សហរដ្ឋអាមេរិកយល់ព្រមផ្ទេរលុយអ៊ីរ៉ង់ដែលបង្កកនៅកូរ៉េខាងត្បូងចំនួន ៦ពាន់លានដុល្លារទៅឲ្យអ៊ីរ៉ង់
សហរដ្ឋអាមេរិកបានបញ្ជាក់ក្នុងថ្ងៃចន្ទ ទី១១ កញ្ញាពីការអនុញ្ញាតឲ្យមានការបញ្ជូនលុយរបស់អ៊ីរ៉ង់ដែលបង្កកទុកនៅកូរ៉េខាងត្បូងទៅឲ្យអ៊ីរ៉ង់ចំនួន ៦ពាន់លានដុល្លារ។ ភ្លើងខៀវរបស់រដ្ឋបាលអាមេរិកនេះបានធ្វើឡើងនៅក្នុងក្របខ័ណ្ឌនៃកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ស្តីពីការដោះដូរអ្នកទោស។ តាមរយៈកិច្ចព្រមព្រៀងមួយនេះ អ៊ីរ៉ង់យល់ព្រមដោះលែងអ្នកទោសជនជាតិអាមេរិកចំនួន ៥នាក់ជាថ្នូរនឹងការដោះលែងអ្នកទោសអ៊ីរ៉ង់ចំនួន ៥នាក់ពីសហរដ្ឋអាមេរិកវិញ។
ចុះផ្សាយនៅថ្ងៃ៖
ស្តាប់ - ០២:១៦
អ្នកនាំពាក្យក្រសួងការបរទេសអាមេរិកបានបញ្ជាក់ក្នុងថ្ងៃចន្ទ ទី១១ កញ្ញាថា ព័ត៌មានស្តីពីការផ្ទេរលុយអ៊ីរ៉ង់ដែលបង្កកនៅកូរ៉េខាងត្បូងទៅឲ្យអ៊ីរ៉ង់ចំនួន ៦ពាន់លានដុល្លារត្រូវបានប្រមុខការទូតលោកអង់តូនី ប៊្លីនកិនប្រាប់សភានាសប្តាហ៍កន្លងទៅ។ គួរបញ្ជាក់ថា ការស្រុះស្រួលរឿងលុយកាក់នេះត្រូវបានក្រុងវ៉ាស៊ីនតោន និងក្រុងតេហេរ៉ង់ប្រកាសកាលពីថ្ងៃទី១០ សីហានៅក្នុងក្របខ័ណ្ឌនៃកិច្ចព្រមព្រៀងស្តីពីការដោះដូរអ្នកទោសដែលមានប្រទេសកាតាធ្វើជាអាជ្ញាកណ្តាល។ ជាថ្នូរនឹងរឿងលុយកាក់នេះ អ៊ីរ៉ង់នឹងដោះលែងអ្នកទោសអាមេរិកចំនួន ៥នាក់ដែលកំពុងជាប់ឃុំក្នុងទឹកដីអ៊ីរ៉ង់ ហើយអាមេរិកក៏នឹងដោះលែងអ្នកទោសអ៊ីរ៉ង់ចំនួន ៥នាក់ដែលកំពុងជាប់ឃុំក្នុងទឹកដីអាមេរិកដែរ។
អ្នកនាំពាក្យក្រសួងការបរទេសអ៊ីរ៉ង់លោក Nasser Kanani បានថ្លែងដោយសង្ឃឹមថា អ៊ីរ៉ង់នឹងទទួលបានលុយនាថ្ងៃខាងមុខ និងអាចប្រើប្រាស់លុយទាំង ៦ពាន់លានដុល្លារដោយពេញលេញដើម្បីទិញផលិតផលគ្រប់មុខ ពោលមិនមែនសម្រាប់ទិញតែថ្នាំពេទ្យ ឬចំណីអាហារប៉ុណ្ណោះទេ។ តែក្រុងវ៉ាស៊ីនតោនមិនភ្លេចលំអិតថា ទឹកលុយទាំង ៦ពាន់លានដុល្លារនឹងត្រូវផ្ទេរទៅដាក់ក្នុងគណនីដែលកាន់កាប់ដោយប្រទេសកាតា ពោលមិនមែនប្រគល់ទៅឲ្យរដ្ឋាភិបាលអ៊ីរ៉ង់ដោយផ្ទាល់ទេ។ ចំណែកអ្នកនាំពាក្យក្រសួងការបរទេសអាមេរិកបានបន្ថែមថា រដ្ឋបាលអាមេរិកមានសិទ្ធិតាមដានលើការចាយលុយទាំងនោះ។
តាមអ្នកនាំពាក្យក្រសួងការបរទេសអាមេរិករូបនេះដដែល កាយវិការរបស់អាមេរិកនេះមិនមែនជាការលើកទណ្ឌកម្មណាមួយចេញពីអ៊ីរ៉ង់ ហើយអ៊ីរ៉ង់ក៏មិនបានទទួលការសម្រាលទណ្ឌកម្មណាមួយដែរ។ តែក្រុមអ្នកជំនាញយល់ថា កិច្ចព្រមព្រៀងស្តីពីការដោះដូរអ្នកទោសរវាងអាមេរិក និងអ៊ីរ៉ង់ពេលនេះជាសក្ខីកម្មបង្ហាញពីភាពធូរស្រាលរវាងប្រទេសទាំងពីរដែលគ្មានទំនាក់ទំនងការទូតរវាងគ្នាតាំងពីឆ្នាំ ១៩៧៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ