លោក ចូបៃដិន បញ្ចូល លោកស៊ីជិនពីង ក្នុងចង្កោមមេដឹកនាំផ្តាច់ការ
សញ្ញានៃភាពធូរស្បើយ លេចឡើងតែមួយភ្លែត ក៏រលុបទៅវិញបាត់។ គ្រាន់តែប្រមុខការទូតអាមេរិកបញ្ចប់ទស្សនកិច្ចនៅប៉េកាំង រួចត្រលប់ទៅដល់ផ្ទះមិនទាន់ស្រួលបួលផង ប្រធានាធិបតីអាមេរិក លោក ចូ បៃដិន បានចាត់បញ្ចូលប្រធានាធិបតីចិន លោក ស៊ី ជីនពីង ទៅក្នុងចំណោមមេដឹកនាំ ផ្តាច់ការ។ លោកបៃដិន ថ្លែងដូច្នេះ នាឱកាសជួបជាមួយក្រុមអ្នកផ្តល់អំណោយដល់បក្សប្រជាធិបតេយ្យ តែក៏មានអ្នកកាសែតចូលរួមជាច្រើននាក់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
សំដីរបស់លោក ចូ បៃដិន ជាការបង្កហេតុនយោបាយ។ នេះជាប្រតិកម្មរបស់អ្នកនាំពាក្យការបរទេសចិន លោកស្រី ម៉ៅ និង។ លោកស្រីបានប្រកាសទៅកាន់អ្នកសារព័ត៌មានទៀតថា គណបក្សប្រជាធិបតេយ្យអាមេរិក ប្រើភាសាបែបល្ងីល្ងើ គ្មានទំនួលខុសត្រូវ ខុសការពិត ផ្ទុយនឹងនយោបាយការទូត ហើយប៉ះពាល់យ៉ាងធ្ងន់ធ្ងរដល់ភាពថ្លៃថ្ងូរនៃនយោបាយចិនខ្លាំងណាស់។
នៅយប់មិញ ក្នុងកម្មវិធីជួបជុំសមាជិកគណបក្សប្រជាធិបតេយ្យ ដើម្បីប្រមូលមូលនិធិមកទ្រទ្រង់ការឃោសនាបោះឆ្នោតប្រធានាធិបតីអាណត្តិទីពីរ នាពេលខាងមុខ លោកចូបៃដិនធ្លោយប្រើពាក្យ ក្នុងន័យចាត់បញ្ចូល លោកប្រធានាធិបតីចិន ស៊ី ជីនពីង ក្នុងចង្កោមប្រមុខដឹកនាំផ្តាច់ការ។ ដើម្បីបញ្ចុះបញ្ចូលឱ្យអ្នកគាំទ្រផ្តល់ជំនួយធំ លោកបៃដិន បានត្រលប់ទៅពន្យល់អំពីហេតុការណ៍បាល់ឡុងចារកិច្ចចិនហោះចូលដែនអាកាសអាមេរិកថា នៅពេលលោកបញ្ជាឱ្យកម្ទេចបាល់ឡុងចិននោះ លោកស៊ីជិនពីងខឹងសម្បារខ្លាំង មកពីលោកមិនដឹងថាបាល់ឡុងផ្ទុកគ្រឿងចារកិច្ចនៅឯណា។ ពិតជាគួរឱ្យអៀនណាស់ ដែលមេដឹកនាំផ្តាច់ការមិនដឹងការដូច្នេះ។ នេះជាប្រសាសន៍របស់លោកចូ បៃដិន ដោយបន្ថែមទៀតថា នៅពេលបាល់ឡុងធ្លាក់ហើយ លោកស៊ីជិនពីងទើសទាល់ខ្លាំង ហើយប្រឹងបដិសេធទៀត។
ដោយលើកឡើងអំពីចំណុចខ្ទាស់ជាមួយចិនផ្សេងទៀត លោកប្រធានាធិបតីអាមេរិកបានអះអាងថា ស្ថានភាពបានឈានដល់ដំណាក់កាលមួយដែលលោកស៊ីជីនពីងចង់រៀបទំនាក់ទំនងថ្មីរវាងចិនអាមេរិក តែគេទំនងត្រូវការប្រើពេលយូរបន្តិចហើយ ទម្រាំអាចបន្ធូរភាពភាពតានតឹងរវាងមហាអំណាចទាំងពីរបាន។ តែគ្មានអ្វីគួរព្រួយបារម្ភទេ ព្រោះចិនកំពុងមានបញ្ហាសេដ្ឋកិច្ចខ្លាំងណាស់ ! នេះបើតាមលោកបៃដិនដដែល ដែលយល់ថា លោក អង់តូនី ប្លីងកិន ធ្វើការបានល្អ ពេលនៅចិន។ ទស្សនកិច្ចពីរថ្ងៃរបស់លោកប្រមុខការទូតអាមេរិកនៅប៉េកាំង បានតម្រែតម្រង់ទំនាក់ទំនងចិន-អាមេរិកឱ្យនឹងឡើងវិញបន្តិច ប៉ុន្តែប្រសាសន៍លោកបៃដិនយប់មិញ មិនមែនជាការជួយចូកជួយចែវទេ។
នេះមិនមែនជាលើកទីមួយទេ ដែលលោក ចូ បៃដិន ប្រើពាក្យមិនគួរ នៅពេលជួបជុំក្នុងក្រុមជំនិត ដោយគ្មានកាមេរ៉ា គ្មានមីក្រូ គ្មានម៉ាស៊ីនថត មានតែអ្នកកាសែតដែលអាចស្រង់សំដីរបស់លោកមកផ្សព្វផ្សាយបាននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ