គ្រោះថ្នាក់ទីតាន៖កាណាដាផ្តើមការស៊ើបអង្កេត ខណៈដែល OceanGate ជាប់សង្ស័យពីការធ្វេសប្រហែសផ្នែកសុវត្ថិភាព
២ថ្ងៃក្រោយការរកឃើញបំណែកនាវាមុជទឹកទេសចរណ៍ទីតាន និងការស្លាប់អ្នកដំណើរទាំង ៥នាក់មក ការរិះគន់កំពុងបន្តមានទាក់ទងនឹងការធ្វេសប្រហែសរបស់ក្រុមហ៊ុន OceanGate ដែលជាម្ចាស់។ ព័ត៌មានដែលកំពុងបន្តលេចឡើងបង្ហាញថា សហស្ថាបនិក OceanGate លោក Stockton Rush ដែលបានស្លាប់ដែរនោះមិនបានអើពើនឹងការព្រមានពីក្រុមការងាររបស់គាត់ និងអ្នកជំនាញទាក់ទងនឹងបញ្ហាសុវត្ថិភាពរបស់ទីតាន។ ដោយឡែកក្នុងថ្ងៃសៅរ៍ ទី២៤ មិថុនា កាណាដាបានផ្តើមបើកការស៊ើបអង្កេតលើគ្រោះថ្នាក់របស់ទីតាន។
ចុះផ្សាយនៅថ្ងៃ៖
ស្តាប់ - ០២:៣២
ការស៊ើបអង្កេតរបស់កាណាដាធ្វើឡើងដោយការិយាល័យសន្តិសុខដឹកជញ្ជូនហៅកាត់ជាភាសាបារាំង BST។ នៅកាណាដា BST ជាស្ថាប័នទទួលបន្ទុកស៊ើបអង្កេតលើគ្រោះថ្នាក់ផ្លូវអាកាស ផ្លូវដែក និងផ្លូវទឹក។ ចំណែកកម្មវត្ថុនៃការស៊ើបអង្កេតរបស់ BST មិនមែនសំដៅស្វែងវែកមុខអ្នកទទួលខុសត្រូវស៊ីវិល ឬព្រហ្មទណ្ឌជាយថាហេតុទេ តែក្នុងបំណងធ្វើឲ្យប្រសើរឡើងនូវសន្តិសុខផ្នែកដឹកជញ្ជូន។ តាមធម្មតា ការស៊ើបអង្កេតត្រូវប្រើពេលពី ១៨ខែទៅ ២៤ខែ។ តែប្រធានស្ថាប័ន BST លោកស្រី Kathy Fox បានប្រកាសក្នុងថ្ងៃសៅរ៍ ទី២៤ មិថុនាថា BST នឹងព្យាយាមពន្លឿនការស៊ើបអង្កេតក្នុងរឿងគ្រោះថ្នាក់នាវាមុជទឹកទីតាន ព្រោះគ្រប់គ្នា ពិសេសគ្រួសារជនរងគ្រោះកំពុងចង់ដឹងការពិត។ តាមលោកស្រី Kathy Fox ការស៊ើបអង្កេតរបស់ក្រុមការងារ BST ធ្វើការសិក្សានៅទីកន្លែងកើតហេតុ លើបំណែកនាវាទីតាន ជួបសួរសាក្សី និងប្រមូលគ្រប់ព័ត៌មានសំខាន់ៗ។
ទន្ទឹមនឹងការស៊ើបអង្កេតរបស់ស្ថាប័ន BST មានការស៊ើបអង្កេតមួយទៀតដែលធ្វើឡើងដោយកងរាជអាវុធហត្ថកាណាដាហៅកាត់ជាភាសាបារាំង GRC។ ការស៊ើបអង្កេតរបស់ GRC គឺពិនិត្យ សិក្សាលើហេតុផលដែលនាំឲ្យមានការស្លាប់អ្នកដំណើរទាំង ៥នាក់នៅក្នុងនាវាមុជទឹកទីតាន។ ដោយឡែក ខណៈដែលគេមិនទាន់ដឹងពីមូលហេតុពិតនៃគ្រោះថ្នាក់របស់ទីតាន មានលេចឡើងនូវព័ត៌មានដែលថា សហស្ថាបនិក OceanGate លោក Stockton Rush ដែលបានបាត់បង់ជីវិតនៅក្នុងគ្រោះថ្នាក់មិនបានអើពើនឹងការព្រមានពីក្រុមការងាររបស់គាត់ និងអ្នកជំនាញទាក់ទងនឹងបញ្ហាសន្តិសុខរបស់ទីតាន។ គួររម្លឹកថា ទីតានជានាវាមុជទឹកទេសចរណ៍ដែលនាំអ្នកចង់ចុះទៅមើលបំណែកនាវាទីតានិកនៅក្នុងមហាសមុទ្រអាត្លង់ទិកខាងជើងក្នុងជម្រៅ ៤ ០០០ម៉ែត្រ។
ក្រោយពីបានបាត់ខ្លួននារសៀលថ្ងៃអាទិត្យ ទី១៨ មិថុនា ឧត្តមនាវីទោអាមេរិកលោកចន ម៉ូហ្គឺរដែលជាអ្នកដឹកនាំប្រតិបត្តិការស្វែងរកទីតានបានប្រកាសក្នុងថ្ងៃព្រហស្បតិ៍ ទី២២ មិថុនាពីការរកឃើញបំណែកទីតានដែលស្ថិតចម្ងាយប្រមាណ ៥០០ម៉ែត្រពីបំណែកនាវាទីតានិក។ តាមលោកម៉ូហ្គឺរ ទីតានទំនងជាបែកដោយរងសម្ពាធទឹក និងថា អ្នកដំណើរទាំង៥នាក់បានស្លាប់ទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ