លោកស៊ី ជីនពីង៖ទំនាក់ទំនងរវាងចិន និងអាមេរិកគឺសំខាន់ខ្លាំងណាស់សម្រាប់អនាគតមនុស្សជាតិ
នៅក្នុងប្រទេសចិន ប្រមុខការទូតលោកវ៉ាង យីបានទទួលជួបគណៈប្រតិភូអាមេរិកដឹកនាំដោយអ្នកប្រជាធិបតេយ្យលោក Chuck Schumer ប្រធានក្រុមសំឡេងភាគច្រើននៅព្រឹទ្ធសភា។ ទស្សនកិច្ចរបស់គណៈប្រតិភូអាមេរិកនៅចិនមានគោលដៅកាត់បន្ថយភាពតានតឹងរវាងប្រទេសទាំងពីរ។ ក្រៅពីបានជួបលោកវ៉ាង យី គណៈប្រតិភូអាមេរិកក៏បានទទួលជួបដោយប្រធានាធិបតីចិនលោកស៊ី ជីនពីង និងប្រធានសភាលោកហ្សាវ លីជីក្នុងក្រុងប៉េកាំងដែរ។
ចុះផ្សាយនៅថ្ងៃ៖
ស្តាប់ - ០២:៥១
ថ្លែងនៅចំពោះមុខគណៈប្រតិភូអាមេរិក ប្រធានាធិបតីចិនលោកស៊ី ជីនពីងបានគូសបញ្ជាក់ត្រង់ៗថា ទំនាក់ទំនងរវាងចិន និងអាមេរិកគឺសំខាន់បំផុតសម្រាប់ពិភពលោក។ តាមលោកស៊ី អនាគត និងជោគវាសនារបស់មនុស្សជាតិគឺអាស្រ័យទាំងស្រុងលើការចុះសម្រុង ឬមិនចុះសម្រុងគ្នារវាងចិន និងអាមេរិកនៅចំពោះមុខពិភពលោកមួយដែលកំពុងស្គាល់ភាពក្រឡាប់ចាក់ និងភាពវឹកវរ។ នៅមុនជួបលោកស៊ី ជីនពីន គណៈប្រតិភូអាមេរិកដឹកនាំដោយលោក Chuck Schumer បានទទួលជួបដោយប្រមុខការទូតចិនលោកវ៉ាង យី។
« យើងសង្ឃឹមថា ទស្សនកិច្ចរបស់គណៈប្រតិភូអាមេរិកពេលនេះនឹងជួយឱ្យអាមេរិកយល់កាន់តែច្បាស់អំពីចិន និងសំឡឹងឃើញទំនាក់ទំនងរវាងចិន អាមេរិកជាមួយនឹងកម្មវត្ថុពិត រួមទាំងគ្រប់គ្រងភាពខុសគ្នាដែលមានស្រាប់ឲ្យកាន់តែសមហេតុផល » នេះជាការថ្លែងរបស់លោកវ៉ាង យីទៅកាន់លោក Chuck Schumer។ ចំណែកប្រធានក្រុមសំឡេងភាគច្រើនមកពីបក្សប្រជាធិបតេយ្យនៅព្រឹទ្ធសភារូបនេះបាននិយាយប្រាប់លោកវ៉ាង យីវិញថា អាមេរិក និងចិនត្រូវតែគ្រប់គ្រងទំនាក់ទំនងរវាងគ្នាដោយមានការទទួលខុសត្រូវ និងថា អាមេរិកមិនស្វែងរកជម្លោះទេ។
តាមលោក Chuck Schumer វាជារឿងធម្មតាដែលមហាអំណាចធំទាំងពីរមានការប្រជែងគ្នានៅក្នុងវិស័យមួយចំនួន ដូចជាពាណិជ្ជកម្ម បច្ចេកវិទ្យា ការទូត ឬវិស័យផ្សេងទៀត។ តែរឿងអាទិភាពមួយទៀតដែលលោក Chuck Schumer មិនភ្លេចលើកទៅនិយាយជាមួយលោកវ៉ាង យីនោះ គឺការលើកកម្ពស់សិទ្ធិមនុស្សនៅចិន។ ក្រៅពីទំនាក់ទំនងទ្វេភាគីអាមេរិក ចិន លោក Chuck Schumer បានឆ្លៀតរិះគន់ជំហររបស់ចិននៅក្នុងជម្លោះរវាងចលនាប៉ាឡេស្ទីនហាម៉ាស់ និងអ៊ីស្រាអែលពេលនេះ។
លោក Chuck Schumer យល់ថា ជំហររបស់ចិនដែលបានអំពាវនាវឲ្យពួកហាម៉ាស់ និងអ៊ីស្រាអែលមានការអត់ធ្មត់ជាជំហរគ្មានការអាណិតអាសូរ និងគាំទ្រចំពោះអ៊ីស្រាអែលក្នុងពេលលំបាកទេ។ ចំណែកលោកវ៉ាង យីបានឆ្លើយដោយគូសបញ្ជាក់ជាទូទៅថា ពិភពលោកសព្វថ្ងៃកំពុងឆ្លងកាត់ភាពចលាចល និងការផ្លាស់ប្តូរជាមួយនឹងសង្រ្គាមអ៊ុយក្រែន ហើយពេលនេះ សង្រ្គាមបានផ្ទុះជាថ្មីនៅមជ្ឈិបូព៌ា។ តាមលោកវ៉ាង យី បញ្ហាប្រឈមទាំងនេះត្រូវតែដោះស្រាយដោយសហគមន៍អន្តរជាតិ ហើយចិន និងអាមេរិកត្រូវតែដើរតួនាទីដោយខានមិនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ