ក្រុមហ៊ុនអាកាសចរណ៍ចិនមិនសូវខាតបង់ ដោយសារកំណើនទីផ្សារក្នុងស្រុក
ក្រុមហ៊ុនអាកាសចរណ៍ចិនជាទូទៅ រងការខាតបង់តិចតួច នៅត្រីមាសទីពីរ ជាងកាលពីត្រីមាសទីមួយ។ ទាំងនេះ គឺដោយសារតែចិនអាចលុបបំបាត់ជំងឺកូវីដ១៩បានស្ទើរតែទាំងស្រុង ដែលជាហេតុជំរុញឱ្យទីផ្សារចរាចរណ៍ផ្លូវអាកាសក្នុងស្រុក ចាប់ផ្តើមមានកំណើនឡើងវិញខ្លាំងគួរកត់សម្គាល់។
ចុះផ្សាយនៅថ្ងៃ៖
ស្តាប់ - ០២:១១
ចិនជាប្រទេសរងគ្រោះកូវីដ១៩មុនគេ និងព្រួយបារម្ភ ហើយបិទខ្ទប់កាត់បន្ថយចរាចរណ៍ហោះហើរអន្តរជាតិមុនគេ និងយ៉ាងច្រើន។ ប៉ុន្តែ ការរាតត្បាតបានបន្ថយល្បឿនយ៉ាងខ្លាំង នៅក្នុងដែនដីចិន ស្ទើរតែគ្មានកូវីដ១៩មួយករណីសោះ គិតចាប់តាំងពីពាក់កណ្តាលខែឧសភាមក។ ស្ថានភាពសុខភាពប្រសើរឡើង ទេសចរណ៍និងបំលាស់ទីការងារ ក្នុងស្រុក ក៏ចាប់រើបសកម្មភាពឡើងវិញដែរ។ ក្រុមហ៊ុនអាកាសចរណ៍ចិននីមួយៗ សម្គាល់ឃើញការខាតបង់របស់ខ្លួនរួមតូចទៅៗ។
China Southern Airlines ដែលជាក្រុមហ៊ុនធំជាងគេបង្អស់របស់ចិន បើគិតអំពីចំនួនអ្នកដំណើរ បានខាតបង់អស់តែប្រមាណ ២៩០០លានយ័នតែប៉ុណ្ណោះ នៅរវាងពីខែមេសា-មិថុនា ទល់នឹង៥៣០០លានយ័នកាលពីមករា-មីនា។ បើតាមសេចក្តីថ្លែងការណ៍របស់ក្រុមហ៊ុន ផ្ទុយពីឆមាសទីមួយនៃឆ្នាំ២០១៩ ដែលក្រុមហ៊ុនបានចំណេញ ១៦០០លានយ័ន នៅឆមាសទីមួយឆ្នាំ២០២០ ក្រុមហ៊ុនខាតបង់ជាសរុប អស់៥២០០លានយ័ន។
ចំណែកក្រុមហ៊ុនអាកាសចរណ៍ជាតិ Air Chinaវិញ ការខាតបង់នៅឆមាសទីមួយមានទំហំដល់ទៅ៩ពាន់លានយ័ន ប៉ុន្តែនៅត្រីមាសទីពីរ (៤៦០០លាន) ក្រុមហ៊ុនខាតបង់តិចជាងកាលពីត្រីមាសទីមួយ (៤៨០០លាន)។ China Eastern Airlines ដែលជាក្រុមហ៊ុនអាកាសចរណ៍ធំទីពីរ ក៏កត់ត្រាឃើញការខាតបង់នៅត្រីមាសទីពីរ (៣៩០០លានយ័ន) តិចជាងត្រីមាសទីមួយ (៤៦០០លាន) ដែរ។
ប៉ុន្តែគេត្រូវតាមដានបន្តទៀតសិន អំពីកំណើននៃការធ្វើដំណើរក្នុងស្រុក ព្រោះពេលនេះក្រុមហ៊ុនអាកាសចរណ៍ចិនប្រើនយោបាយបែបទាក់ទាញខ្លាំងណាស់។ ដើម្បីផ្តល់សន្ទុះដល់សកម្មភាពហោះហើរ ក្រុមហ៊ុនចិន បានបើកយុទ្ធនាការ “លក់សេវាដំណើរដោយសេរី”ជាកញ្ចប់។ យុទ្ធសាស្ត្របានធ្វើការហោះហើរក្នុងស្រុក មានសកម្មភាពស្ទើរដូចធម្មតាឡើងវិញរហូតដល់ខែកញ្ញា។ ជាក់ស្តែង នៅខែសីហា ការកក់សំបុត្រយន្តហោះបានឡើង ដល់ទៅ៩៨% នៃដំណើរការកាលពីឆ្នាំ២០១៩ គិតក្នុងរយៈពេលដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ