អាមេរិកដករដ្ឋមន្ត្រីការពារជាតិឥណ្ឌូណេស៊ីចេញពីបញ្ជីខ្មៅ ដើម្បីទប់ឥទ្ធិពលចិន ?
សហរដ្ឋអាមេរិកបានអញ្ជើញរដ្ឋមន្ត្រីក្រសួងការពារជាតិ លោកប្រាបូវូ ស៊ូប៊ីយ៉ានតូ(Prabowo Subianto) ដែលជាអតីតឧត្តមសេនីយ៍ក្នុងរបបផ្តាច់ការស៊ូហាតូ ឱ្យទៅបំពេញទស្សនកិច្ចនៅទីក្រុងវ៉ាស៊ីនតោន។ នេះបើតាមការគូសបញ្ជាក់របស់អ្នកនាំពាក្យក្រសួងការពារជាតិឥណ្ឌូណេស៊ី។ សេចក្តីអញ្ជើញបែបនេះ មានន័យស្មើនឹងការលុបឈ្មោះ លោក ប្រាបូវូ ស៊ូប៊ីយ៉ានតូ ចេញពីបញ្ជីខ្មៅជាប់ទណ្ឌកម្មអាមេរិក។ អង្គការការពារសិទ្ធិមនុស្សបានចាត់ទុកសេចក្តីសម្រេចរបស់អាមេរិកថាជាមហន្តរាយសិទ្ធិមនុស្សនៅ ឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ជាអតីតកូនប្រសាររបស់មេដឹកនាំផ្តាច់ការស៊ូហាតូ លោក ប្រាបូវូ ស៊ូប៊ីយ៉ានតូ ដែលបច្ចុប្បន្នជារដ្ឋមន្ត្រីក្រសួងការពារជាតិ បានជាប់បម្រាមអាមេរិក មិនអាចសុំទិដ្ឋាការចូលជាន់ទឹកដីសហរដ្ឋបានតាំងពី២០០០មក។ នេះបើតាមប្រភពសារព័ត៌មានឥណ្ឌូណេស៊ី។
លោក ប្រាបូវូ ស៊ូប៊ីយ៉ានតូ បានក្លាយជាជនដែលសហរដ្ឋអាមេរិកជាមិនស្វាគមន៍ ព្រោះអតីតឧត្តមសេនីយ៍រូបនេះ ធ្លាប់ជាមេបញ្ជាការកងទ័ពពិសេស Kopassus ដែលបានចាប់ជំរិតសកម្មជនប្រជាធិបតេយ្យជាច្រើនរូប ក្នុងសម័យដឹកនាំផ្តាច់ការស៊ូហាតូ។ សកម្មជនប្រជាធិបតេយ្យភាគច្រើនបាត់ខ្លួនរហូតមកទល់នឹងសព្វថ្ងៃ។
មិនតែប៉ុណ្ណោះ លោក ស៊ូប៊ីយ៉ានតូ បានជាប់ចោទពីសំណាក់អង្គការក្រៅរដ្ឋាភិបាល ពីបទបានរំលោភបំពាន បង្ក្រាបយ៉ាងហិង្សា ការតស៊ូទាមទារឯករាជ្យរបស់ពលរដ្ឋទីម័រខាងកើត ទៀត។
ប៉ុន្តែថ្ងៃនេះ សហរដ្ឋអាមេរិកបានលើកបម្រាមប្រឆាំងនឹងលោក ស៊ូប៊ីយ៉ានតូ ចេញ និងបានអញ្ជើញលោកទៅបំពេញទស្សនកិច្ចនៅទីក្រុងវ៉ាស៊ីនតោន ពីថ្ងៃទី ១៥-១៩តុលាខាងមុខ។ កម្មវត្ថុនៃទស្សនកិច្ច គឺដើម្បីជជែកអំពីកិច្ចសហប្រតិបត្តិការយោធា និងកិច្ចសហប្រតិបត្តិការទូទៅអាមេរិក-ឥណ្ឌូណេស៊ី។ ស្ថានឯកអគ្គរដ្ឋទូតអាមេរិកប្រចាំទីក្រុងហ្សាការតា បដិសេធមិនធ្វើអត្ថាធិប្បាយទាំងអស់ជុំវិញសំណុំរឿង ដោយសំអាងថាជារឿងសម្ងាត់ជាតិស្តីពីទិដ្ឋាការ។
អង្គការការពារសិទ្ធិមនុស្ស Amnesty International បានបញ្ចេញប្រតិកម្មថ្កោលទោសសហរដ្ឋអាមេរិក ដោយគ្មានបង្អង់ថា មិនមែនមានឈ្មោះជារដ្ឋមន្ត្រីក្រសួងការពារជាតិ ធ្វើដំណើរទៅណាដោយគ្មានទិដ្ឋាការឡើយ។ ហើយការផ្តល់ទិដ្ឋាការដោយគ្មានដាក់លក្ខខណ្ឌត្រឹមត្រូវ ច្បាស់លាស់ជាមុន គឺជាសេចក្តីសម្រេចចិត្តប្រកបដោយមហន្តរាយ និងជាការបំផ្លាញសិទ្ធិមនុស្សនៅឥណ្ឌូណេស៊ី។
សូមបញ្ជាក់ថា បន្ទាប់បានឈរឈ្មោះជាបេក្ខជនប្រធានាធិបតីជាច្រើនលើកច្រើនសាមក លោក ស៊ូប៊ីយ៉ានតូ បានក្លាយជារដ្ឋមន្ត្រីការពារជាតិ កាលពីឆ្នាំទៅ។ ជាអ្នកអភិរក្ស និងជាតិនិយមខ្លាំង មានជំហរការពារតែប្រយោជន៍ជាតិឯងដូចលោកដូណាល់ ត្រាំ លោករដ្ឋមន្ត្រី ស៊ូប៊ីយ៉ានតូ បានសកម្មធ្វើដំណើរទៅកាន់ប្រទេសជាច្រើន ដើម្បីចរចារកកិច្ចសន្យាទិញសព្វាវុធ មកពង្រឹងវិស័យការពារជាតិ។ ថ្មីៗនេះ សហរដ្ឋអាមេរិក ទើបបានលើកទឹកចិត្តឱ្យឥណ្ឌណេស៊ីធ្វើយ៉ាងណាប្រយុទ្ធប្រឆាំងនឹងឥទ្ធិពលរដ្ឋចិននៅក្នុងតំបន់ ប៉ុន្តែឥណ្ឌូណេស៊ីបានទប់ជំហរមិនចង់មានចំណែកក្នុងជម្លោះប្រកួតប្រជែករវាងមហាយក្សសេដ្ឋកិច្ចទាំងពីរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ