កាណាដាកោះហៅឯកអគ្គរដ្ឋទូតចិនឱ្យចូលបំភ្លឺ និងគ្រោងបណ្តេញអ្នកការទូតចិនចេញ
រដ្ឋាភិបាលកាណាដា បានកោះហៅឯកអគ្គរដ្ឋទូតចិន ឱ្យចូលមកបំភ្លឺ សំណុំរឿងប៉េកាំងសំឡុតបំភ័យសមាជិកសភាកាណាដាម្នាក់ ដែលបានរិះគន់របបកុម្មុយនិស្ត។ កាណាដាទំនងជានឹងអាចបណ្តេញអ្នកការទូតចិនចេញផង។ ចិនបានបញ្ចេញប្រតិកម្មប្រឆាំងតបនៅថ្ងៃសុក្រនេះ ដោយចាត់ទុកពាក្យចោទប្រកាន់របស់កាណាដា ថាការប្រឌិត និង មួលបង្កាច់។
ចុះផ្សាយនៅថ្ងៃ៖
ស្តាប់ - ០១:៥៤
រដ្ឋាភិបាលកាណាដាកំពុងពិចារណារកគ្រប់វិធី រាប់ទាំងការបណ្តេញអ្នកការទូតផង។ នេះបើតាមការអះអាងរបស់លោកស្រី Melanie Joly រដ្ឋមន្ត្រីក្រសួងការបរទេសទៅកាន់គណៈកម្មការសភា ដោយបញ្ជាក់ថាបានកោះហៅឯកអគ្គរដ្ឋទូតចិនឱ្យចូលមកបំភ្លឺហើយ។
ទំនាក់ទំនងកាណាដា-ចិន អាប់អួរដល់កំរិតនេះ ដោយហេតុតែមានសមាជិកសភាបក្សអភិរក្សនិយមកាណាដា លោក Michael Chong និងគ្រួសារដែលរស់នៅហុងកុង បានរងការសំឡុតបំភ័យ ក្រោយពីតំណាងសភាកាណាដារូបនេះបានរិះគន់របបក្រុងប៉េកាំង។ បើតាមរបាយការណ៍របស់ Globe and Mail ចេញផ្សាយកាលពីថ្ងៃចន្ទ ដោយផ្អែកលើឯកសារសម្ងាត់និងប្រភពភ្នាក់ងារសន្តិសុខសុំមិនបញ្ចេញឈ្មោះ ភ្នាក់ងារសម្ងាត់ចិន បានដៅគំរាមលោក Chong និងក្រុមគ្រួសារ ពីបទបានបោះឆ្នោតកាលពីខែកុម្ភៈឆ្នាំ២០២១ គាំទ្រការចោទប្រកាន់សកម្មភាពចិនលើជនជាតិភាគតិចអ៊ុយហ្គួរ ថាជាទង្វើប្រល័យពូជសាសន៍។ សម្រាប់ភ្នាក់ងារចារកិច្ចកាណាដា ចិនចង់យកករណីលោកChong ជាគំរូទៅសំឡុតបង្អាក់សកម្មភាពរបស់សមាជិកសភាកាណាដាផ្សេងទៀត ដែលមានជំហរប្រឆាំងនឹងចិន។
មន្ត្រីទូតម្នាក់នៅក្នុងស្ថានកុងស៊ុលចិនប្រចាំទីក្រុងតូរ៉ងតូ ទំនងជាមានពាក់ព័ន្ធដោយផ្ទាល់នឹងសំណុំរឿងនេះ។ ប៉ូលិសសហព័ន្ធ ថែមទាំងបានរកឃើញនិងកម្ចាត់ទីស្នាក់ការប៉ូលិស ខុសច្បាប់ចិនជាច្រើននៅកាណាដា ដែលចាំឃ្លាំមើលនិងគំរាមជនជាតិចិននៅបរទេស។
ប៉ុន្តែចិនគ្មានគំនិតចង់ជ្រៀតជ្រែកកិច្ចការផ្ទៃក្នុងកាណាដាសោះ ហើយគ្មានប្រយោជន៍អ្វីនឹងធ្វើបែបដែរ។ នេះជាប្រតិកម្មឆ្លើយតបរបស់អ្នកនាំពាក្យក្រសួងការបរទេសចិន ចំពោះពាក្យចោទប្រកាន់ជុំវិញការប្រើសម្ពាធប្រឆាំងលោកChong។ អ្នកនាំពាក្យចិនបានបិរហារថា កាណាដា បានប្រឌិតរឿង និងមួលបង្កាច់ ដំណើរការជាប្រក្រតីរបស់ស្ថានទូតនិងស្ថានកុងស៊ុលចិន។ ចិនខឹងខ្លាំងនិងសូមបដិសេធប្រឆាំងយ៉ាងដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ