ឥណ្ឌូណេស៊ី ទិញវ៉ាក់សាំងការពារកូវីដ១៩ ចំនួន១០០លានដូស ពីមន្ទីរពិសោធន៍AstraZeneca
លោកស្រី រ៉េតណូ ម៉ារស៊ូឌី រដ្ឋមន្ត្រីក្រសួងការបរទេសឥណ្ឌូណេស៊ី បានមកដល់ទីក្រុងឡុងដ៍ ប្រទេសអង់គ្លេស កាលពីថ្ងៃពុធ ទី១៤តុលា ដើម្បីចុះហត្ថលេខា ទិញថ្នាំវ៉ាក់សាំងប្រឆាំងជម្ងឺកូវីដ១៩ ពីមន្ទីរពិសោធន៍ AstraZeneca ចំនួន១០០លានដូស។ ឆ្លៀតក្នុងឱកាសនោះ លោកស្រីក៏បានលើកឡើងផងដែរ ថាប្រទេសឥណ្ឌូណេស៊ី សូមអំពាវនាវឲ្យ ការលក់ថ្នាំវ៉ាក់សាំងកូវីដ១៩ ត្រូវតែធ្វើឲ្យបានស្មើភាពគ្នា ទៅឲ្យប្រទេសក្រីក្រ ប្រទេសកំពុងអភិវឌ្ឍន៍ មិនមែនប្រទេសអ្នកមាន ប្រមូលទិញផ្តាច់មុខ តែម្នាក់ឯងនោះទេ។
ចុះផ្សាយនៅថ្ងៃ៖
ស្តាប់ - ០២:៥៧
ឥណ្ឌូណេស៊ី នឹងទទួលបានវ៉ាក់សាំងប្រឆាំងកូវីដ១៩ ចំនួន១០០លានដូស ពីមន្ទីរពិសោធន៍ AstraZeneca របស់អង់គ្លេស។ លោកស្រី រ៉េតណូ ម៉ារស៊ូឌី រដ្ឋមន្ត្រីក្រសួងការបរទេសឥណ្ឌូណេស៊ី បានបញ្ជាក់បន្ថែមថា នៅរវាងដើមឆ្នាំ២០២១ មន្ទីរពិសោធន៍ AstraZeneca នឹងចាប់ផ្តើមប្រគល់វ៉ាក់សាំង ដែលផលិតបាន បន្តិចម្តងៗ ជាច្រើនដំណាក់កាល។ ចេញពីទីក្រុងឡុងដ៍ លោកស្រីប្រមុខការទូតឥណ្ឌូណេស៊ី ត្រូវធ្វើដំណើរទៅកាន់អង្គការសុខភាពពិភពលោក នៅទីក្រុងហ្សឺណែវ ដើម្បីជម្រុញឲ្យឥណ្ឌូណេស៊ី មានឈ្មោះក្នុងកម្មវិធី សហភាគីគ្រប់គ្រងការបែងចែកវ៉ាក់សាំងប្រឆាំងកូវីដ១៩ (Covax)។
ថ្លែងនៅក្នុងបទសម្ភាសន៍ ជាមួយអ្នកយកព័ត៌មានបារាំងAFP លោកស្រីរដ្ឋមន្ត្រីការបរទេសឥណ្ឌូណេស៊ី បានលើកឡើងផងដែរថា ការលក់និងចែកចាយថ្នាំវ៉ាក់សាំងប្រឆាំងកូវីដ១៩នេះ ត្រូវតែធ្វើឲ្យមានសមភាព និងយុត្តិធម៌ សម្រាប់ប្រទេសទាំងអស់ មិនថាប្រទេសអ្នកមាន ឬប្រទេសកំពុងអភិវឌ្ឍន៍ឡើយ។ ពោលគឺដើម្បីធានា ឲ្យប្រទេសក្រីក្រ ក៏អាចមានលទ្ធភាពជាវថ្នាំវ៉ាក់សាំងនេះ ក្នុងតម្លៃថោកសមរម្យ។ ការថ្លែងដូចនេះ គឺបន្ទាប់ពីមានការចុះផ្សាយ របស់អង្គការ Oxfam ដែលបានអះអាងថា ប្រទេសអ្នកមាន ដែលមានប្រជាជនត្រឹមប្រមាណ១៣%នៃពិភពលោក បានកក់បញ្ជាទិញ ថ្នាំវ៉ាក់សាំងប្រឆាំងកូវីដ១៩ អស់ចំនួនពាក់កណ្តាលបាត់ទៅហើយ។
គួរបញ្ជាក់ថា ឥណ្ឌូណេស៊ីមានប្រជាជនប្រមាណ២៧០លាននាក់ ពោលគឺជាប្រទេសលំដាប់ទី៤ ដែលមានប្រជាជនច្រើនជាងគេបង្អស់។ ក្នុងចំណោមប្រទេសអាស៊ីអាគ្នេយ៍ ឥណ្ឌូណេស៊ី ក៏ជាប្រទេសដែលរងគ្រោះធ្ងន់ជាងគេដែរ ដោយសារជំងឺកូវីដ១៩ដែរ ដោយមានអ្នកឆ្លងសរុបប្រមាណ៣៤ម៉ឺននាក់ ក្នុងនោះមានស្លាប់ ១២០០០នាក់។ តួលេខនេះ អាចទាបជាងការពិតជាក់ស្តែងផង បើយោងតាមការវិភាគ របស់អ្នកជំនាញខ្លះ។
ប្រឈមនឹងបញ្ហានេះ រដ្ឋាភិបាលឥណ្ឌូណេស៊ី បានស្វះស្វែងគ្រប់ផ្លូវ ដើម្បីទទួលបានថ្នាំវ៉ាក់សាំង ក្នុងចំនួនច្រើន សមមាត្រទៅនឹងចំនួនប្រជាជនខ្លួន បើទោះបីដឹងថា ប្រទេសអ្នកមានៗ បានសម្រុកប្រមូលកក់ទុក សឹងអស់ទៅហើយ។ កាលពីខែសីហា ឥណ្ឌូណេស៊ីបានធ្វើការសាកល្បង ថ្នាំវ៉ាក់សាំងរបស់ចិន ផលិតដោយមន្ទីរពិសោធន៍ Sinovac Biotech ទៅលើមនុស្ស១៦០០នាក់។ រដ្ឋាភិបាលឥណ្ឌូណេស៊ី អះអាងថា បើសិនបានលទ្ធផលល្អ ឥណ្ឌូណេស៊ីនឹងចាប់ផ្តើមផលិតថ្នាំវ៉ាក់សាំងរបស់ចិននេះ នៅក្នុងប្រទេសខ្លួនតែម្តង។
ដោយឡែក រដ្ឋាភិបាលថៃ ក៏បានប្រកាសឲ្យដឹងកាលពីពេលថ្មីៗនេះ ថាខ្លួនបានចុះកិច្ចព្រមព្រៀង ជាមួយមន្ទីរពិសោធន៍ AstraZeneca ដើម្បីទទួលបានសិទ្ធិផលិតថ្នាំវ៉ាក់សាំងការពារកូវីដ១៩។ ក្រុមហ៊ុនផលិតឱសថថៃឈ្មោះ Siam Bioscience គឺជាអ្នកផលិតអនាគតវ៉ាក់សាំងនេះ ដើម្បីចែកចាយក្នុងប្រទេសថៃ និងប្រទេសក្នុងតំបន់អាស៊ីអាគ្នេយ៍ នៅរវាងពាក់កណ្តាលឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ