ករណីឆ្លងកូវីដ១៩នៅឥណ្ឌូណេស៊ីកើនឡើងលើស ១០ម៉ឺននាក់
ករណីឆ្លងកូវីដ១៩នៅក្នុងប្រទេសឥណ្ឌូណេស៊ី បានកើនឡើងលើស ១០ម៉ឺននាក់ កាលពីថ្ងៃចន្ទ ក្នុងពេលដែលចំនួនអ្នកស្លាប់មានរហូតដល់ទៅ ៤ ៨៣៨នាក់។ ស្ថិតក្នុងស្ថានការណ៍នេះ អង្គការកាកបាទក្រហមឥណ្ឌូណេស៊ីបានទាញសញ្ញាអាសន្នថា វិបត្តិកូវីដ១៩នៅក្នុងប្រទេសដែលមានប្រជាជនច្រើនជាងគេលំដាប់ទី៤ នៅលើពិភពលោកនេះ អាចនឹងធ្លាក់ក្នុងសភាពធ្ងន់ធ្ងរគ្រប់គ្រងលែងបាន។
ចុះផ្សាយនៅថ្ងៃ៖
ឥណ្ឌូណេស៊ី ដែលមានប្រជាជនរហូតដល់ទៅជិត ២៧០លាននាក់ ស្ថិតក្នុងចំណោមប្រទេសដែលរងគ្រោះដោយកូវីដ១៩ខ្លាំងជាងគេ នៅក្នុងតំបន់អាស៊ី ហើយអ្នកជំនាញខាងវេជ្ជសាស្រ្តបាននាំគ្នាលើកឡើងថា ការកើនឡើងនៃចំនួនករណីឆ្លងកូវីដ១៩ថ្មីៗ នៅក្នុងពេលបច្ចុប្បន្ននេះ គឺដោយសារតែអាជ្ញាធរបានដក ឬបន្ធូរបន្ថយវិធានការរឹតត្បឹតការជួបជុំរបស់ប្រជាជន។
គួរបញ្ជាក់ថា អាជ្ញាធរឥណ្ឌូណេស៊ីបានសម្រេចបន្ធូរបន្ថយវិធានការរឹតត្បឹតការជួបជុំ និងការធ្វើដំណើរ កាលពីខែមិថុនាកន្លងទៅ ក្នុងគោលដៅ ជំរុញសេដ្ឋកិច្ចឲ្យមានដំណើរការឡើងវិញ។ ក៏ប៉ុន្តែ គេសង្កេតឃើញថា ចាប់តាំងពីពេលនោះមក ករណីឆ្លងកូវីដ១៩ថ្មីៗត្រូវបានគេរកឃើញក្នុងមួយថ្ងៃៗប្រមាណជា ១ពាន់នាក់ ឬលើសពីនេះជារៀងរាល់ថ្ងៃ។ ហើយនេះ គ្រាន់តែជាករណីឆ្លងដែលគេបានធ្វើតេស្តរកឃើញតែប៉ុណ្ណោះ។ គេដឹងថា ឥណ្ឌូណេស៊ីស្ថិតក្នុងចំណោមប្រទេសដែលមានការធ្វើតេស្តរកកូវីដ១៩ក្នុងអត្រាមួយទាប។ ដូច្នេះ គេសង្ស័យថា ចំនួនអ្នកឆ្លងកូវីដ១៩ពិតប្រាកដ អាចមានច្រើនជាងនេះ គ្រាន់តែគេមិនបានដឹង ដោយសារតែមិនបានធ្វើតេស្ត។
អ្នកនាំពាក្យសមាគមគ្រូពេទ្យឥណ្ឌូណេស៊ីបានលើកឡើង នៅថ្ងៃចន្ទថា មួយរយៈកាលថ្មីៗចុងក្រោយនេះ ប្រជាជនឥណ្ឌូណេស៊ីហាក់ដូចជាបាននាំគ្នាបន្ធូរដៃ លែងសូវយកចិត្តទុកដាក់អនុវត្តវិធានការការពារកូវីដ១៩ ហើយថា តួលេខដែលបង្ហាញពីអ្នកឆ្លងលើសពី១០ម៉ឺននាក់ កាលពីថ្ងៃចន្ទនេះ គួរតែជាសញ្ញាដាស់ស្មារតីឲ្យប្រជាជន និងជាពិសេសរដ្ឋាភិបាលឲ្យចាប់ផ្តើមបង្កើនការយកចិត្តទុកដាក់ឡើងវិញ ក្នុងការទប់ស្កាត់ការរីករាលដាលកូវីដ១៩នេះ។
អង្គការកាកបាទក្រហមឥណ្ឌូណេស៊ីវិញបានប្រកាសឲ្យដឹង នៅថ្ងៃចន្ទនេះដែរថា ខ្លួនបានបង្កើតក្រុមស្ម័គ្រចិត្តចំនួន ៧ពាន់នាក់ នៅទូទាំងប្រទេស ឲ្យចេញធ្វើប្រតិបត្តិការណែនាំប្រជាជនឲ្យយល់ពីការអនុវត្តវិធានការចាំបាច់ រួមមានដូចជាការរក្សាគម្លាតគ្នា ការពាក់ម៉ាស់ និងវិធានការអនាម័យចាំបាច់ផ្សេងទៀត ដើម្បីការពារខ្លួនពីការឆ្លងកូវីដ១៩។
គេសង្កេតឃើញថា បច្ចុប្បន្ននេះ នៅស្ទើរតែគ្រប់បណ្តាប្រទេសទាំងអស់ ដែលកន្លងមក ក្រោយពីឃើញស្ថានភាពបានធូរស្រាល ហើយក៏នាំគ្នាបន្ធូរបន្ថយ ឬដកចេញវិញនូវវិធានការរឹតត្បឹតប្រជាជន ការឆ្លងកូវីដ១៩កំពុងតែចាប់ផ្តើមមានសន្ទុះកើនឡើងវិញគួរឲ្យព្រួយបារម្ភ ហើយអង្គការសុខភាពពិភពលោកបានក្រើនរំឭក កាលពីថ្ងៃចន្ទដល់គ្រប់ប្រទេសទាំងអស់ថា មិនត្រូវបន្ធូរដៃឆាប់ពេកទេ ក្នុងការចាត់វិធានការទប់ស្កាត់ការរីករាលដាលកូវីដ១៩នេះ ក៏ប៉ុន្តែ ក្នុងពេលជាមួយគ្នា ក៏បានលើកឡើងផងដែរថា ការបិទព្រំដែនក៏វាមិនមែនជាវិធានការមានប្រសិទ្ធភាពសម្រាប់រយៈពេលវែងនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ