ហេតុអ្វីអ៊ីរ៉ង់មិនចង់ឃើញអ៊ីស្រាអែល និងអារ៉ាប៊ីសាអូឌីតមានទំនាក់ទំនងការទូតរវាងគ្នា?
នៅថ្ងៃពុធ ទី២០ កញ្ញា ប្រទេសអ៊ីស្រាអែល និងប្រទេសអារ៉ាប៊ីសាអូឌីតបានបង្ហាញពីការរំកិលរកគ្នាដើម្បីឈានទៅមានទំនាក់ទំនងប្រក្រតី។ រូបភាពនេះត្រូវបានសម្តែងឡើងដោយនាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូ និងរាជទាយាទអារ៉ាប៊ីសាអូឌីតបេន សាលម៉ាននៅក្រៅក្របខណ្ឌនៃមហាសន្និបាតអង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក។ តែអ៊ីរ៉ង់ដែលជាសត្រូវប្រវត្តិសាស្រ្តរបស់អ៊ីស្រាអែល និងអារ៉ាប៊ីសាអូឌីតបានព្រមានថា ទំនាក់ទំនងធម្មតារវាងប្រទេសទាំងពីរជាទង្វើក្បត់នឹងបុព្វហេតុប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:៤៦
នាឱកាសវត្តមានចូលរួមនៅក្នុងមហាសន្និបាតអង្គការសហប្រជាជាតិក្នុងក្រុងញូយ៉ក នាយករដ្ឋមន្រ្តីអ៊ីស្រាអែលលោកនេតានយ៉ាហ៊ូត្រូវបានប្រធានាធិបតីអាមេរិកលោកបៃដិនទទួលជួបនៅក្នុងសណ្ធាគារមួយ។ ក្នុងពេលជាមួយគ្នា រាជទាយាទអារ៉ាប៊ីសាអូឌីតបេន សាលម៉ានដែលមានវត្តមាននៅក្នុងមហាសន្និបាតអង្គការសហប្រជាជាតិដែរនោះបានផ្តល់បទសម្ភាសន៍ឲ្យទូរទស្សន៍អាមេរិក Fox News។ នៅក្នុងបទសម្ភាសន៍ ព្រះអង្គម្ចាស់បេន សាលម៉ានបានធានាពីការរំកិលរកគ្នាជារៀងរាល់ថ្ងៃដើម្បីឆ្ពោះទៅមានទំនាក់ទំនងធម្មតារវាងអារ៉ាប៊ីសាអូឌីត និងអ៊ីស្រាអែល។
ទាក់ទងនឹងសំណុំរឿងប៉ាឡេស្ទីនត្រូវបានព្រះអង្គម្ចាស់បេន សាលម៉ានគូសបញ្ជាក់ថា កិច្ចចរចាកំពុងបន្តមានមកដល់សព្វថ្ងៃដោយសង្ឃឹមទទួលបានលទ្ធផលមួយដែលនឹងជួយសម្រួលដល់ជីវិតរស់នៅប្រចាំថ្ងៃរបស់ប្រជាជនប៉ាឡេស្ទីន និងដែលអនុញ្ញាតឲ្យអ៊ីស្រាអែលដើរតួនាទីនៅក្នុងតំបន់មជ្ឈិមបូព៌ា។ ចំណែកនៅក្នុងកិច្ចសន្ទនារវាងប្រធានាធិបតីអាមេរិកលោកបៃដិន និងនាយករដ្ឋមន្រ្តីអ៊ីស្រាអែលលោកនេតានយ៉ាហ៊ូ លោកបៃដិនក៏បាននិយាយជាមួយលោកនេតាន់យ៉ាហ៊ូពីការរំកិលរកគ្នារវាងអារ៉ាប៊ីសាអូឌីត និងអ៊ីស្រាអែលនេះដែរ។
លោកនេតាន់យ៉ាហ៊ូសង្ឃឹមថានៅក្រោមរដ្ឋបាលអាមេរិកដឹកនាំដោយលោកបៃដិន អ៊ីស្រាអែល និងអារ៉ាប៊ីសាអូឌីតអាចមានកិច្ចព្រមព្រៀងសន្តិភាពមួយជាប្រវត្តិសាស្រ្ត។ ក៏ប៉ុន្តែ ការរំកិលរកគ្នារវាងអ៊ីស្រាអែល និងអារ៉ាប៊ីសាអូឌីតដោយមានការជួយជ្រោមជ្រែងរបស់អាមេរិកពេលនេះមិនមែនជាការចង់បានរបស់ប្រទេសអ៊ីរ៉ង់ឯណា។ នៅក្នុងសន្និសីទកាសែតមួយរៀបចំក្នុងសណ្ធាគារមួយក្រុងញូយ៉កនាយប់ថ្ងៃពុធ ទី២០ កញ្ញា ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីបានព្រមានប្រឆាំងអាមេរិក អ៊ីស្រាអែល និងអារ៉ាប៊ីសាអូឌីត។
លោកអេប្រាហ៊ីម រ៉ៃស៊ីយល់ថា ទំនាក់ទំនងរវាងបណ្តាប្រទេសក្នុងតំបន់ជាមួយអ៊ីស្រាអែលជាការចាក់មួយកាំបិតចំកណ្តាលខ្នងប្រជាជនប៉ាឡេស្ទីន និងអ្នកតស៊ូប៉ាឡេស្ទីន។ តែអ្វីដែលលោកអេប្រាហ៊ីម រ៉ៃស៊ីភ្លេចបញ្ជាក់នោះគឺថា អ៊ីរ៉ង់ និងអារ៉ាប៊ីសាអីឌីតដែលជាមហាអំណាចប្រជែងគ្នាក្នុងតំបន់បានភ្ជាប់ទំនាក់ទំនងការទូតរវាងគ្នាគួរឲ្យភ្ញាក់ផ្អើលនានិទាឃរដូវកន្លងមក។ គេអាចយល់ពីក្តីបារម្ភរបស់អ៊ីរ៉ង់ចំពោះការរំកិលរកគ្នារវាងអ៊ីស្រាអែល និងអារ៉ាប៊ីសាអូឌីត ព្រោះអ៊ីរ៉ង់ និងអ៊ីស្រាអែលជាសត្រូវស៊ូពូជនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ