ឥណ្ឌូណេស៊ីថានាវាល្បាតចិនរំលោភចូលតំបន់សេដ្ឋកិច្ចផ្តាច់មុខខ្លួន
អាជ្ញាធរឥណ្ឌូណេស៊ី បានធ្វើការតវ៉ានៅថ្ងៃចន្ទទី ១៤កញ្ញា២០២០ ប្រឆាំងនឹងសកម្មភាពរបស់ឆ្មាំសមុទ្ទចិន ដែលបានរំលោភចូលតំបន់សេដ្ឋកិច្ចផ្តាច់មុខរបស់ឥណ្ឌូណេស៊ី។ បើតាមឥណ្ឌូណេស៊ី នាវាល្បាតចិន បានរំលោភចូលក្នុងដែនទឹកឥណ្ឌូណេស៊ី កាលពីថ្ងៃសៅរ៍ និងទើបបើកចេញទៅវិញ នៅថ្ងៃចន្ទនេះតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នាវាចិនពាក់ផ្លាកលេខ CCG៥២០៤ បានចូលមកកៀកនឹងតំបន់ប្រជុំកោះ ណាទូណា Natuna ក្នុងសមុទ្ទចិនខាងត្បូង ដែលជាតំបន់សេដ្ឋកិច្ចផ្តាច់មុខរបស់ឥណ្ឌូណេស៊ី មានន័យថា ជាតំបន់ដែលស្ថិតនៅចន្លោះពីដែនទឹកអន្តរជាតិនិងដែនទឹកជាតិ និងដែលរដ្ឋឥណ្ឌូណេស៊ីមានសិទ្ធិផ្តាច់មុខធ្វើផលិតកម្មធនធានធម្មជាតិតែម្នាក់ឯង។
ភ្នាក់ងារសន្តិសុខផ្លូវទឹកឥណ្ឌូណេស៊ី បានអះអាងថាបានទាក់ទងប្រាប់នាវាចិននោះដែរ តែភាគីចិនបានឆ្លើយតបមកវិញថាពួកគេកំពុងបំពេញសកម្មភាពល្បាត ក្នុងតំបន់ “៩គំនូស”។ តំបន់៩គំនូស ជាតំបន់គ្មានការបែងព្រំដែនខណ្ឌចែកសមុទ្ទចិនខាងត្បូងដែលចិនទាមទារនិងចាត់ទុកជាបូរណភាពរបស់ខ្លួន តែប្រទេសជិតខាងជំទាស់។
ឥណ្ឌូណេស៊ីផ្ទាល់ ក៏មិនទទួលស្គាល់ បន្ទាត់ព្រំដែន “៩គំនូស” នេះដែរ ដោយយល់ថាវាផ្ទុយពីអនុសញ្ញារបស់អង្គការសហប្រជាជាតិស្តីពីច្បាប់សមុទ្ទ។ ក្រសួងការបរទេសឥណ្ឌូណេស៊ី បានសេចក្តីថ្លែងការណ៍រំលឹកថា តំបន់សេដ្ឋកិច្ចផ្តាច់មុខឥណ្ឌូណេស៊ី និងតំបន់ដែនទឹកចិន មិនគងគ្នាទេ។
គ្រាន់តែកើតមានឧប្បត្តិហេតុនាវាឆ្មាំសមុទ្ទចិនរំលោភចូលដែនទឹកខ្លួនភ្លាម ឥណ្ឌូណេស៊ីបានទាក់ទងទៅតំណាងការទូតចិនប្រចាំទីក្រុងហ្សាការតាភ្លាម និងបានសុំឱ្យចិនធ្វើការបំភ្លឺ។ នេះបើតាមការគូសបញ្ជាក់របស់អ្នកនាំពាក្យក្រសួងការបរទេសឥណ្ឌូណេស៊ី។
សូមបញ្ជាក់ថា ឥណ្ឌូណេស៊ី ប្រទេសប្រជុំកោះដ៏ធំជាងគេនៅលើពិភពលោក ចំណាយកម្លាំងការពារដែនទឹកខ្លាំងណាស់ ព្រោះមាននាវាបរទេសជាច្រើនបានឆ្លងនិងរំលោភចូលមកនេសាទ និងដែលបានធ្វើឱ្យឥណ្ឌូណេស៊ីខាតបង់អស់រាប់សិបពាន់លានដុល្លារក្នុងមួយឆ្នាំៗ។
កាលពីខែមករា ហ្សាការតា បានបញ្ជូនយន្តហោះប្រដេញទៅឆ្វែលការពារតំបន់សេដ្ឋកិច្ចផ្តាច់មុខរបស់ខ្លួន បន្ទាប់ពីមានទូកនេសាទចិនជាច្រើនអបការពារដោយនាវាល្បាតផង រំលោភចូល។
ក្រៅពីឥណ្ឌូណេស៊ី ប្រទេសជិតខាងផ្សេងទៀត ដូចជា ម៉ាឡេស៊ី វៀតណាម ហ្វីលីពីន តៃវ៉ាន់ ... ក៏តែងតវ៉ាប្រឆាំងនឹងចិនដែលចង់បានសមុទ្ទចិនខាងត្បូងទាំងមូល និងម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ