មហាសេដ្ឋី Musk ជួបលោកម៉ូឌី ដើម្បីជជែកអំពីការវិនិយោគនៅឥណ្ឌា
បន្ទាប់ពីបានធ្វើដំណើរទៅប្រទេសចិន និងជួបជាមួយប្រធានាធិបតីចិន ស៊ី ជិនពីង នៅក្រុងប៉េកាំង នៅថ្ងៃពុធទី ២១មិថុនានេះ អគ្គនាយកក្រុមហ៊ុនតេស្លា និងម្ចាស់ក្រុមហ៊ុនទ្វីតទ័រ លោក អេឡិន មឺស (Elon Musk) បានជួបជាមួយនាយករដ្ឋមន្ត្រីឥណ្ឌា ដែលកំពុងបំពេញទស្សនកិច្ចផ្លូវរដ្ឋនៅសហរដ្ឋអាមេរិកម្តង។ បើតាមលោកមហាសេដ្ឋី ជំនួបពិភាក្សា ផ្តោតទៅលើការវិនិយោគដ៏សំខាន់មួយ នៅក្នុងប្រទេសឥណ្ឌា។
ចុះផ្សាយនៅថ្ងៃ៖
ស្តាប់ - ០២:០៥
តាំងពីប៉ុន្មានឆ្នាំចុងក្រោយមកនេះ ឥណ្ឌាបានលាកម្រាលព្រំក្រហមស្វាគមន៍អ្នកវិនិយោគនិងក្រុមហ៊ុនធំៗនៅលើពិភពលោក មានជាអាទិ៍ក្រុមហ៊ុនបច្ចេកវិទ្យាយក្សGoogle និងApple។ ក្រុមហ៊ុនជាច្រើនក៏នាំគ្នា ជ្រើសរើសទៅតាំងទីដាក់វត្តមាននៅឥណ្ឌាដែរ តាំងពីផ្ទុះវិបត្តិកូវីដមក ព្រោះមើលឃើញទីផ្សារដ៏ធំរបស់ប្រទេសផង និងចង់កាត់បន្ថយភាពរំពឹងលើចិនផង។ នៅថ្ងៃនេះ ឥណ្ឌាស្រវាអោបមហាសេដ្ឋីម្ចាស់ក្រុមហ៊ុនតេស្លា និងទ្វីតទ័រ។
គ្រាន់តែទៅដល់ទីក្រុងញូវយ៉ក ក្នុងក្របខ័ណ្ឌនៃការបំពេញទស្សនកិច្ចផ្លូវរដ្ឋនៅសហរដ្ឋអាមេរិក លោកនាយករដ្ឋមន្ត្រីម៉ូឌី បានចូលរួមក្នុងកម្មវិធីជំនួបប្រជុំដ៏ធំ ជាមួយលោកអេឡិន មឺស ភ្លាម។ លោកនាយករដ្ឋមន្ត្រីឥណ្ឌា បានជំរុញឱ្យមានវិនិយោគដ៏សំខាន់មួយនៅឥណ្ឌា។ មហាសេដ្ឋី មឺស ដែលតាំងខ្លួនជាអ្នកចូលចិត្តលោកម៉ូឌី ក៏បានបង្ហាញឆន្ទៈចង់ទៅវិនិយោគនៅឥណ្ឌាដែរ ដោយគ្រាន់តែរង់ចាំរកឱកាសល្អតែប៉ុណ្ណោះ។
លោកមឺស សំឡឹងឃើញអនាគតដ៏ភ្លឺស្វាងរបស់ឥណ្ឌា ដែលប្រទេសគួរឱ្យទាក់ទាញដូចបណ្តាប្រទេសធំៗផ្សេងទៀតនៅលើពិភពលោក។ ប៉ុន្តែម្ចាស់ក្រុមហ៊ុនទ្វីតទ័រ ត្រូវប្រឈមនឹង សកម្មជនការពារសេរីភាពនៃការបញ្ចេញមតិ ដោយសុខចិត្តលុបតាមសំណើរដ្ឋាភិបាលឥណ្ឌា នូវរាល់ការបង្ហោះសាររិះគន់។
ក្រុមអ្នករិះគន់បានចោទរដ្ឋាភិបាលលោកម៉ូឌី ថានាំឥណ្ឌាឱ្យធ្លាក់ដើរថយក្រោយក្នុងផ្នែកប្រជាធិបតេយ្យ ដោយកំរិតសេរីភាពនៃការបញ្ចេញមតិ និងដោយមិនអាចគ្រប់គ្រងការវាយប្រហារលើអ្នកសារព័ត៌មាននិងជនជាតិភាគតិចឱ្យបានត្រឹមត្រូវ។ កាលពីសប្តាហ៍មុន លោក ជេក ដ័រសី Jack Dorsey ស្ថាបនិកនិងជាអតីតអគ្គនាយកក្រុមហ៊ុនTwitter បានប្រកាសថាបណ្តាញសង្គមបានរងសម្ពាធយ៉ាងខ្លាំងពីសំណាក់អាជ្ញាធរឥណ្ឌាកំពុងកាន់អំណាច។ រដ្ឋមន្ត្រីក្រសួងបច្ចេកវិទ្យាព័ត៌មាន បានឆ្លើយតបវិញដោយចោទទ្វីតទ័រថារំលោភច្បាប់មូលដ្ឋានដដែលញយដងណាស់។
បើតាមទ្វីតទ័រ ឆ្នាំទៅ ឥណ្ឌាជាប់ចំណាត់លេខបួនពិភពលោកបន្ទាប់ពីជប៉ុន រុស្ស៊ី និងតួកគី ខាងបានស្នើសុំដោយរដ្ឋាភិបាល ឱ្យលុបសារបង្ហោះលើបណ្តាញTwitter៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ