អាហ្វហ្កានីស្ថាន ថាបានសម្លាប់មេដឹកនាំភេរវជនអាល់កៃដា លំដាប់លេខ២
អាហ្វហ្កានីស្ថាន បានប្រកាសថ្ងៃចុងសប្តាហ៍នេះ ថា ប៉ូលីសស៊ើបការសម្ងាត់អាហ្វហ្កានីស្ថាន បានធ្វើប្រតិបត្តិការសម្លាប់មេដឹកនាំកំពូលម្នាក់ នៃក្រុមភេរវជនអាល់កៃដា។ មេដឹកនាំកំពូលក្រុមអាល់កៃដារូបនេះ ក៏ជាមនុស្សដែលឋិតក្នុងបញ្ជីខ្មៅ របស់ប៉ូលីស FBI អាមេរិកដែរ។ បុរសរូបនេះ ត្រូវនគរបាលអាមេរិកFBI ស្វែងរកតាមចាប់ខ្លួន តាំងតែពីឆ្នាំ២០១៨មកម្ល៉េះ។ ប៉ូលីសសម្ងាត់អាមេរិក CIA ក៏ចង់កម្ទេចជននេះចោលដែរ ព្រោះតែយល់ថា រូបគេនេះ ជាអ្នកនៅពីក្រោយអំពើភេរវកម្ម និងជាអ្នកជ្រោមជ្រែងភេរវកម្ម នាំឱ្យមានការស្លាប់ពលរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៤៣
មេដឹកនាំកំពូលក្រុមអាល់កៃដារូបនេះឈ្មោះ Abou Muhsin al-Masri ជាភេរវជន ដើមកំណើតជាតិអេហ្សីប ត្រូវប៉ូលីសស៊ើបការសម្ងាត់អាហ្វហ្គានីស្ថាន សម្លាប់ ខណៈពេលដែលរូបគេកំពុងសំងំលាក់ខ្លួន នៅក្នុងខេត្តមួយ ភាគខាងកើតប្រទេសអាហ្វហ្កានីស្ថាន។ នេះបើតាមមន្ត្រីនៃនគរបាលពិសេសអាហ្វហ្កានីស្ថាន ដែលប្រាប់ទីភ្នាក់សារព័ត៌មានបារាំង AFP ដោយសុំមិនបញ្ចេញឈ្មោះ។
រដ្ឋមន្ត្រីក្រសួងមហាផ្ទៃអាហ្វហ្កានីស្តាន ក៏បានអះអាងពីដំណឹងសម្លាប់មេភេរវជននេះដែរ តែមិនបានប្រាប់លម្អិតពីប្រតិបត្តិការថាប្រព្រឹត្តទៅយ៉ាងដូចម្តេចនោះទេ។ ក៏ប៉ុន្តែ លោករដ្ឋមន្ត្រីមហាផ្ទៃ Masoud Andarabi បញ្ជាក់ថា ក្នុងប្រត្តិបត្តិការកម្ចាត់ក្រុមភេរវជននេះ ប៉ូលីសសម្ងាត់បានចាប់ខ្លួនអ្នកជំនួយការម្នាក់របស់មេអាល់កៃដាដែលស្លាប់នោះ។ តាមរយៈជំនួយការរូបនេះហើយដែលធ្វើឱ្យគេបានដឹងថា ក្រុមអាល់ដៃកា មានទំនាក់ទំនងជាមួយនឹងពួកឧទ្ទាម តាលីបង់។
ដំណឹងនេះ ធ្វើឱ្យគេភ្ញាក់ផ្អើលខ្លាំង ព្រោះវាជួនចំពេលដែល រដ្ឋាភិបាលអាហ្វហ្កានីស្តាន បាននិងកំពុងចរចាសន្តិភាពជាមួយពួកតាលីបង់។ គឺជាការចរចាតាមគម្រោងគូសវាសដោយសហរដ្ឋអាមេរិក។ អាមេរិក ដែលលង់ផុងក្នុងសង្គ្រាមនៅអាហ្វហ្កានីស្ថាន តាំងតែពីព្រឹត្តិការណ៍ថ្ងៃទី១១កញ្ញា២០០១មក។ សហរដ្ឋអាមេរិក ជាច្រើនខែមកនេះ បានផ្ចុងផ្តើមឱ្យ ពួកតាលីបង់ ចរចាសម្រុះសម្រួលគ្នាជាមួយនឹងរដ្ឋាភិបាលអាហ្វហ្គានីស្ថាន រួចហើយ អាមេរិក នឹងដកកងទ័ពខ្លួនជាបន្តបន្ទាប់។
ដូចនេះ ព័ត៌មានដែលថា ពួកអាល់កៃដា ទាក់ទងនឹងពួកតាលីបង់ គឺហាក់ជាសញ្ញាមិនសូវស្រួលសោះចំពោះកិច្ចការចរចាសន្តិភាព ដែលហាក់កំពុងតែផុយស្រួយស្រាប់ផង។
អ្វីកាន់តែដុនដាបមួយជាន់ទៀត គឺដំណាលពេលដែលរដ្ឋាភិបាលអាហ្វហ្កានីស្ថាន ប្រកាសពីការសម្លាប់បានមេដឹកនាំអាល់កៃដា គឺពួកជីហាតបានធ្វើភេរវកម្មអត្តឃាត នៅសាលារៀនមួយកន្លែង ដែលមានកូនសិស្សប្រមាណ៨០០នាក់ នៅរដ្ឋធានីកាប៊ូល នាថ្ងៃសៅរ៍។ ថ្ងៃអាទិត្យ ទី២៥តុលា អាជ្ញាធរបញ្ជាក់មនុស្សយ៉ាង២៤នាក់ស្លាប់ ហើយរបួសជាច្រើននាក់។ ពួកភេរវជននៃក្រុមអង្គការរដ្ឋអ៊ីស្លាមជីហាត បានប្រកាសថា អំពើភេរវកម្មនេះ ជាស្នាដៃខ្លួន។
មកទល់ពេលនេះ គេកំពុងតែសង្ស័យថាតើក្រុមភេរវជននិងក្រុមឧទ្ទាម ទាំងបីក្រុម គឺតាលីបង់ អាល់កៃដា និងពួកជីហាត មានទំនាក់ទំនងយ៉ាងណាជាមួយគ្នា នៅលើដែនដីអាហ្វាហ្កានីស្ថាន?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ