ភ្នំភ្លើង មេរ៉ាពី នៅឥណ្ឌូណេស៊ី កំរើកបញ្ចេញផ្សែងផេះ កំពស់៦០០០ម៉េត្រ
ភ្នំភ្លើង មេរ៉ាពី ស្ថិតនៅលើកោះហ្សាវ៉ា ប្រទេសឥណ្ឌូណេស៊ី បានកម្រើកឡើង និងបានបញ្ចេញផ្សែងផេះ ហោះទៅលើកំពស់ប្រមាណជា៦ពាន់មែត្រ នៅថ្ងៃអាទិត្យទី២១មិថុនា។ ភ្នំភ្លើងនេះ ជាភ្នំភ្លើងដែលនៅមានជីវិត និងសកម្មជាទីបំផុត ហើយត្រូវបានអ្នកជំនាញតាមដានជាប្រចាំ ដើម្បីដឹងមុន ក្នុងករណីវាផ្ទុះបញ្ចេញកំអែលនិងអណ្តាតភ្លើង។
ចុះផ្សាយនៅថ្ងៃ៖
ស្តាប់ - ០២:៤២
យោងតាមអ្នកជំនាញធរណីវិទ្យា ប្រចាំនៅកោះហ្សាវ៉ា ឥណ្ឌូណេស៊ី ភ្នំភ្លើង មេរ៉ាពី បានកម្រើកផ្ទុះ នៅថ្ងៃអាទិត្យទី២១មិថុនានេះ។ សម្លេងផ្ទុះចំនួន២លើក បានបន្លឺលាន់ឮ ក្នុងរយៈពេល៧នាទី។ ប្រជាជនរស់នៅ តំបន់ Sleman និង Klaten បានអះអាងប្រាប់អ្នកយកព័ត៌មានក្នុងស្រុកថា ពួកគេបានឮសម្លេង កម្រើកផ្ទុះ ចេញភ្នំភ្លើងមេរ៉ាពី នៅព្រឹកថ្ងៃអាទិត្យ។
អាជ្ញាធរឥណ្ឌូណេស៊ី បានអំពាវនាវ ឲ្យប្រជាជន ដែលរស់នៅជុំវិញភ្នំភ្លើងនេះ ក្នុងបរិវេណ៣គីឡូម៉ែត្រ ត្រូវភៀសខ្លួន ទៅរកទីកន្លែងមានសុវត្ថិភាពសិន។ អាជ្ញាធរ ក៏បានអំពាវនាវផងដែរ ឲ្យយន្តហោះ ដែលធ្វើដំណើរឆ្លងកាត់ដំបន់នេះ ត្រូវបង្កើនការប្រុងប្រយ័ត្នខ្ពស់ ក្នុងករណីផ្សែងផេះក្រាសខ្លាំង ឬដុំភ្លើងដែលអាចផ្ទុះចេញ ពីភ្នំភ្លើងនេះ។
គួរកត់សំគាល់ថា កាលពីខែមីនា ភ្នំភ្លើងមេរ៉ាពីដ៏ល្បី ដែលស្ថិតនៅខាងជើងទីក្រុង យ៉ូកចាកាតា លើកោះហ្សាវ៉ានេះ បានផ្ទុះកម្រើកម្តងរួចហើយ។ អាជ្ញាធរបានបិទជាបណ្តោះអាសន្ន នូវព្រលាន យន្តហោះ នៅទីក្រុង Surakarta ស្ថិតនៅចំងាយ៤០គីឡូម៉ែត្រ ពីភ្នំភ្លើង។
សូមបញ្ជាក់ផងដែរថា ឥណ្ឌូណេស៊ី ជាប្រទេសដែលមានស្ថានភាពភូមិសាស្ត្រ ស្ថិតលើចំនុចប្រសព្វ នៃស្រទាប់សំបកផែនដី ដែលរុញបុកគ្នាទៅវិញទៅមកជាប្រចាំ។ ស្នាមប្រេះ បង្កឡើងដោយកម្លាំងរុញច្រាន នៃស្រទាប់ផែនដី បានធ្វើឲ្យតំបន់នេះ សំបូរភ្នំភ្លើងបំផុត។ ក្នុងចំណោមភ្នំភ្លើងប្រមាណ១៦០ ដែលមានជីវិតនៅឥណ្ឌូណេស៊ី ភ្នំភ្លើងមេរ៉ាពី គឺជាភ្នំភ្លើងដែលសកម្មជាងគេ។ កាលពីឆ្នាំ១៩៣០ ភ្នំភ្លើងមេរ៉ាពី បានផ្ទុះបញ្ចេញកំអែលនិងផេះ បណ្តាលឲ្យស្លាប់ប្រជាជនប្រមាណ១៣០០នាក់។ ក្រោយមក នៅឆ្នាំ១៩៩៤ មេរ៉ាពីបានសម្លាប់មនុស្ស៦៤នាក់ ហើយការផ្ទុះចុងក្រោយគឺ នៅខែតុលា ឆ្នាំ២០១០ មេរ៉ាពីបានកម្រើកផ្ទុះយ៉ាងខ្លាំង បណ្តាលឲ្យស្លាប់មនុស្ស៣៦៧នាក់ និងបានធ្វើឲ្យប្រជាជន ប្រមាណ៤សែននាក់ ត្រូវភៀសខ្លួន។
យោងតាមអ្នកជំនាញ ភ្នំភ្លើងមេរ៉ាពី មានអាយុកាលក្មេង ប្រមាណត្រឹមតែ៦ម៉ឺនឆ្នាំប៉ុណ្ណោះ។ ភ្នំភ្លើងនេះ ជាប្រភេទភ្នំភ្លើងដែលមានប្រហោងកណ្តាលធំ ផ្ទប់ឧស្ម័ននិងកំអែលម៉ាក់ម៉ា ក្នុងកំដៅដល់ទៅជាង៨០០អង្សារសេ។ ពេលដែលសំពាធកំដៅឡើងដល់កម្រិត ភ្នំភ្លើងនេះ អាចកំអែល អមដោយដុំថ្មីធំៗ ចម្ងាយរាប់សិបគីឡូម៉ែត្រនៅជុំវិញ។ តែទោះជាយ៉ាងនេះក្តី ប្រជាជនប្រមាណ៥សែននាក់ នៅតែបន្តរស់នៅ ក្នុងតំបន់ដែលប្រឈបនឹងគ្រោះថ្នាក់បំផុត ជុំវិញភ្នំមេរ៉ាពី។ អ្នកដែលបានភៀសខ្លួនចេញនៅពេលផ្ទុះម្តងៗ ភាគច្រើនបានត្រលប់ទៅរស់នៅកន្លែងចាស់វិញ។ សម្រាប់ប្រជាជនតំបន់នេះ ភ្នំមេរ៉ាពីបានក្លាយជានិម្មិតរូប នៃភាពមិនទៀងទាត់នៃជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ