ឥណ្ឌូណេស៊ី ៖ សារព័ត៌មានដែលរិះគន់ចំណាត់ការប្រឆាំងនឹងកូវីដ១៩ រងការវាយប្រហារព័ត៌មានវិទ្យា
នៅឥណ្ឌូណេស៊ី ប្រព័ន្ធផ្សព្វផ្សាយព័ត៌មានជាច្រើន ដែលបានសរសេររិះគន់ចំណាត់ការរបស់រដ្ឋាភិបាលទល់នឹងវិបត្តិកូវីដ១៩ បានរងការវាយប្រហារតាមអ៊ីនធ័រនែត ជាបន្តបន្ទាប់។ ជាការវាយប្រហារព័ត៌មានវិទ្យា ដែលប៉ះពាល់យ៉ាងខ្លាំងដល់សេរីភាពសារព័ត៌មាន។ នេះបើតាមការយល់ឃើញរបស់សហព័ន្ធអ្នកកាសែតអន្តរជាតិ។
ចុះផ្សាយនៅថ្ងៃ៖
ស្តាប់ - ០២:៣៨
វេបសាយរបស់ប្រព័ន្ធឃោសនាព័ត៌មានឥណ្ឌូណេស៊ី យ៉ាងហោចបួន បានរងការវាយប្រហារតាមអ៊ីនធ័រនែត ដ៏ធ្ងន់ធ្ងរខ្លាំងមិនធ្លាប់ជួបប្រទះពីមុនមកទេ ពោលគឺហាក់ដូចជាចង់ធ្វើការគំរាម ដាក់កំហិតមិនឱ្យផ្សព្វផ្សាយព័ត៌មានបែបរិះគន់ ឬជាការគំរាមបំបិទសេរីភាពសារព័ត៌មានតែម្តង។ នេះបើតាមសេចក្តីថ្លែងការណ៍របស់សហព័ន្ធអ្នកកាសែតអន្តរជាតិ ដែលបានសម្តែងការព្រួយបារម្ភយ៉ាងខ្លាំងចំ និងបានអំពាវនាវឱ្យអាជ្ញាធរបើកអង្កេតឱ្យបានស៊ីជម្រៅ។ សហព័ន្ធអ្នកកាសែតអន្តរជាតិបានព្រមានទៀតថា ការវាយប្រហារអ៊ីនធ័រនែតទ្រង់ទ្រាយធំនេះ អាចនឹងប៉ះពាល់យ៉ាងខ្លាំងដល់សេរីភាពសារព័ត៌មាននៅឥណ្ឌូណេស៊ី ព្រោះការភ័យខ្លាចខ្លាំងអាចនឹងជំរុញឱ្យអ្នកកាសែតលែងសូវហ៊ានបញ្ចេញទស្សនៈដោយសេរី ហើយឈានទៅដាក់បម្រាមលើខ្លួនឯង។
ការវាយប្រហារមានទម្រង់ផ្សេងៗគ្នា ៖ កាលពីថ្ងៃសុក្រទី ២១សីហា វេបសាយរបស់ប្រព័ន្ធសារព័ត៌មានស៊ើបអង្កេតឥណ្ឌូណេស៊ី Tempo ត្រូវបានជំនួសដោយអេក្រង់ពណ៌ខ្មៅ និងអក្សរពណ៌ក្រហមថា"hoax" (“ព័ត៌មានក្លែងក្លាយ”)។ ចំណែកអត្ថបទសរសេររិះគន់តួនាទីរបស់ភ្នាក់ងារចារកិច្ចនិង យោធា ក្នុងចំណាត់ការប្រយុទ្ធប្រឆាំងនឹងជំងឺរាតត្បាតកូវីដ១៩វិញ ត្រូវបានរលុបចេញពីវេបសាយTirtoដែលជាប្រព័ន្ធសារព័ត៌មានអនឡាញ។
គណនីទ្វីតទ័ររបស់សាស្ត្រាចារ្យជំនាញផ្នែកអេពីដេមីសាស្ត្រ លោក ប៉ង់ឌូ រីអូណូ Pandu Riono ក៏រងការវាយប្រហារដែរ ព្រោះលោកទើបបានធ្វើការរិះគន់គម្រោងសា្រវជ្រាវកូវីដ១៩ របស់រដ្ឋាភិបាលនិងសកលវិទ្យាល័យឥណ្ឌូណេស៊ីមួយ ថាមិនត្រូវស្តង់ដារវិទ្យាសាស្ត្រអន្តរជាតិទេ។ ស្ថានទូតឥណ្ឌូណេស៊ីប្រចាំទីក្រុងកង់បេរ៉ា (អូស្ត្រាលី) ក៏បានធ្វើការរិះគន់សារព័ត៌មានអូស្ត្រាលីមួយដែលកាលពីសប្តាហ៍មុនបានចុះផ្សាយសម្រង់អត្ថបទថាបើសាស្ត្រាចារ្យ ប៉ង់ឌូ រីអូណូ ចំនួនអ្នកឆ្លងកូវីដនៅឥណ្ឌូណេស៊ីមានដល់១លាននាក់ ពោលគឺច្រើនជាងតួលេខផ្លូវការដល់ទៅ៦ដង។
បើតាមតុល្យការផ្លូវការ ឥណ្ឌូណេស៊ី មានអ្នកឆ្លងកូវីដប្រមណជាង១៥ម៉ឺនករណីនិងស្លាប់ចំនួន៦៧៥៩នាក់។ មានប្រជាជនសរុបជាង២៧០លាននាក់ ឥណ្ឌូណេស៊ីជាប្រទេសរងគ្រោះកូវីដ១៩ខ្លាំងគេមួយប្រចាំតំបន់អាស៊ីអាគ្នេយ៍ ហើយរដ្ឋាភិបាលក៏រងការរិះគន់ខ្លាំងជាងបំផុតដែរចំពោះចំណាត់ការទប់ទល់ជំងឺរាតត្បាតថ្មីនេះ។
ក្នុងពេលភ្លាមៗនេះ គេមិនអាចកំណត់អត្តសញ្ញាណរបស់ជនដៃដល់ដែលដឹកនាំធ្វើការវាយប្រហារព័ត៌មានវិទ្យានេះទេ។ ប៉ូលិសនិងភ្នាក់ងារចារកិច្ចជាតិ ក៏មិនព្រមផ្តល់ចម្លើយអ្វីមកកាន់ភ្នាក់ងារសារព័ត៌មានបារាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ