លោកបៃដិនប្រកាសបន្តសាងសង់ជញ្ជាំងម៉ិកស៊ិកប្រឆាំងអន្តោប្រវេសន៍
ការសាងសង់ជញ្ជាំងម៉ិកស៊ិកប្រឆាំងអន្តោប្រវេសន៍ដែលជាវិធានការផ្តួចផ្តើមដោយអតីតប្រធានាធិបតីដូណាល់ត្រាំ នឹងមានដំណើរការបន្តទៅមុខទៀត។ នេះបើតាមសេចក្តីប្រកាសដ៏គួរឱ្យភ្ញាក់ផ្អើលរបស់លោកប្រធានាធិបតីអាមេរិកចូបៃដិន នៅថ្ងៃទី ៥តុលា២០២៣។
ចុះផ្សាយនៅថ្ងៃ៖
ស្តាប់ - ០២:៣៦
លោក ចូ បៃដិន បានសន្យាក្នុងយុទ្ធនាការឃោសនាបោះឆ្នោតប្រធានាធិបតីអាមេរិកឆ្នាំ២០២០ និងបានសម្រេចផ្អាកការសាងសង់ជញ្ជាំងម៉ិកស៊ិករបស់លោកដូណាល់ត្រាំមែននៅពេលបានចូលកាន់តំណែងភ្លាម ដោយបញ្ជាក់នៅពេលនោះថាជញ្ជាំងគ្មានប្រសិទ្ធភាពទប់ស្កាត់លំហូរអន្តោប្រវេសន៍ទេ។
ម្សិលមិញ លោក ចូ បៃដិន នៅតែអះអាងដដែលនិងជាថ្មីថាជញ្ជាំងគ្មានប្រសិទ្ធភាពទប់ស្កាត់អន្តោប្រវេសន៍ទេ ប៉ុន្តែកញ្ចប់ថវិកាសម្រាប់សាងសង់គម្រោងនេះ ត្រូវបានសភាខុនក្រេសអាមេរិកអនុម័តរួចទៅហើយ និងមិនអាចប្តូរផ្លាស់យកលុយនោះទៅចាយវាយនៅកន្លែងផ្សេងទៀត។ ហេតុដូច្នេះហើយបានជារដ្ឋបាលលោកបៃដិន សម្រេចអនុញ្ញាតឱ្យសាងសង់បន្ត។ ម្យ៉ាងទៀត បើតាមការពន្យល់បន្ថែមរបស់រដ្ឋមន្ត្រីក្រសួងមហាផ្ទៃ Alejandro Mayorkas អាមេរិកត្រូវការមានរបងជាជញ្ជាំងដោយពិតៗនិងផ្លូវនៅក្បែរព្រំដែនដើម្បីរារាំងអន្តោប្រវេសន៍ខុសច្បាប់។ ក្នុងថ្ងៃម្សិលមិញនោះដដែល សេតវិមានបានប្រកាសចាប់ផ្តើមបញ្ជូនអន្តោប្រវេសន៍ខុសច្បាប់ តាមជើងហោះហើរពីអាមេរិកទៅវេណេស៊ុយអេឡាឡើងវិញបន្ទាប់ពីអាក់ខានតាំងពីខែមករា២០២១មក។
តាមការពិត រដ្ឋបាលលោកបៃដិនកំពុងរងសម្ពាធនយោបាយយ៉ាងខ្លាំង។ បក្សសាធារណរដ្ឋបានយកសំណុំរឿងអន្តោប្រវេសន៍មកធ្វើជាប្រធានបទនៃយុទ្ធនាការឃោសនាបោះឆ្នោតប្រធានាធិបតីអាមេរិកឆ្នាំ២០២៤។ ចំណែកសមាជិកបក្សប្រជាធិបតេយ្យផ្ទាល់ ក៏ដាក់សម្ពាធ លើរូបប្រធានាធិបតីបៃដិនខ្លាំងដែរ។ អភិបាលក្រុងធំៗ ដូចជាក្រុងញូវយ៉ក និងស៊ីកាហ្គោ បានប្រកាសថាលែងមានលទ្ធភាពដោះស្រាយសេចក្តី ត្រូវការរបស់អន្តោប្រវេសន៍ហើយ។
សេចក្តីសម្រេចនេះ ធ្វើឡើងជួនចំពេលរដ្ឋមន្ត្រីការបរទេសអាមេរិកលោកអង់តូនី ប្លីងកិន កំពុងស្ថិតនៅក្នុងប្រទសម៉ិកស៊ិក ដើម្បីជជែកអំពីបញ្ហាសន្តិសុខ ការប្រយុទ្ធប្រឆាំងនឹងគ្រឿងញៀននិងអន្តោប្រវេសន៍។ លោកប្រធានាធិបតីម៉ិកស៊ិកលោក André Manuel Lopez Obrador បានបញ្ចេញប្រតិកម្មភ្លាមថាការបន្តសាងសង់ព្រំដែន ជាដំណើរត្រលប់ថយក្រោយ ហើយនយោបាយរបស់ក្រុមស្តាំនិយមជ្រុលអាមេរិកមិនអាចដោះស្រាយបញ្ហាអន្តោប្រវេសន៍បានទេ។ ក្នុងក្រសែភ្នែកម៉ិកស៊ិក ជញ្ជាំងនេះមិនអាចរារាំងជនអន្តោប្រវេសន៍ឱ្យចាកចេញពីប្រទេសកំណើត និងមិនអាចរារាំងឈ្មួញទុច្ចរិតរកស៊ីចម្លងអន្តោប្រវេសន៍ទៅសហរដ្ឋអាមេរិកដោយប្រើគ្រប់មធ្យោបាយ រាប់ទាំងមធ្យោបាយដ៏មហាគ្រោះថ្នាក់បានឡើយ។
កាលពីឆ្នាំទៅ មនុស្សជាង៨០០នាក់បានបាត់បង់ជីវិតក្នុងការព្យាយាមរត់ឆ្លងទៅអាមេរិក។ ប៉ុន្តែលំហូរអន្តោប្រវេសន៍មិនបានចុះថយទេ។ គឺមានតែកើនឡើងបន្ថែមទៀត។ គ្រាន់តែមួយថ្ងៃពុធទី៤តុលា អាជ្ញាធរម៉ិកស៊ិកឃាត់ខ្លួនអន្តោប្រវេសន៍ខុសច្បាប់បានជិត១៥០០០នាក់ នៅចំណុចព្រំដែនទាំងសងខាងអាមេរិក-ម៉ិកស៊ិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ