យន្តហោះ ប៊ូអ៊ីង ៧៣៧ របស់ក្រុមហ៊ុនហោះហើរឥណ្ឌូណេស៊ីត្រូវគេសង្ស័យថា ធ្លាក់ ទៅក្នុងសមុទ្រ
យន្តហោះរបស់ក្រុមហ៊ុនក្នុងស្រុកឥណ្ឌូណេស៊ីមួយគ្រឿង ឈ្មោះ Sriwijaya Air ដែលមានដឹកមនុស្ស ៦២នាក់ បានបាត់ខ្លួនពីរ៉ាដា នៅក្រោយហោះចេញពីទីក្រុងហ្សាកាតា កាលពី រសៀលថ្ងៃសៅរ៍ម្សិលមិញ ។ អាជ្ញាធរឥណ្ឌូណេស៊ីដែលបារម្ភខ្លាចថា យន្តហោះ ប៊ូអ៊ីង ៧៣៧ ធ្លាក់ចូលទៅក្នុងទឹកសមុទ្រ បានបញ្ជូនកប៉ាល់ ចម្បាំង និងអ្នកមុជទឹកទៅក្នុងតំបន់ទឹក ជាទីយន្តហោះ បានបាត់សញ្ញាពីរ៉ាដារបស់អគារ ត្រួតពិនិត្យអាកាសចរណ៍ឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះប៊ូអ៊ីង ៧៣៧ របស់ក្រុមហ៊ុនឥណ្ឌូណេស៊ីSriwijaya Air ដែលមានដឹកអ្នកដំណើរ ៥០នាក់ និងបុគ្គលិកលើយន្តហោះ ១២នាក់ បានបាត់ខ្លួនពីរ៉ាដា នៅក្រោយហោះចេញពីទីក្រុងហ្សាកាតា បាន៤នាទី។
យន្តហោះរបស់ក្រុមហ៊ុនអាកាសចរណ៍ Sriwijaya Air បានហោះចេញពីទីក្រុងហ្សាកាតា នៅពេលរសៀលសំដៅ ទីក្រុង Pontianak របស់កោះបរណេអូ ដោយហោះកាត់សមុទ្រកោះ១ពាន់ ក្បែរក្រុងហ្សាកាតា។ ប៉ុន្តែ តាមទិន្នន័យរបស់វិបសៃតិ៍ ឈ្មោះ FlightRadar 24 បន្ទាប់ពី ហោះបាន៤នាទី ដល់កំពស់ ជាង ៣ពាន់ម៉ែត្រ យន្តហោះ ស្រាប់បានធ្លាក់ចុះកំពស់ មកត្រឹម ៧៦ម៉ែត្រពីដី ក្នុងរយៈពេល១នាទី ហើយនិងបានបាត់ខ្លួនពីរ៉ាដា។
តាមអ្នកនាំពាក្យរបស់ក្រសួងដឹកជញ្ជូនឥណ្ឌូណេស៊ី អ្នកធ្វើដំណើរទាំងអស់ជាជនជាតិឥណ្ឌូណេស៊ី។ នៅល្ងាចថ្ងៃសៅរ៍ ក្រុមជួយសង្រ្គោះបន្ទាន់ រួមទាំងកប៉ាល់ចម្បាំង ជាច្រើនត្រូវបានបញ្ជូនទៅកាន់តំបន់ដែលយន្តហោះបានបាត់ខ្លួនពីរ៉ាដា។ នៅល្ងាចថ្ងៃសៅរ៍ ដដែល ទូរទស្សន៍ក្នុងស្រុកឥណ្ឌូណេស៊ីបានដកស្រង់សំដីរបស់អ្នកនេសាទដែលអះអាងថា ពួកគេបានរកឃើញ បំណែកយន្តហោះ នៅក្បែរឆ្នេរ ហ្សាកាតា ប៉ុន្តែ អាជ្ញាធរឥណ្ឌូណេស៊ី ក៏ដូចជា ក្រុមហ៊ុន Sriwijaya Air នៅមិនទាន់អះអាង ព័ត៌មានជាផ្លូវការណាមួយទាក់ទងនឹងបំណែកយន្តហោះ ដែលអ្នកនេសាទរកឃើញនោះទេ។
នៅ ក្នុងសន្និសីទ កាសែត កាលពី ថ្ងៃសៅរ៍ ប្រធានក្រុមហ៊ុន អាកាសចរណ៍ Sriwijaya Airបានអះអាងថា ក្រុមហ៊ុនកំពុងស៊ើបអង្កេត និងថា យន្តហោះ ប៊ូអ៊ីង ៧៣៧ មានលក្ខខណ្ឌល្អ ប្រសើរ នៅមុនពេលហោះចេញពីអាកាសយានដ្ឋាន។
តាមវិបសៃតិ៍របស់ FlightRadar 24 យន្តហោះដែលបានខ្លួន មានអាយុ ២៦ឆ្នាំ។ ក្រុមហ៊ុន Sriwijaya Air ជាក្រុមហ៊ុនហោះហើរធុនថោក Low cost ធំទី៣ នៅ ឥណ្ឌូណេស៊ី។ ក្នុងមួយសប្តាហ៍ៗ ក្រុមហ៊ុន Sriwijaya Airដឹកអ្នកដំណើរជាង ៩សែននាក់ ទៅកាន់ទិសដៅចំនួន ៥៨ នៅឥណ្ឌូណេស៊ី និងទៅកាន់ ៣ទិសដៅ នៅប្រទេសក្នុងតំបន់។
គ្រោះថ្នាក់ធ្លាក់យន្តហោះនៅថ្ងៃសៅរ៍ ជាមហន្តរាយថ្មីមួយសម្រាប់ឧស្សាហកម្មហោះហើររបស់ឥណ្ឌូណេស៊ី ដែលឧស្សាហ៍ជួបប្រទះ គ្រោះថ្នាក់ ធ្លាក់យន្តហោះ នៅ ប៉ុន្មានឆ្នាំចុងក្រោយនេះ។ នៅឆ្នាំ ២០១៨ យន្តហោះប៊ូអ៊ីងរបស់ក្រុមហ៊ុន Lion Air ដែលដឹកអ្នកដំណើរ និងបុគ្គលិកយន្តហោះ ចំនួន ១៨៩នាក់ បានធ្លាក់ ផ្ទុះក្នុងសមុទ្រ បន្ទាប់ពីហោះបាន១២នាទី។ នៅឆ្នាំ ២០១៤ យន្តហោះរបស់ក្រុមហ៊ុន Air Asia ហោះពីឥណ្ឌូណេស៊ី ទៅ សិង្ហបុរី បានផ្ទុះធ្លាក់សម្លាប់មនុស្ស១៦២នាក់។ ក្រុមស៊ើបអង្កេតសន្និដ្ឋាន ថា គឺកំហុសរបស់មនុស្ស និងបញ្ហាបច្ចេកទេសដែលធ្វើឲ្យយន្តហោះធ្លាក់នៅ ឥណ្ឌូណេស៊ី។
ដោយសារបញ្ហា សុវត្ថិភាព និងអាយុកាលរបស់យន្តហោះ ក្រុមហ៊ុនហោះហើររបស់ឥណ្ឌូណេស៊ីមួយចំនួន ត្រូវបានអឺរ៉ុប និងអាមេរិក ដាក់ក្នុងបញ្ជីហាមឃាត់របស់ខ្លួន។
ក្រុមហ៊ុនហោះហើរ Sriwijaya Air ទើបតែត្រូវសហភាព អឺរ៉ុប ដកចេញពី បញ្ជីខ្មៅ នៅ ឆ្នាំ ២០១៨ បន្ទាប់ពីស្ថិតក្នុងបញ្ជីរបស់ក្រុមហ៊ុនហោះហើរ ដែលអឺរ៉ុបហាមឃាត់ អស់ រយៈពេល ១១ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ