ការពារព្រៃឈើអាម៉ាហ្សូន ជួយកាត់បន្ថយការបំពុលបរិយាកាស និងជួយបង្ការការរីករាលជំងឺ
នៅក្នុងវិស័យបរិស្ថានអាកាសធាតុនិងប្រព័ន្ធជីវចម្រុះ គឺគេគ្រប់គ្នាសុទ្ធតែបានទទួលស្គាល់ពីសារៈប្រយោជន៍ព្រៃឈើនៅតំបន់អាម៉ាហ្សូន។ ក៏ប៉ុន្តែ ការការពារតំបន់ព្រៃឈើនៅប្រទេសប្រេស៊ីលនេះ គឺថែមទាំងបានជួយកាត់បន្ថយការបំពុលបរិយាកាស និងជួយបង្ការការរីករាលជំងឺ រាប់ពាន់ជំងឺក្នុង១ឆ្នាំៗ។ នេះបើតាមការសិក្សារបស់អ្នកជំនាញបរិស្ថានអាកាសធាតុ ដែលចេញផ្សាយនៅថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:១៧
ទស្សនាវដ្តីវិទ្យាសាស្ត្រ ស្តីពី ទំនាក់ទំនងផែនដីនិងបរិស្ថាន បានសរសេរបញ្ជាក់ថា ការថែរក្សាដែនដីរបស់ជនជាតិភាគតិច ជាដីព្រៃនៅក្នុងតំបន់អាម៉ាហ្សូន គឺអាចចូលរួមជួយបញ្ជ្រៀសការរីករាលជំងឺ ជាង១៥លានករណីជំងឺផ្លូវដង្ហើមនិងប្រភេទជំងឺសរសៃឈាមបេះដូង។ ហើយក្នុង១ឆ្នាំៗ គេអាចនឹងសន្សំសំចៃការចំណាយលុយកាក់ទៅលើការព្យាបាលជំងឺទាំងនោះ ដែលអាចរក្សាកញ្ចប់ថវិកា ២ ពាន់លានដុល្លារ។
ការអះអាងដូច្នេះ គឺបន្ទាប់ពីក្រុមអ្នកស្រាវជ្រាវអន្តរជាតិ១ក្រុម បានវិភាគទិន្នន័យ ក្នុងរយៈពេល១០ឆ្នាំ សិក្សាពីទំនាក់ទំនងរវាងការបំពុលខ្យល់ សុខភាព និងព្រៃឈើនៅតំបន់ត្រូនិក ដែលឋិតនៅក្រោមបរិបទបំផ្លិចបំផ្លាញយ៉ាងគំហុកនៅទូទាំងពិភពលោក។
ការសិក្សាបានគូសបង្ហាញយ៉ាងច្បាស់ចំពោះករណីភ្លើងឆេះព្រៃកើតចេញពីចេតនាមនុស្ស ដែលដុតដើម្បីយកដីធ្វើកសិកម្ម វាធ្វើឲ្យបាត់បង់ព្រៃឈើ ឈើដែលជួយស្រូបច្រោះយកជាតិពុល ហើយកាលណាបាត់បង់ព្រៃឈើ ជាតិពុលក្នុងផ្សែងនិងក្នុងបរិយាកាស បង្កឲ្យមានជំងឺផ្សេងៗ។
ការសិក្សានេះទូទាត់ថា បើគិតជាតួលេខតាមផ្នែកសេដ្ឋកិច្ច ការបាត់បង់ព្រៃ១ហិកតា គឺដូចជាខាតបង់ថវិកា ២ លានដុល្លារ។ ដូច្នេះ ដើម្បីទប់ស្កាត់ករណីភ្លើងឆេះព្រៃ លោក Paula Prist មកពីអង្គការ Eco Health Alliance នៅញ៉ូវយក និងជាអ្នកសរសេររបាយការណ៍សិក្សានេះម្នាក់ដែរ បានជូនយោបល់ថា «ត្រូវតែកាត់បន្ថយការបំផ្លាញព្រៃឈើជាចាំបាច់និងជាបន្ទាន់ ហើយត្រូវពង្រឹងច្បាប់ការពារបរិស្ថាន ព្រមទាំងបន្ថែមទម្ងន់ទោសចំពោះបទល្មើសព្រៃឈើ»។
សូមជម្រាបថា រដ្ឋាភិបាលប្រេស៊ីលថ្មី ក្រោមការដឹកនាំរបស់ប្រធានាធិបតី លូឡា ដា ស៊ីវា (Lula da Silva) បានសន្យាចូលរួមខ្នះខ្នែងរក្សាការពារព្រៃឈើនៅតំបន់អាម៉ាហ្សូន។ លោក លូឡា ក៏បានសន្យាដែរកាលពីខែមីនា ថានឹងធ្វើច្បាប់បទដ្ឋានគតិយុត្តិ អនុញ្ញាតប្រគល់ឯកសិទ្ធិឲ្យក្រុមជនជាតិភាគតិច ជាអ្នកថែរក្សានិងមើលការខុសត្រូវព្រៃឈើក្នុងតំបន់ដែលពួកគេរស់នៅ។ អ្នកបរិស្ថានសង្កេតឃើញថា សេចក្តីប្តេជ្ញាចិត្តបែបនេះ គ្មានទេ នៅក្រោមអាណត្តិដឹកនាំរបស់ប្រមុខរដ្ឋចាស់ លោក Jair Bolsonaro៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ