អាមេរិក ព្រមាន ចិន ពីបញ្ហាចារកម្មតាមប្រព័ន្ធអ៊ិនធ័នែត និងបញ្ហាគ្រឿងញៀន
ថ្ងៃព្រហស្បតិ៍ ថ្នាក់ដឹកនាំការទូតអាមេរិក និង ចិន បានស្កាត់ជួបគ្នា ក្នុងឱកាសកិច្ចប្រជុំរដ្ឋមន្ត្រីការបរទេសអាស៊ាន នៅប្រទេសឥណ្ឌូណេស៊ី។ ប្រភពពីមន្ត្រីសហរដ្ឋអាមេរិក គឺ ប្រមុខការទូត លោក អង់តូនី ប្ល៊ីងកិន បានព្រមានភាគីចិន អំពីការលបលួចធ្វើចារកម្មតាមប្រព័ន្ធបច្ចេកវិជ្ជាអ៊ិនធ័រនែត ហើយនិងបញ្ហាគ្រឿងញៀនចិន ដែលកំពុងបង្កបញ្ហាខ្លាំងនៅអាមេរិក។ ទោះយ៉ាងនេះក្តី រដ្ឋមន្ត្រីការបរទេសអាមេរិក នៅតែធានាអះអាងថា ច្រកផ្លូវសម្រាប់កិច្ចសន្ទនាគ្នាជាមួយចិន នៅបើកជានិច្ច មិនថាវិស័យយោធាក៏ដោយក្តី។
ចុះផ្សាយនៅថ្ងៃ៖
ស្តាប់ - ០២:២១
គ្រាន់តែក្នុងចន្លោះពេលប្រមាណ ១ ខែ រដ្ឋមន្ត្រីការបរទេសសហរដ្ឋអាមេរិក លោក អង់តូនី ប្ល៊ីងកិន បានជួប មន្ត្រីជាន់ខ្ពស់ចិន លោក វាំង យី ដល់ទៅ២លើក។ លើកមុននៅរដ្ឋធានីប៉េកាំង ហើយលើកនេះ នៅទីក្រុងហ្សាការតា។ ប្រភពពីមន្ត្រីអាមេរិក ដែលទម្លាយព័ត៌មានប្រាប់ទីភ្នាក់ព័ត៌មានបារាំងAFP ក្នុងក្របខណ្ឌសុំលាក់ឈ្មោះ បានឲ្យដឹងថា លោក អង់តូនី ប្ល៊ីងកិន បានព្រមានដាស់តឿនភាគីចិន អំពីបញ្ហាចារកម្ម លបលួចព័ត៌មាន តាមប្រព័ន្ធអ៊ិនធ័នែត ដែល ក្រសួងរដ្ឋអាមេរិក ជឿជាក់ថា រដ្ឋអំណាចចិនប៉េកាំង បានជាប់ពាក់ព័ន្ធនឹងអំពើចារកិច្ចតាមអ៊ិនធ័រនែត នៅលើទឹកដីអាមេរិក។ អំពើនេះ បានប៉ះពាល់ទៅលើរដ្ឋបាលអាមេរិក ក្រុមហ៊ុនឯកជន និងពលរដ្ឋអាមេរិកជាទូទៅ។ គ្រាន់តែក្នុងសប្តាហ៍នេះ មានស្ថាប័នសំខាន់ៗ ២៥ ត្រូវរងគ្រោះពីទង្វើចារកម្ម។ បញ្ហានេះ ក៏ត្រូវ ក្រុមហ៊ុនបច្ចេកវិទ្យា Microsoft បានបញ្ជាក់ដែរ។
ប្រភពពីមន្ត្រីអាមេរិក ដែលស្និទ្ធនឹងការទូត ក៏បង្ហើបដែរ ថា ក្តីព្រួយបារម្ភរបស់ប្រមុខការទូតអាមេរិក ក៏មានដែរជុំវិញបញ្ហាគ្រឿងញៀងគីមីសំយោគ ប្រភេទ Fentanyl គឺជាថ្នាំគ្រឿង របស់ចិន និងដែលកំពុងរីករាលខ្លាំងសម្បើមណាស់នៅសហរដ្ឋអាមេរិក។Fentanyl មានកម្រិតខ្លាំងជាងហេអូអ៊ីនទៅទៀត ហើយពីពេលថ្មីៗនេះ វាបានសម្លាប់យុវជនអាមេរិកអស់ជាច្រើននាក់ គួរឲ្យព្រួយបារម្ភ។ ហេតុនេះហើយ ទើប លោក អង់តូនី ប្ល៊ីងកិន បានលើកឡើងបញ្ហានេះនៅក្នុងជំនួប ជាមួយ លោក វាំង យី។
លោក វាំង យី បច្ចប្បន្នជា ថ្នាក់ដឹកនាំជាន់ខ្ពស់ នៃការិយាល័យនយោបាយមជ្ឈិមបក្សកុម្មុយនិស្ត ទទួលបន្ទុកកិច្ចការបរទេស ដែលជាឋានៈខ្ពស់ជាង រដ្ឋមន្ត្រីការបរទេស ជី កង។ លោក ជី កង មានបញ្ហាសុខភាព មិនបានចូលរួមកិច្ចប្រជុំអាស៊ានទេ។ នេះបើតាមអ្នកនាំពាក្យក្រសួងការបរទេសចិន។
នៅក្នុងជួបទ្វេភាគីលើកនេះ លោក វាំង យី បានស្នើឲ្យអាមេរិក លើកលែងទណ្ឌកម្ម ចំពោះរដ្ឋមន្ត្រីការពារជាតិរបស់ខ្លួន គឺលោក លី សាំងហ្វូ។ រដ្ឋមន្ត្រីការពារជាតិចិនរូបនេះ ត្រូវទណ្ឌកម្មអាមេរិក ព្រោះតែសំណុំរឿងទិញអាវុធគ្រឿងចម្បាំងពីប្រទេសរុស្ស៊ី។
ជាចម្លើយតប ទោះបីជាព្រមានខ្លះមែនក្តី តែ រដ្ឋមន្ត្រីការបរទេសអាមេរិក ក៏បានប្រើសម្តីការទូតសម្រួលមកវិញដែរថា ច្រកផ្លូវសម្រាប់កិច្ចសន្ទនាគ្នាជាមួយចិន នៅបើកចំហជានិច្ច មិនថាវិស័យ យោធា នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ