ប្រមុខការទូតចិនទៅអាមេរិកដើម្បីរៀបចំជំនួបរវាងលោកស៊ីជីនពីងនិងលោកចូបៃដិន?
អាមេរិកនិងចិនកំពុងផ្តើមចរចាការទូតដ៏កម្រនិងដ៏យ៉ាងប្រញឹក នៅថ្ងៃព្រហស្បតិ៍ទី ២៦តុលានេះ ដើម្បីបន្ធូរសម្ពាធតានតឹងនៃទំនាក់ទំនងដ៏ស្មុគស្មាញរវាងមហាអំណាចទាំងពីរឱ្យបានប្រសើរឡើង។ ជំនួបថ្នាក់រដ្ឋមន្ត្រីការបរទេសលើកនេះអាចនឹងឈានដល់ប្រកាសអំពីដំណើរទស្សនកិច្ចរបស់លោកប្រធានាធិបតីចិនស៊ីជិនពីងនៅសហរដ្ឋអាមេរិកផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោកវ៉ាងយី ប្រមុខការទូតចិនកំពុងបំពេញទស្សនកិច្ចដ៏កម្រនៅទីក្រុងវ៉ាស៊ីនតោន។ ក្រោយជំនួបជាមួយសមភាគីអាមេរិក លោក វ៉ាងយី ប្រកាសចង់បានការអភិវឌ្ឍកិច្ចសហប្រតិបត្តិការដែលផ្តល់ប្រយោជន៍ដល់ភាគីទាំងពីរ និងដែលនាំឱ្យទំនាក់ទំនងចិន-អាមេរិកមានស្ថិរភាព និងនិរន្តរភាព។ ប្រមុខការទូតចិនក៏បានអំពាវនាវឱ្យមហាអំណាចទាំងពីរប្រឈមមុខគ្នាដោះស្រាយបញ្ហាដោយស្ងប់ស្ងាត់ បញ្ចៀសឱ្យបាននូវរាល់ការយល់ច្រឡំទាំងឡាយ។ អាមេរិករង់ចាំជជែកពិភាក្សាតាមបែបស្ថាបនានៅថ្ងៃខាងមុខ។ នេះជាចម្លើយតបរបស់លោកអង់តូនី ប្លីងកិន រដ្ឋមន្ត្រីការបរទេសអាមេរិក ដោយយល់ស្របតាមសំដីរបស់សមភាគី។
កិច្ចសន្ទនាទ្វេភាគីបានបន្តដោយការជួបជុំទទួលទានអាហារការងារ។ ហើយប្រមុខការទូតទាំងពីរត្រូវជួបពិភាក្សាគ្នាជាថ្មីម្តងទៀតនៅថ្ងៃសុក្រនេះ ក្នុងក្របខ័ណ្ឌនៃការរក្សាទំនាក់ទំនងបើកចំហនិងមានទំនួលខុសត្រូវ។ បន្ទាប់មក លោកវ៉ាងយី នឹងអញ្ជើញទៅសេតវិមានដើម្បីជួបជជែកជាមួយទីប្រឹក្សាសន្តិសុខជាតិអាមេរិកលោកជេកស៊ូលីវ៉ាន់ និងទំនងអាចមានជំនួបជាមួយលោក ចូបៃដិនផង។ ពុំមានសេចក្តីប្រកាសអំពីជំនួបជាមួយប្រធានាធិបតីអាមេរិកទេ ប៉ុន្តែអ្នកការទូតយល់ថាពិតជាមានការទទួលជួប ព្រោះលោកអង់តូនីប្លីងកិន ធ្លាប់ត្រូវបានលោកស៊ីជីនពីងទទួលជួបដែរ ក្នុងពេលបំពេញទស្សនកិច្ចនៅចិនកាលពីខែមិថុនាកន្លងទៅ។
ទស្សនកិច្ចរបស់លោកវ៉ាងយីប្រព្រឹត្តទៅជួនចំពេលមហាអំណាចទាំងពីរកំពុងប្រជែងគ្នាខ្លាំង តែក៏ចង់មានទំនាក់ទំនងប្រកបទំនួលខុសត្រូវ គោរពតាមច្បាប់អន្តរជាតិលើគ្រប់វិស័យមិនថានយោបាយ ឬសេដ្ឋកិច្ចឬអ្វីផ្សេងទេ។ ទស្សនកិច្ចនេះក៏ជាការដំណើររៀបចំទស្សនិច្ចរបស់លោកប្រធានាធិបតីចិនស៊ីជីនពីងនៅសហរដ្ឋអាមេរិក ដែលទំនងជាអាចនឹងប្រព្រឹត្តទៅនៅពាក់កណ្តាលខែវិច្ឆិកា ពោលគឺនាឱកាសមានជំនួបកំពូលនៃក្រុមប្រទេសមានកិច្ចសហប្រតិបត្តិការសេដ្ឋកិច្ចនៅតំបន់អាស៊ីប៉ាស៊ីហ្វិក ហៅកាត់ថាAPEC។ សង្ឃឹមថាជំនួបរវាងប្រមុខការទូតទាំងពីរ នឹងប្រកាសបញ្ជាក់អំពីជំនួបកំពូលរវាងលោកស៊ីជិនពីងនិងលោកចូបៃដិន ដូចអ្វីដែលប្រធានាធិបតីអាមេរិកធ្លាប់អះអាងកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ