នុយក្លេអ៊ែរ៖ប្រមុខសាសនាអ៊ីស្លាមអ៊ីរ៉ង់អំពាវនាវឲ្យរដ្ឋាភិបាលបន្តកិច្ចសហប្រតិបត្តិការជាមួយ AIEA
នៅក្នុងប្រទេសអ៊ីរ៉ង់ ប្រមុខសាសនាដ៏មានឥទ្ធិពលលោកអាលី ខាមេណីបានអំពាវនាវក្នុងថ្ងៃអាទិត្យ ទី១១ មិថុនាឲ្យរដ្ឋាភិបាលបន្តកិច្ចសហប្រតិបត្តិការជាមួយទីភ្នាក់ថាមពលបរមាណូអន្តរជាតិហៅកាត់ជាភាសាបារាំង AIEA។ គួរបញ្ជាក់ថាក្នុងរយៈពេលប៉ុន្មានខែចុងក្រោយនេះ រដ្ឋាភិបាលអ៊ីរ៉ង់បានផ្តើមទាក់ទងជាមួយ AIEA ឡើងវិញ បន្ទាប់ពីបានកម្រិតកិច្ចសហប្រតិបត្តិការ និងបានដកកាំមេរ៉ាឃ្លាំមើលនៅតាមមជ្ឈមណ្ឌលនុយក្លេអ៊ែររបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៣១
ការអំពាវនាវរបស់ប្រមុខសាសនាអ៊ីស្លាមអ៊ីរ៉ង់លោកអាលី ខាមេណីបានធ្វើឡើងនៅក្នុងកិច្ចប្រជុំមួយជាមួយក្រុមអ្នកទទួលខុសត្រូវនុយក្លេអ៊ែរអ៊ីរ៉ង់។ « ខ្ញុំសូមណែនាំអស់លោកឲ្យរក្សាទំនាក់ទំនងជាមួយទីភ្នាក់ងារថាមពលបរមាណូអន្តរជាតិ AIEA និងត្រូវរក្សាកិច្ចសហប្រតិបត្តិការជាមួយ AIEA » នេះជាការថ្លែងរបស់លោកអាលី ខាមេណី។ ការថ្លែងរបស់ប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលរូបនេះបានធ្វើឡើង ក្រោយពីរដ្ឋាភិបាលអ៊ីរ៉ង់បានផ្តើមកិច្ចសហប្រតិបត្តិការជាមួយ AIEA ឡើងវិញនាប៉ុន្មានខែចុងក្រោយនេះ។ កាលពីដំណាច់ខែឧសភា AIEA បានប្រាប់ឲ្យដឹងពីវឌ្ឍនភាពនៃកិច្ចសហប្រតិបត្តិការជាមួយអ៊ីរ៉ង់។
តែទន្ទឹមគ្នានេះ ស្ថាប័នរបស់អង្គការសហប្រជាជាតិមួយនេះក៏បានព្រមានថា ក្នុងរយៈពេលប៉ុន្មានកន្លងទៅនេះ សាធារណរដ្ឋអ៊ីស្លាមអ៊ីរ៉ង់បានបង្កើនការស្តុកសារធាតុអ៊ុយរ៉ាញ៉ូមចម្រើនរួច។ លើសពីនេះ AIEA បានសម្រេចបិទសំណុំរឿងទាក់ទងនឹងវត្តមានសារធាតុនុយក្លេអ៊ែរនៅក្នុងមជ្ឈមណ្ឌលមួយក្នុងចំណោមចំនួនបីដែលមិនបានរាយការណ៍។ រឿងរ៉ាវមួយនេះធ្លាប់បានធ្វើឲ្យអ៊ីរ៉ង់ និង AIEA ប្រឈមមុខដាក់គ្នាអស់រយៈពេលយ៉ាងយូរ។ យ៉ាងណាក៏ដោយ ប្រមុខសាសនាអ៊ីស្លាមអ៊ីរ៉ង់លោកអាលី ខាមេណីបានជំរុញឲ្យក្រុមអ្នកទទួលខុសត្រូវកម្មវិធីនុយក្លេអ៊ែរអ៊ីរ៉ង់កុំចុះចាញ់នឹងសម្ពាធនៃការទាមទារដែលគ្មានមូលដ្ឋាន។
នៅក្នុងន័យនេះ លោកអាលី ខាមេណីមិនជំទាស់នឹងការមានកិច្ចព្រមព្រៀងជាមួយ AIEA នៅក្នុងផ្នែកខ្លះទេ តែមិនត្រូវប៉ះពាល់លើហេដ្ឋារចនាសម្ព័ន្ធនៃឧស្សាហកម្មនុយក្លេអ៊ែរអ៊ីរ៉ង់ដែលមានស្រាប់ឡើយ។ ការថ្លែងរបស់លោកអាលី ខាមេនីបានធ្វើឡើងក្រោយពីមានសារព័ត៌មានរាយការណ៍ស្តីពីការទាក់ទងផ្ទាល់រវាងអ៊ីរ៉ង់ និងអាមេរិកដើម្បីផ្តល់សន្ទុះឲ្យមានកិច្ចចរចាឡើងវិញលើកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ និងដែលអាមេរិកក្នុងជំនាន់ប្រធានាធិបតីលោកដូណាល់ ត្រាំបានដកច្លួនចេញវិញក្នុងឆ្នាំ ២០១៨។ តាមពិត អាមេរិកបារម្ភខ្លាចអ៊ីរ៉ង់ផលិតអាវុធនុយក្លេអ៊ែរ។
តែសម្រាប់លោកអាលី ខាមេណី អ៊ីរ៉ង់មិនចង់ឈានទៅមានអាវុធនុយក្លេអ៊ែរទេដោយផ្អែកលើគោលការណ៍អ៊ីស្លាម។ តែបើអ៊ីរ៉ង់ចង់មាន គ្មាននរណាម្នាក់អាចរារាំងអ៊ីរ៉ង់បានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ