ម៉ិកស៊ិកបើកជំនួបកំពូលស្តីពីអន្តោប្រវេសន៍ទាក់ភ្នែកសហរដ្ឋអាមេរិក
ប្រមុខដឹកនាំប្រទេសនៅតំបន់អាមេរិកឡាទីនមួយចំនួនធំបានជួបជុំគ្នាបើកជំនួបកំពូលតូចមួយ នៅថ្ងៃអាទិត្យទី ២២តុលានេះ ស្តីពីវិបត្តិអន្តោប្រវេសន៍។ អន្តោប្រវេសន៍ខុសច្បាប់រត់សម្រុកទៅអាមេរិក កាត់តាមប្រទេសម៉ិកស៊ិក ជាវិបត្តិដ៏ធំចម្បងមួយសម្រាប់វ៉ាស៊ីនតោន។ បើតាមអង្គការអន្តប្រវេសន៍ពិភពលោក ផ្លូវអន្តោប្រវេសន៍ម៉ិកស៊ិកជាច្រកមរណៈជាងគេនៅលើពិភពលោក។
ចុះផ្សាយនៅថ្ងៃ៖
ស្តាប់ - ០២:៤០
ប្រមុខរដ្ឋ-រដ្ឋាភិបាលនៃបណ្តាប្រទេសក្នុងតំបន់អាមេរិកឡាទីនមានជាអាទិ៍វេណេស៊ុយអេឡា គុយបា ហៃទី កូឡុំប៊ី អេក្វាទ័រ ក្វាតាម៉ាឡា ហុងឌូរ៉ាស ... បានមកជួបប្រជុំគ្នានៅក្រុងប៉ាឡង់គេ រដ្ឋភាគខាងត្បូងប្រទេសម៉ិកស៊ិក ដែលជាច្រកផ្លូវរបស់ជនអន្តោប្រវេសន៍អាមេរិកឡាទីនឆ្ពោះទៅសហរដ្ឋអាមេរិក។ នេះបើតាមការបញ្ជាក់របស់លោកប្រធានាធិបតីម៉ិកស៊ិក Andres Manuel Lopez Obrador ដែលចង់ស្វែងរកការព្រមព្រៀងជាមួយដៃគូដឹកនាំប្រទេសក្នុងតំបន់ សម្រាប់ស្វែងរកកិច្ចសហប្រតិបត្តិការដោះស្រាយវិបត្តិអន្តោប្រវេសន៍ជាមួយរដ្ឋាភិបាលអាមេរិក។
ថ្វីបើគេមិនរំពឹងថានឹងមានលទ្ធផលជាក់ស្តែងអ្វីប្រសូតចេញពីជំនួបកំពូលនេះមែន តែជាកិច្ចចាប់ផ្តើមពិភាក្សារវាងក្រុមប្រទេសដែលមានពលរដ្ឋច្រើនប្រថុយជីវិតធ្វើអន្តោប្រវេសន៍ និងជាការឆ្លុះឱ្យឃើញថាអន្តោប្រវេសន៍ជាវិបត្តិតំបន់។ ម្យ៉ាងវិញទៀត ទោះបីជាសហរដ្ឋអាមេរិកកំពុងវក់វីខ្លាំងនឹងសង្គ្រាមនៅអ៊ីស្រាអែល និងនៅអ៊ុយក្រែនក៏ដោយ ក៏ជំនួបកំពូលនេះបានទាក់ចំណាប់អារម្មណ៍អាមេរិកយ៉ាងខ្លាំង។ ត្រលប់មកបំពេញទស្សនកិច្ចនៅអ៊ីស្រាអែលភ្លាម លោកចូ បៃដិន បានស្នើសុំឱ្យសភាខុនហ្កេសអាមេរិកទម្លាយកញ្ចប់ថវិកា១០៥,៨៥ពាន់លានដុល្លារសម្រាប់ជួយអ៊ីស្រាអែលនិងអ៊ុយក្រែន ព្រមទាំងសម្រាប់ប្រឈមនឹងវិបត្តិអន្តោប្រវេសន៍នៅព្រំដែនជាមួយម៉ិកស៊ិក។
បន្ទាប់ពីបិទព្រំដែនដោយហេតុកូវីដ១៩ រដ្ឋបាលអាមេរិករបស់លោកបៃដិន ទើបសម្រេចកាលពីខែឧសភា បើកព្រំដែនវិញ និងដាក់ឱ្យដំណើរការបែបបទសុំសិទ្ធិជ្រកកោន ដល់ពលរដ្ឋប្រទេសខ្លះ មុនប្តូរចិត្តបិទព្រំដែនសង់ជញ្ជាំងអន្តោប្រវេសន៍វិញ។ ប៉ុន្តែគ្មានអ្វីអាចបញ្ឈប់សកម្មភាពអន្តោប្រវេសន៍ទេ។ ក្នុងតែមួយខែកញ្ញា២០២៣ មានពលរដ្ឋវេណេស៊ុយអេឡា៦ម៉ឺននាក់ ពលរដ្ឋក្វាតាម៉ាឡាជាង៣ម៉ឺន៥ពាន់ ...បានមកដល់ម៉ិកស៊ិកដើម្បីត្រៀមប្រថុយនឹងគ្រោះថ្នាក់ឆ្លងទៅទិសដៅចុងក្រោយគឺសហរដ្ឋអាមេរិក។ បើតាមអង្គការអន្តោប្រវេសន៍ពិភពលោក ព្រំដែនអាមេរិកនិងម៉ិកស៊ិកជាច្រកអន្តោប្រវេសន៍ផ្លូវគោកដ៏មរណៈបំផុតនៅលើពិភពលោក។ នៅឆ្នាំ២០២២ អង្គការបានរាប់ឃើញមានជនអន្តោវេសន៍ឆ្លងព្រំដែនម៉ិកស៊ិកអាមេរិកស្លាប់និងបាត់ខ្លួន៦៨៦នាក់។ ហេតុដូច្នេះហើយបានជាអង្គការAmnesty International បានអំពាវនាវឱ្យជំនួបកំពូលម៉ិកស៊ិក គោរពសិទ្ធិអ្នកសុំសិទ្ធជ្រកកោននិងបិទបញ្ចប់ការរើសអើងអន្តោប្រវេសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ