ប្រមុខការពារជាតិអាមេរិកចេញដំណើរទៅនិយាយធានាអ៊ីស្រាអែល និងអារ៉ាប៊ី សាអូឌីត
រដ្ឋមន្រ្តីការពារជាតិអាមេរិក លោកអាស្តុន ការធ័រ ធ្វើដំណើរទស្សនកិច្ច នៅតំបន់ដើមបូព៌ាដើម្បី រំងាប់ចិត្ត អ៊ីស្រាអែល និងអារ៉ាប៊ី សាអូឌីត ដែលបារម្ភពីផលវិបាកក្រោយកិច្ចព្រមព្រៀងនុយក្លេអ៊ែរអ៊ីរ៉ង់។ ក្រុមប្រឹក្សាសន្តិសុខអង្គការសហប្រជាជាតិ ត្រូវបោះឆ្នោត នៅថ្ងៃចន្ទ ទី ២០កក្កដា អនុម័តលើសេចក្តីសម្រេច ដែលនឹងបើកផ្លូវឲ្យដកទណ្ឌកម្មសេដ្ឋកិច្ច ដែលគេបានដាក់ទៅលើអ៊ីរ៉ង់ តាំងពីឆ្នាំ ២០០៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៤៨
ក្រុមប្រឹក្សាសន្តិសុខ នៅថ្ងៃចន្ទ ទី ២០កក្កដាបានបោះឆ្នោត ជាឯកច្ឆន្ទ អនុម័ត សេចក្តីសម្រេចដែលនឹងបើកផ្លូវឲ្យមានការដកទណ្ឌកម្ម ដែលអង្គការសហប្រជាជាតិបានដាក់ទៅលើអ៊ីរ៉ង់។ ចាប់តាំងពីឆ្នាំ ២០០៦ ក្រុមប្រឹក្សាសន្តិសុខ បានបោះឆ្នោតសេចក្តីសម្រេចទាំង៧ ដើម្បីដាក់ទណ្ឌកម្មសេដ្ឋកិច្ចលើអ៊ីរ៉ង់។ សហភាពអឺរ៉ុប កាលពីថ្ងៃចន្ទ ក៏បានបោះឆ្នោតគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់។ ជាដំណាក់ដំបូងឈានទៅរកការដកទណ្ឌកម្មសេដ្ឋកិច្ចដែលសហភាពអឺរ៉ុបចូលរួមជាមួយអាមេរិក ដាក់ទណ្ឌកម្មលើអ៊ីរ៉ង់។
តាមកិច្ចព្រមព្រៀង គេនឹងដកទណ្ឌកម្មសេដ្ឋកិច្ច បន្តិចម្តងៗ គឺអាស្រ័យទៅលើការប្រព្រឹត្តការអនុវត្តតាមការសន្យារបស់អ៊ីរ៉ង់ជាមុន សិន។ ជាក់ស្តែង អ៊ីរ៉ង់ នឹងទទួលបានលុយរបស់ខ្លួនខ្លះ ក្នុងចំណោមលុយ ១៥០ពាន់លានដុល្លាររបស់អ៊ីរ៉ង់ ដែលត្រូវគេផ្អឹបទុក នៅបរទេស បើសិន ទីភ្នាក់ងារAIEAដែលជាសមត្ថកិច្ចចូលទៅត្រួតពិនិត្យកម្មវិធីនុយក្លេអ៊ែរអ៊ីរ៉ង់ បញ្ជាក់ថា អ៊ីរ៉ង់ ស្អាតស្អំ គ្មានកម្មវិធីនុយក្លេអ៊ែរយោធា។
ម្យ៉ាងទៀត បើសិនអ៊ីរ៉ង់ មិនគោរពធ្វើតាមសន្យា នោះ ប្រទេសមហាអំណាចនឹងអាចត្រលប់មកដាក់ទណ្ឌកម្មវិញភ្លាម ដោយប្រើយន្តការ Snapback។ ប្រទេសលោកខាងលិច ដែលមិនសូវជឿទុកចិត្តលើរុស្ស៊ីដែលជាសម្ព័ន្ធមិត្តរបស់អ៊ីរ៉ង់ ជាអ្នកស្នើឲ្យគេបង្កើតយន្តការSnapbackនេះឡើង។ តាមយន្តការនេះ បើប្រទេសណាមួយរកឃើញថា អ៊ីរ៉ង់ រំលោភកិច្ចព្រមព្រៀង គេដាក់ស្នើភ្លាម សេចក្តីសម្រេចចិត្ត ទៅក្រុមប្រឹក្សាសន្តិសុខ។ សមាជិករបស់ក្រុមប្រឹក្សា សន្តិសុខត្រូវបោះឆ្នោតអនុម័តសេចក្តីសម្រេច ដែលថា តើគេត្រូវបន្ត ផ្អាកទណ្ឌកម្មសេដ្ឋកិច្ចទៅលើអ៊ីរ៉ង់ដែរឬទេ។ បើសមាជិកម្នាក់របស់ក្រុមប្រឹក្សាសន្តិសុខ វេតូ ប្រឆាំងនឹងសេចក្តីសម្រេចរបស់ក្រុមប្រឹក្សា នោះ ការត្រលប់មកដាក់ទណ្ឌកម្មសេដ្ឋកិច្ចលើអ៊ីរ៉ង់ នឹងធ្វើឡើងដោយស្វ័យប្រវត្តិ។
រដ្ឋមន្រ្តីការពារជាតិអាមេរិកទៅអ៊ីស្រាអែល និងអារ៉ាប៊ី សាអូឌីត
នៅក្នុងយន្តហោះ ឆ្ពោះទៅកាន់ទឹកដីអ៊ីស្រាអែល លោកអាស្តុន កាធ័រ រដ្ឋមន្រ្តីការពារជាតិអាមេរិក បានប្រើប្រព័ន្ធផ្សព្វផ្សាយ ដើម្បីផ្ញើសារ ទៅធានាទឹកចិត្តសម្ព័ន្ធមិត្តអ៊ីស្រាអែល។ តាមលោកអាស្តុន កាធ័រ កិច្ចព្រមព្រៀង នុយក្លេអ៊ែរជាមួយ អ៊ីរ៉ង់ មិនបានចែងពីការហាមអាមេរិក មិនឲ្យប្រើកម្លាំងយោធា វាយប្រហារទៅលើអ៊ីរ៉ង់ ដែលល្មើសលួចផលិតអាវុធនុយក្លេអ៊ែរនោះទេ។
អារ៉ាប៊ី សាអូឌីតបានរិះគន់កិច្ចព្រមព្រៀង ដែលប្រទេសមហាអំណាចបានរកឃើញជាមួយអ៊ីរ៉ង់ ក្នុងពេលអ៊ីស្រាអែលវិញ ចាត់ទុក កិច្ចព្រមព្រៀង កាលពីសប្តាហ៍មុនថា ជាកំហុសប្រវត្តិសាស្រ្ត។
លោកអាស្តុន កាធ័រ រដ្ឋមន្រ្តីការពារជាតិអាមេរិក ចង់ប្រាប់ទៅអ៊ីស្រាអែល និងអារ៉ាប៊ី សាអូឌីត ថា ជំនួយ និងសហប្រតិបត្តិការរវាងអាមេរិក ជាមួយសម្ព័ន្ធមិត្ត នៅតំបន់ដើមបូព៌ា នៅតែដដែល គ្មានប្រែប្រួល ទោះ ជាប្រទេសមហាអំណាច ដឹកនាំដោយអាមេរិក បានរកឃើញកិច្ចព្រមព្រៀង នុយក្លេអ៊ែរអ៊ីរ៉ង់។ រដ្ឋមន្រ្តីការបរទេសអាមេរិកបានបញ្ជាក់ថា អាមេរិក នឹងពង្រឹងវត្តមានរបស់ខ្លួន ឲ្យកាន់តែរឹងមាំជាងមុន នៅតំបន់ដើមបូព៌ា ដើម្បី សម្រាប់ប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាមផង និងសម្រាប់អន្តរាគមន៍ ជួយការពារ សម្ព័ន្ធមិត្តរបស់អាមេរិក នៅពេលណាដែលមានការវាយប្រហារពីអ៊ីរ៉ង់។ អាមេរិកចង់បង្កើនការសហការយោធាជាមួយអ៊ីស្រាអែល ជាពិសេស ផ្នែកប្រឆាំងមីស៊ីល និងប្រឆាំងភេរវនិយម។ ជាមួយអារ៉ាប៊ី សាអូឌីត និងប្រទេសនៅសមុទ្រពែរ្ស៍វិញ អាមេរិក បានសន្យាពង្រឹងសហប្រតិបត្តិការប្រយុទ្ធប្រឆាំងនឹងក្រុមភេរវជន ជួយបង្កើតកងកម្លាំងយោធាពិសេស ឲ្យអារ៉ាប៊ី សាអូឌីត ក៏ដូចជាផ្នែកមីស៊ីលសម្រាប់ការពារ ទប់ទល់នឹងការវាយប្រហារពីខាងក្រៅ។
តាមមន្រ្តីយោធាជាន់ខ្ពស់ម្នាក់ ដែលសុំមិនបញ្ចេញឈ្មោះ យុទ្ធសាស្រ្ត ក៏ដូចជាជំនួយយោធារបស់អាមេរិកសម្រាប់សម្ព័ន្ធមិត្ត នឹងគ្មានអ្វី ផ្លាស់ប្តូ មិនថា នៅមុន និងក្រោយពេលមានកិច្ចព្រមព្រៀងនុយក្លេអ៊ែរអ៊ីរ៉ង់។ កាសែត ក្នុងស្រុកអ៊ីស្រាអែលបានចុះផ្សាយថា រដ្ឋាភិបាលអ៊ីស្រាអែលទាមទារឲ្យអាមេរិកបង់ជម្ងឺចិត្ត ឲ្យអ៊ីស្រាអែល ដោយត្រូវបង្កើនថវិកាជំនួយយោធាឲ្យច្រើនជាងជំនួយបច្ចុប្បន្ន ដែលមានប្រមាណ ៣ពាន់លានដុល្លារ ក្នុងមួយឆ្នាំៗ។ នាយករដ្ឋមន្រ្តីអ៊ីស្រាអែលវិញបានរុញច្រានចោល ការចុះផ្សាយរបស់កាសែតអ៊ីស្រាអែល ដោយថា គ្មានទេ ការទាមទារសងជម្ងឺចិត្តពីអាមេរិក ព្រោះថា ធ្វើដូច្នេះ គឺមានន័យថា អ៊ីស្រាអែល បានយល់ព្រមទទួលយក ឲ្យមានកិច្ចព្រមព្រៀងនុយក្លេអ៊ែរ អ៊ីរ៉ង់។ អ៊ីស្រាអែល ប្រឆាំងដាច់ខាត និងសន្យាធ្វើយុទ្ធនាការឃោសនា បញ្ចុះបញ្ចូលឲ្យសមាជិកសភាអាមេរិកបោះឆ្នោតប្រឆាំង នឹងកិច្ចព្រមព្រៀងនុយក្លេអ៊ែរអ៊ីរ៉ង់។
លោកចន ឃេរី៖ អ្វីដែលគ្រោះថ្នាក់ គំរាមកំហែងសន្តិសុខដើមបូព៌ា គឺការដែលមិនអាចរកកិច្ចព្រមព្រៀងនុយក្លេអ៊ែរជាមួយអ៊ីរ៉ង់
កាលពីថ្ងៃអាទិត្យ ក្រសួងការបរទេសអាមេរិកបានដាក់ឯកសារស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ទៅសភា តំណាងរាស្រ្តអាមេរិកពិភាក្សា។ សភាអាមេរិកមានពេល ៦០ថ្ងៃ ដើម្បីបោះឆ្នោត អនុម័ត គាំទ្រ ឬប្រឆាំងលើកិច្ចព្រមព្រៀង។ សមាជិករបស់គណបក្សសាធារណរដ្ឋដែលគ្រប់គ្រងសំលេងភាគច្រើន នៅរដ្ឋសភា មានមតិប្រឆាំងនឹងកិច្ចព្រមព្រៀង ដែលនឹងបើកផ្លូវឲ្យអាមេរិកដកទណ្ឌកម្មពីអ៊ីរ៉ង់។ លោកប្រធានាធិបតីបារ៉ាក់ អូបាម៉ាបានព្រមានរួចហើយថា លោកនឹងប្រើសិទ្ធិវេតូរបស់ប្រធានាធិបតីដើម្បីការពារកិច្ចព្រមព្រៀងនុយក្លេអ៊ែរអ៊ីរ៉ង់។ នៅក្នុងបទសម្ភាសន៍មួយនៅទូរទស្សន៍ក្នុងស្រុកអាមេរិក លោកចេន ឃេរីវិញបានថ្លែងថា បើសិនសភាមិនបោះឆ្នោតគាំទ្រ ឬសម្លាប់កិច្ចព្រមព្រៀងនុយក្លេអ៊ែរអ៊ីរ៉ង់ នោះ គេនឹងអាចត្រួតពិនិត្យ ដឹងពីសកម្មភាពនុយក្លេអ៊ែររបស់អ៊ីរ៉ង់បានទេ។ អាមេរិកជឿថា ជាមួយនឹងកិច្ចព្រមព្រៀងជាមួយអ៊ីរ៉ង់ សហគមន៍អន្តរជាតិនឹងអាចតាមដាន មើលជាប់ជានិច្ចសកម្មភាពនុយក្លេអ៊ែររបស់អ៊ីរ៉ង់ គឺ ខុសពីលើកមុនៗ ដែលអ៊ីរ៉ង់បានលាក់ មិនឲ្យគេចូលមើល។ សម្រាប់លោកប្រធានាធិបតីអាមេរិក ការដាក់ទណ្ឌកម្ម សេដ្ឋកិច្ចមិនបានទប់ស្កាត់អ៊ីរ៉ង់ កុំឲ្យលួចធ្វើកម្មវិធីនុយក្លេអ៊ែរយោធាបានទេ។ អ៊ីរ៉ង់ បច្ចុប្បន្ននេះ ផលិតបានបំពង់ចម្រើនធាតុអ៊ុយរ៉ានីញ៉ូម រាប់ម៉ឺនបំពង់ និងមានសមត្ថភាពចម្រើនដល់កម្រិតខ្ពស់ សម្រាប់ផលិតចេញជាគ្រាប់បែកនុយក្លេអ៊ែរ។
សម្រាប់អ៊ីស្រាអែល កិច្ចព្រមព្រៀងនឹងមិនជួយទប់ស្កាត់ឲ្យអ៊ីរ៉ង់ឈប់ផលិតអាវុធនុយក្លេអ៊ែរ ទៅថ្ងៃអនាគត។ អ៊ីស្រាអែលភ័យខ្លាចថា អ៊ីរ៉ង់ អាចផលិតអាវុធនុយក្លេអ៊ែរ ដែលជាគ្រោះថ្នាក់សម្រាប់សន្តិសុខអ៊ីស្រាអែល។ អ៊ីរ៉ង់គឺជាសត្រូវមានរូបរាងពិតៗរបស់អ៊ីស្រាអែល ព្រោះថា អ៊ីរ៉ង់នៅធ្លាប់បានព្រមានលុបអ៊ីស្រាអែលចេញពីផែនទីពិភពលោកទៀតផង។
ម្យ៉ាងទៀត អ៊ីស្រាអែល និងអារ៉ាប៊ី សាអូឌីត បារម្ភថា បើអ៊ីរ៉ង់រួចខ្លួន ពីទណ្ឌកម្មសេដ្ឋកិច្ច របស់សហគមន៍អន្តរជាតិ នោះអ៊ីរ៉ង់នឹងទទួលបាន មកវិញ លុយជាង ១៥០ពាន់លានដុល្លារ របស់អ៊ីរ៉ង់ ដែលអន្តរជាតិ បង្កក ផ្អឹប ទុកនៅបរទេស ដោយសារទណ្ឌកម្មសេដ្ឋកិច្ច។ ទាំងអ៊ីស្រាអែល និងអារ៉ាប៊ី សាអូឌីត ដែលជាសត្រូវ និងគូប្រជែង យល់ថា អ៊ីរ៉ង់ នឹងប្រើលុយនោះ ទៅទិញអាវុធ ជួយក្រុមយោធាឲ្យទៅប្រយុទ្ធបង្កអសន្តិសុខនៅយេម៉ែន ស៊ីរី អ៊ីរ៉ាក់ ជាដើម។ តាំងពីមុនកិច្ចព្រមព្រៀង នុយក្លេអ៊ែរ អ៊ីរ៉ង់ អ៊ីស្រាអែលបានប្រកាសសុំសិទ្ធិវាយប្រហារទៅលើទីតាំងនុយក្លេអ៊ែរអ៊ីរ៉ង់ ដើម្បី រារាំងកុំឲ្យប្រទេសនេះអាចផលិតគ្រាប់បែកបរិមាណូបាន។
មួយវិញទៀត ការដែលអ៊ីរ៉ង់ មានសិទ្ធិមានកម្មវិធីនុយក្លេអ៊ែរ បើទោះបីជាស៊ីវិលក្តី ធ្វើឲ្យគេបារម្ភថា នឹងមានការប្រណាំងប្រជែង កម្មវិធីនុយក្លេអ៊ែរនៅតំបន់ដើមបូព៌ា។ អ៊ីស្រាអែលមានអាវុធនុយក្លេអ៊ែររួចហើយ ចំណែកអារ៉ាប៊ី សាអូឌីត យល់ថា រដ្ឋអ៊ីស្លាមអ៊ីរ៉ង់ និកាយ ស្ហ៊ីអ៊ីត អាចមានកម្មវិធីនុយក្លេអ៊ែរ ដូច្នេះ អារ៉ាប៊ី សាអូឌីត និកាយស៊ុននីត ក៏ត្រូវមានកម្មវិធីនុយក្លេអ៊ែរដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ