ប្រធានាធិបតី ចូ បៃដិន បញ្ចេញជំហរជំទាស់ជាខ្លាំងនឹងការសម្រេចរបស់តុលាការកំពូលអាមេរិក
ពីថ្ងៃព្រហស្បតិ៍ ប្រធានាធិបតីអាមេរិក ចូ បៃដិន បានរិះគន់សេចក្តីសម្រេចរបស់តុលាការកំពូលអាមេរិក ដែលតម្រូវឲ្យគ្រឹះស្ថានឧត្តមសិក្សាបញ្ឈប់ការយកកត្តាជាតិសាសន៍ជាលក្ខខណ្ឌជ្រើសរើសនិស្សិត។ គោលការណ៍នេះ ធ្លាប់តែជានយោបាយបានផ្តល់ជាប្រយោជន៍ដល់ជនជាតិអាមេរិកមិនមែនស្បែកស និងបានអនុវត្តក្នុងក្របខណ្ឌសិទ្ធិពលរដ្ឋតាំងពីអំលុងឆ្នាំ១៩៦០ ។ កាលណោះ បណ្តាសកលវិទ្យាល័យអាមេរិកជាច្រើន បានផ្តើមជ្រើសរើសនិស្សិតឲ្យចូលរៀន និងផ្តល់ចំនួនកូតានិស្សិត ដោយគិតគូរពីប្រភពកត្តាសង្គមគ្រួសាររបស់និស្សិត គិតពីក្រុមជាតិពន្ធុ ដែលធ្វើដូច្នេះគឺដើម្បីរួមចំណែកកាត់បន្ថយវិសមភាពសង្គមនៃអ្នករៀនសូត្របានខ្ពស់ សុទ្ធតែស្បែកស។ តាមរយៈគោលការណ៍នេះ គឺបានជំរុញឲ្យនិស្សិតអាមេរិក ស្បែកខ្មៅ ដើមកំណើតអាហ្វ្រិក អាមេរិកឡាទីន និងឥណ្ឌា បានទទួលការបណ្តុះបណ្តាលវិទ្យាជាន់ខ្ពស់ យ៉ាងច្រើនសន្ធឹក។
ចុះផ្សាយនៅថ្ងៃ៖
ស្តាប់ - ០១:៣០
នាថ្ងៃព្រហស្បតិ៍ ទី២៩មិថុនា តុលាការកំពូលអាមេរិក បានចេញសេចក្តីសម្រេចលុបចោលគោលណ៍នេះ ដោយមានចៅក្រម៦ក្នុងចំណោម៩នាក់ យល់ស្រប។ សាលដីកាថ្មីនេះ ត្រូវពលរដ្ឋអាមេរិកខ្លះ ចាត់ទុកថា«ប្រាសចាកពីរដ្ឋធម្មនុញ្ញ» និងបំផុសឲ្យមានបាតុកម្មខឹងតវ៉ា នៅមុខសាលាជម្រះក្តីកំពូលទៀតផង។ ទន្ទឹមនឹងគ្នានេះ ប្រធានាធិបតីអាមេរិក ចូ បៃដិន ក៏បញ្ចេញមតិជំទាស់នឹងសេចក្តីសម្រេចរបស់តុលាការកំពូលនេះដែរ។
«ខ្ញុំយល់ថា សកលវិទ្យាល័យសហរដ្ឋអាមេរិក កាន់តែខ្លាំងពូកែ ប្រសិនបើមានភាពចម្រុះគ្នា។ ប្រជាជាតិយើងខ្លាំងក្លាទៅបាន ដោយសារតែយើងអាចបញ្ចេញទេពកោសល្លសមត្ថភាពពេញលេញបម្រើជាតិនេះ។
ខ្ញុំជឿជាក់ដែរថា ទោះបីជា មានការបញ្ចេញទេពកោសល មានគំនិតច្នៃប្រឌិត និងប្រឹងប្រែងធ្វើការងារក្តី ប៉ុន្តែ យើងនៅមិនទាន់មាន សមភាពនិងឱកាសស្មើភាពគ្នា ទេ។ ក្នុងប្រទេសនេះ សមភាព មិនទាន់មាននៅគ្រប់ទីកន្លែងទាំងអស់ទេ ។
ដូច្នេះ យើងមិនត្រូវបណ្តោយឲ្យតុលាការសម្រេចបិទផ្លូវបែបនេះឡើយ។ ហើយបើទោះជា តុលាការសម្រេចបែបនេះទៅហើយក្តី ក៏វាមិនអាចកែប្រែអ្វីដែលកំពុងតែមាននៅអាមេរិកដែរ។ អាមេរិក ជាទីឋានពោរពេញដោយគំនិត ជាបណ្តុំគំនិតពិសេសប្លែកដាច់គេ។ គំនិតនៃក្តីសង្ឃឹម នៃឱកាស និងលទ្ធភាពយ៉ាងសម្បូរបែប ដែលអាចផ្តល់ឱកាសសម្រាប់មនុស្សគ្រប់គ្នា និងមិនទុកនរណាម្នាក់ឲ្យឯកា ឬទុកចោលកណ្តាលទី ឡើយ។ ទោះបីយើងមិនទាន់សម្រេចដល់គោលដៅឥតខ្ចោះដូចយើងប្រាថ្នាចង់បានក្តី ប៉ុន្តែ យើងមិនដែលបោះបង់ប្រទេសយើងឲ្យឆ្ងាយពី«ក្តីសុបិន»នោះទេ។ «ក្តីសុបិន»តាំងពីបង្កើតប្រទេសយើងមក។
ប្រទេសយើង បើកឱកាសសម្រាប់មនុស្សគ្រប់គ្នា ហើយ ឱកាសគឺមិនមែនសម្រាប់តែមនុស្សមួយក្តាប់តូចទេ។»
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ