តុលាការកំពូលអាមេរិកបដិសេធមិនទាន់វិនិច្ឆ័យសំណុំរឿងអភ័យឯកសិទ្ធិអតីតប្រធានាធិបតី ដូណាល់ ត្រាំ
តើលោក ដូណាល់ ត្រាំ អតីតប្រធានាធិបតីសហរដ្ឋអាមេរិក ត្រូវទទួលបានការការពារដោយ«អភ័យឯកសិទ្ធិប្រធានាធិបតី» ដែរឬទេ ចំពោះចេតនាចង់កែក្រឡាស់លទ្ធផលបោះឆ្នោត កាលពីឆ្នាំ២០២០? នេះគឺជាសំណួរដែលចោទឡើង នៅតុលាការកំពូលសហរដ្ឋអាមេរិក នាថ្ងៃសុក្រ ទី២២ ខែធ្នូ។ ក្រោយកិច្ចពិភាក្សាច្បាប់យ៉ាងតឹងតែង នៅទីបំផុតទៅ តុលាការវិនិច្ឆ័យរដ្ឋសហព័ន្ធអាមេរិក បានសម្រេចបដិសេធមិនទាន់វិនិច្ឆ័យថាយ៉ាងណានោះទេចំពោះករណីសំណុំរឿងនេះ។ បើទោះបីជា បដិសេធមិនទាន់វិនិច្ឆ័យក្តី ប៉ុន្តែ តុលាការកំពូល ក៏ពុំបានបញ្ជាក់ ថា អតីតប្រធានាធិបតី ត្រូវតែទទួលបាន«អភ័យឯកសិទ្ធិ»គេចផុតពីការចោទប្រកាន់បទល្មើសព្រហ្មទណ្ឌ នោះដែរ។
ចុះផ្សាយនៅថ្ងៃ៖
ស្តាប់ - ០៣:២៥
ការមិនទាន់វិនិច្ឆ័យយ៉ាងដូច្នេះ បាននាំជាប្រយោជន៍និងការត្រេកអរសប្បាយចិត្តសម្រាប់ក្រុមគណបក្សសាធារណៈរដ្ឋ មិនតិចឡើយ។ ដ្បិតថា ទាំងលោក ដូណាល់ ត្រាំ ក្តីនិង ទាំងក្រុមមេធាវីរបស់គាត់ក្តី សុទ្ធតែបានខំប្រឹងខ្នះខ្នែង និងប្រើគ្រប់មធ្យោបាយ ដើម្បីធ្វើយ៉ាងម្តេច រារាំង កុំឲ្យមានសវនាការជម្រះក្តីកាត់ទោសណាមួយ ឬកុំឲ្យមានសាលដីកាណាមួយ ដែលសម្រេចថាលោក ដូណាល់ ត្រាំ បានប្រព្រឹត្តទោសកំហុសធ្ងន់ រហូតដល់គ្មានសិទ្ធិឈរឈ្មោះបោះឆ្នោតប្រធានាធិបតីអាមេរិក ជាថ្មី ខណៈពេលដែលយុទ្ធនាការបោះឆ្នោត ឆ្នាំ២០២៤ កាន់តែខិតកៀកជិតមកដល់។
ក្នុងប្រព័ន្ធបណ្តាញសង្គមផ្ទាល់ខ្លួន លោក ដូណាល់ ត្រាំ បានផ្សាយអះអាងថា អំលុងពេលកាន់មុខតំណែងជាប្រធានាធិបតីនៃសេតវិមាន រូបលោកមាន«អភ័យឯកសិទ្ធិពេញលេញ» ហើយនិង មិនអាចត្រូវរងបទចោទប្រកាន់ផ្លូវច្បាប់ ពី រដ្ឋអាជ្ញាណាម្នាក់ ឈានដល់កាត់ទោសជម្រះក្តីឡើយ។ មិនតែប៉ុណ្ណោះ លោក ដូណាល់ ត្រាំ ក៏អំពាវនាវឲ្យអ្នកស្រឡាញ់គាំទ្រ ឲ្យនៅតែបន្តគាំទ្ររូបលោក ហើយនាំគ្នាចូលរួមផ្តល់វិភាគទានលុយកាក់សម្រាប់យុទ្ធនាការបោះឆ្នោត ឆ្នាំថ្មី ទៀតផង។
ការជជែកពិភាក្សាច្បាប់អំពីអភ័យឯកសិទ្ធិប្រមុខរដ្ឋអាមេរិក នៅពេលនេះ គឺបន្ទាប់ តុលាការរដ្ឋកូលូរាដូ បានប្រកាសកាលពីពេលថ្មីៗ ថា អតីតប្រធានាធិបតីលោក ដូណាល់ ត្រាំ គ្មានសិទ្ធិ គ្មានលក្ខណៈសម្បត្តិគ្រប់គ្រាន់ឈរឈ្មោះបោះឆ្នោតនៅក្នុងរដ្ឋនេះឡើយ ពីព្រោះតែបានប្រព្រឹត្តកំហុសធ្ងន់ អំពាវនាវឲ្យបង្កអំពើហិង្សាលុកលុយវិមានសភា កាពីតូល កាលពីថ្ងៃទី៦ ខែមករា ឆ្នាំ២០២១។ តុលាការជាន់ទាប ក៏អះអាងថា រដ្ឋអាជ្ញាអាចមានសិទ្ធិចោទប្រកាន់ចំពោះអតីតប្រធានាធិបតីបាន។ មិនតែប៉ុណ្ណោះ តុលាការជាន់ទាប ក៏ថែមទាំងបានដាក់កាលវិភាគស្រេចទៅហើយ សម្រាប់ដើមឆ្នាំថ្មី ដើម្បីបើកសវនាការជម្រះក្តី ចំពោះបទចោទប្រកាន់មួយចំនួន លើលោក ដូណាល់ ត្រាំ។
ហេតុដូច្នេះហើយ ទើប លោក ចេក ស្មីត រដ្ឋអាជ្ញានៃតុលាការកំពូលរដ្ឋសហព័ន្ធអាមេរិក បានស្នើប្តឹងទៅ តុលាការកំពូល តែម្តង ដើម្បីនឹងវិនិច្ឆ័យ ជាបន្ទាន់ជាទីបំផុត។
ក្នុងប្រវត្តិច្បាប់សហរដ្ឋអាមេរិក រហូតដល់មកដល់ពេលនេះ គឺពុំដែលមានសាលក្រម ឬសាលដីកាជាយុត្តិសាស្ត្រណាមួយ ដែលបានសម្រេចឲ្យដាច់ស្រេចច្បាស់លាស់ ថា អតីតប្រធានាធិបតីត្រូវតែទទួលការពារពីអភ័យឯកសិទ្ធិ គេចផុតពីការចោទប្រកាន់ ក្នុងសំណុំរឿងព្រហ្មទណ្ឌ នោះឡើយ។ សំណុំរឿង លោក ដូណាល់ ត្រាំ ជាករណីពិសេស ប្លែក ទី១ របស់សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ