នូវែលសេឡង់ចាត់វិធានការរឹតត្បឹតប្រជាជនសាជាថ្មី ក្រោយពីករណីឆ្លងកូវីដ១៩កើនឡើងវិញ
កាលពីថ្ងៃអង្គារ នាយករដ្ឋមន្រ្តីនូវែលសេឡង់បានប្រកាសបិទទីក្រុងអូកឡែនដ៍ ដែលជាក្រុងដ៏ធំមួយរបស់នូវែលសេឡង់ ក្រោយពីគេបានរកឃើញករណីឆ្លងកូវីដ១៩ថ្មី ដែលជាករណីឆ្លងក្នុងប្រទេសជាលើកទីមួយ ចាប់តាំងពីថ្ងៃទី១ឧសភាមក។ បទបញ្ជាឲ្យប្រជាជនក្នុងក្រុងអូកឡែនដ៍នៅតែក្នុងផ្ទះនេះ ត្រូវមានរយៈពេលយ៉ាងតិច ៣ថ្ងៃ ដោយចាប់ផ្តើមអនុវត្តពីថ្ងៃពុធនេះទៅ។
ចុះផ្សាយនៅថ្ងៃ៖
ក្រោយពីគ្មានករណីឆ្លងក្នុងប្រទេសសោះ អស់រយៈពេល ១០២ថ្ងៃកន្លងទៅនេះ នូវែលសេឡង់ទើបនឹងរកឃើញករណីឆ្លងកូវីដ១៩ថ្មីចំនួន ៤ ដែលជាករណីវិជ្ជមានកូវីដ១៩ រកឃើញនៅក្រៅមណ្ឌលចត្តាឡីស័ក។ នេះបើយោងតាមការលើកឡើងរបស់លោកស្រី ហ្សាស៊ីនដា អារឌែន (Jacinda Ardern) នាយករដ្ឋមន្រ្តីនូវែលសេឡង់ ដោយបានបញ្ជាក់ថា ករណីឆ្លងកូវីដ១៩ទាំង៤នេះ គឺស្ថិតនៅក្នុងគ្រួសារតែមួយ ក្នុងទីក្រុងអូកឡែនដ៍ ក៏ប៉ុន្តែ រហូតមកទល់នឹងពេលនេះ គេនៅមិនទាន់អាចរកឃើញនៅឡើយ ប្រភពដើមនៃការឆ្លង។
ប្រឈមនឹងការឆ្លងក្នុងស្រុក ដោយរកប្រភពដើមមិនឃើញនេះហើយ ទើបប្រមុខរដ្ឋាភិបាលនូវែលសេឡង់បានសម្រេចចេញបទបញ្ជាឲ្យប្រជាជននៅអូកឡែនដ៍ស្ថិតនៅតែក្នុងផ្ទះ ចំណែកនៅតាមតំបន់ផ្សេងទៀត វិធានការរឹតត្បឹតការជួបជុំ និងការតម្រូវឲ្យរក្សាគម្លាតគ្នានឹងត្រូវចាប់ផ្តើមដាក់ឲ្យអនុវត្តឡើងវិញ នៅទូទាំងប្រទេស។
គួររំឭកឡើងវិញថា នូវែលសេឡង់តែងតែត្រូវបានគេនាំគ្នាកោតសរសើរនៅទូទាំងពិភពលោក ដោយយកជាគំរូប្រទេសដែលបានទប់ស្កាត់ការរីករាលដាលកូវីដ១៩បានយ៉ាងមានប្រសិទ្ធភាពជាងគេ រហូតអាចឈានទៅទប់ស្កាត់បានទាំងស្រុងនូវការឆ្លងរាលដាលក្នុងសហគមន៍ តាំងពីថ្ងៃទី១ឧសភា។
ក៏ប៉ុន្តែ គេសង្កេតឃើញថា បន្តិចម្តងៗ ប្រជាជនចាប់ផ្តើមត្រឡប់ទៅរកទម្លាប់ចាស់ដូចពីមុនវិញ ដោយលែងសូវយកចិត្តទុកដាក់លើការរក្សាគម្លាត និងអនុវត្តវិធានការសុខភាពចាំបាច់ផ្សេងទៀត បើទោះបីជាអាជ្ញាធរបានព្រមានជារឿយៗ ឲ្យប្រជាជនប្រុងប្រយ័ត្ន ចំពោះករណីឆ្លងរាតត្បាតលើកទីពីរ ដែលនឹងកើតមានដោយចៀសមិនរួច។
ការប្រកាសបិទក្រុងអូកឡែនដ៍ កាលពីថ្ងៃអង្គារនេះ បានធ្វើឲ្យប្រជាជននាំគ្នាសម្រុកទៅទិញឥវ៉ាន់ស្តុកទុក ក៏ប៉ុន្តែ លោកស្រីប្រមុខរដ្ឋាភិបាលនូវែលសេឡង់បានប្រកាសធានាដល់ប្រជាជនអូកឡែនដ៍ថា ផ្សារលក់ទំនិញ គឺសុទ្ធសឹងតែជាសេវាកម្មចាំបាច់ដែលនឹងនៅតែបន្តបើក ហើយទំនិញចាំបាច់ទាំងប៉ុន្មាននឹងមានគ្រប់គ្រាន់ដោយមិនឲ្យខ្វះនោះទេ។
ម្យ៉ាងទៀត លោកស្រីក៏បានលើកឡើងផងដែរថា វិធានការទប់ស្កាត់ការរាតត្បាតកូវីដ១៩នៅពេលនេះក៏នឹងមិនប៉ះពាល់ដែរ ដល់ការបោះឆ្នោតជាតិ ដែលនឹងគ្រោងធ្វើនៅថ្ងៃទី១៩កញ្ញាខាងមុខ ក៏ប៉ុន្តែ លោកស្រីបានប្រកាសផ្អាករាល់យុទ្ធនាការឃោសនាបោះឆ្នោត នៅក្នុងទីក្រុងអូកឡែនដ៍ សម្រាប់រយៈពេលប៉ុន្មានថ្ងៃខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ