសភាអ្នកតំណាងរាស្ត្រអាមេរិកត្រូវជាប់គាំង មិនអាចពិភាក្សា បោះឆ្នោតអនុម័តច្បាប់។
នៅក្នុងរយៈពេល ១៦០ឆ្នាំ នេះជាលើកទី១ នៅក្នុងប្រវត្តិសាស្រ្តអាមេរិក ដែលដំណើរការរដ្ឋសភាត្រូវជាប់គាំង ដោយសារការខ្វែងគំនិតគ្នាក្នុងការបោះឆ្នោតជ្រើសរើសប្រធានរដ្ឋសភាថ្មី។ កាលពី១៦៦ឆ្នាំមុន នៅឆ្នាំ ១៨៥៦ សមាជិកសភាបានបោះឆ្នោត១៣៣ដង ក្នុងរយៈពេល ២ខែ ទម្រាំឯកភាពគ្នាលើឈ្មោះបេក្ខជនដែលត្រូវធ្វើជាប្រធានរដ្ឋសភា។
នៅថ្ងៃពុធ ប្រធានាធិបតីអាមេរិក លោកចូ បៃដិនបានចាត់ទុកព្រឹត្តិការណ៍នៅរដ្ឋសភាថា ជារឿងគួរឲ្យរំខាន និងថា ពិភពលោកកំពុងតាមដានដោយយកចិត្តទុក ភាពរញ៉េរញ៉ៃនៅសភាអាមេរិក។ មិនចុះសម្រុងគ្នាដើម្បីរើសប្រធានរដ្ឋសភាថ្មី គណបក្សសាធារណរដ្ឋនៅតែអសមត្ថភាពដើម្បីបើកការស៊ើបអង្កេតប្រឆាំងរដ្ឋបាលលោកចូ បៃដិន ដូចការដៅទុករបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ