អាមេរិក និងតៃវ៉ាន់ចុះកិច្ចព្រមព្រៀងពង្រឹងទំនាក់ទំនងពាណិជ្ជកម្មនៅក្រោមការបើកភ្នែកសម្លក់របស់ចិន
នៅសហរដ្ឋអាមេរិក អ្នកទទួលបន្ទុកកិច្ចការពាណិជ្ជកម្មរបស់សេតវិមានបានប្រកាសក្នុងថ្ងៃព្រហស្បតិ៍ ទី១ មិថុនាថា អាមេរិក និងតៃវ៉ាន់ចុះហត្ថលេខាលើកិច្ចព្រមព្រៀងដើម្បីពង្រឹង និងធ្វើឲ្យកាន់តែស៊ីជម្រៅនូវទំនាក់ទំនងសេដ្ឋកិច្ច និងពាណិជ្ជកម្មរវាងគ្នា។ កិច្ចព្រមព្រៀងដែលមានឈ្មោះ « គំនិតផ្តួចផ្តើមអាមេរិក តៃវ៉ាន់សម្រាប់ពាណិជ្ជកម្មសតវស្សរ៍ទី២១ » ត្រូវបានរដ្ឋាភិបាលតៃវ៉ាន់ចាត់ទុកជាប្រវត្តិសាស្រ្ត និងជាការចាប់ផ្តើមថ្មី។ តែចិនដីគោកបានសម្តែងការមិនសប្បាយចិត្ត និងបានព្រមានអាមេរិកជាថ្មី។
ចុះផ្សាយនៅថ្ងៃ៖
ស្តាប់ - ០២:១៦
កិច្ចព្រមព្រៀងដើម្បីពង្រឹងទំនាក់ទំនងនៅក្នុងវិស័យសេដ្ឋកិច្ច និងពាណិជ្ជកម្មរវាងអាមេរិក និងតៃវ៉ាន់ជាកិច្ចសហប្រតិបត្តិការរួមគ្នារវាងវិទ្យាសា្ថនអាមេរិកប្រចាំក្រុងតៃប៉ិក និងការិយាល័យតំណាងសេដ្ឋកិច្ច និងវប្បធម៌តៃវ៉ាន់ប្រចាំក្រុងវ៉ាស៊ីនតោន។ តែទំរាំទទួលបានកិច្ចព្រមព្រៀងទ្វេភាគីមួយនេះ ភាគីទាំងពីរបានផ្តើមចរចាតាំងពីខែមិថុនា ឆ្នាំ ២០២២ មកម្ល៉េះ។ តាមពិត អាមេរិក និងតៃវ៉ាន់បានចងសម្ព័ន្ធគ្នាតាំងពីឆ្នាំ ១៩៩៤ តាមរយៈក្របខ័ណ្ឌមួយសម្រាប់ពាណិជ្ជកម្ម និងការវិនិយោគ។ បន្ទាប់មក វត្តមានរបស់តៃវ៉ាន់នៅក្នុងអង្គការពាណិជ្ជកម្មពិភពលោកចាប់ពីឆ្នាំ ២០០២ បានរួមចំណែកដល់កំណើនពាណិជ្ជកម្មទ្វេភាគីអាមេរិក តៃវ៉ាន់។
តែសម្រាប់ក្រុងតៃប៉ិក កិច្ចព្រមព្រៀងដើម្បីពង្រឹងទំនាក់ទំនងសេដ្ឋកិច្ច និងពាណិជ្ជកម្មពេលនេះជាកិច្ចព្រមព្រៀងដ៏ពេញលេញ និងទូលំទូលាយបំផុតជាមួយអាមេរិកគិតតាំងពីឆ្នាំ ១៩៧៩។ តាមរយៈកិច្ចព្រមព្រៀងថ្មីមួយនេះ អាមេរិក និងតៃវ៉ាន់អាចបង្កើនការដោះដូរពាណិជ្ជកម្មរវាងគ្នារឹតតែខ្លាំងបន្ថែមទៀត។ តែចិនប៉េកាំងបានសម្តែងការមិនសប្បាយចិត្ត និងបានព្រមានអាមេរិកជាថ្មី។ អ្នកនាំពាក្យក្រសួងការបរទេសចិនលោកស្រីម៉ាវ នីងបានអះអាងថា អាមេរិកមិនត្រូវបញ្ជូនសញ្ញាខុសទៅកាន់កម្លាំងអ្នកឯករាជនិយមតៃវ៉ាន់ដោយយកពាក្យ « ពាណិជ្ជកម្ម »ដាក់ពីមុខទេ។
ក្នុងរយៈពេលប៉ុន្មានឆ្នាំចុងក្រោយនេះ ចិនបានសម្លឹងដោយភាពខឹងសម្បារចំពោះការរំកិលជិតគ្នារវាងអាមេរិក និងតៃវ៉ាន់ នោះបើទោះបីជាក្រុងវ៉ាស៊ីនតោន និងក្រុងតៃប៉ិកគ្មានទំនាក់ទំនងការទូតផ្លូវការរវាងគ្នាក៏ដោយ។ អាមេរិកជាដៃគូដ៏សំខាន់បំផុតរបស់តៃវ៉ាន់ និងជាអ្នកផ្គត់ផ្គង់អាវុធឲ្យតៃវ៉ាន់។ គួរបញ្ជាក់ថា ចិនតែងចាត់ទុកតៃវ៉ាន់ជាខេត្តមួយរបស់ខ្លួន។ ក្នុងរយៈពេលនៃការកាន់តំណែងប្រធានាធិបតីចិនរបស់លោកស៊ី ជីនពីងជាង ១០ឆ្នាំកន្លងទៅ ទំនាក់ទំនងរវាងចិន និងតៃវ៉ាន់ដែលបានធ្លាក់ទាបខ្លាំងបានស្គាល់ភាពយ៉ាប់យឺនថែមទៀតនាប៉ុន្មានឆ្នាំកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ