កូវីដ ៖ ឥណ្ឌូណេស៊ី បើកយុទ្ធនាការចាក់ថ្នាំបង្ការ ប្រធានាធិបតីទទួលការចាក់ថ្នាំមុនគេ
ឥណ្ឌូណេស៊ី បានផ្តើមបើកយុទ្ធនាការចាក់ថ្នាំបង្ការប្រឆាំងនឹងជំងឺកូវីដ១៩ នៅថ្ងៃពុធទី ១៣មករា២០២១។ ជាយុទ្ធនាការទ្រង់ទ្រាយធំ ដែលឥណ្ឌូណេស៊ីគ្រោងចាក់ជូនពលរដ្ឋប្រមាណជាង១៨២លាននាក់ ក្នុងចំណោមប្រជាជនឥណ្ឌូណេស៊ីសរុបជិត២៧០លាននាក់។ លោកប្រធានាធិបតី ចូកូ វីដូដូ បានទទួលការចាក់ថ្នាំបង្ការមុនគេ និងបានអះអាងថាថ្នាំវ៉ាក់សាំងជាអាវុធកាត់ផ្តាច់ការចម្លង ជំងឺកូវីដ១៩ ដែលកំពុងធ្វើការរាតត្បាតយ៉ាងលឿនក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:០៩
“ជាការចាក់ថ្នាំបង្ការដ៏សំខាន់ដើម្បីកាត់ផ្តាច់ខ្សែចម្លងរបស់មេរោគកូរ៉ូណាដែលបង្កជំងឺកូវីដ១៩ និង ដើម្បីផ្តល់ការការពារសុខភាព និងផ្តល់សុវត្ថិភាពដល់ពលរដ្ឋឥណ្ឌូណេស៊ីគ្រប់រូប” នេះជាប្រសាសន៍របស់លោកប្រធានាធិបតីឥណ្ឌូណេស៊ី ចូកូ វីដូដូ ទៅកាន់អ្នកសារព័ត៌មាន នាឱកាសបើកយុទ្ធនាការចាក់ថ្នាំបង្ការជំងឺកូវីដ១៩ នៅវិមានប្រធានាធិបតី។
ពិធីចាក់ថ្នាំបង្ការជូនប្រធានាធិបតី ដែលមានអាយុ៥៩ឆ្នាំ ព្រមទាំងរដ្ឋមន្ត្រីក្រសួងសុខាភិបាល អ្នកទទួលខុសត្រូវនយោបាយ-សាសនា និងមេដឹកនាំក្រុមហ៊ុន ត្រូវបានផ្សាយបន្តផ្ទាល់តាមកញ្ចក់ទូរទស្សន៍ជាតិទៀតផង។
បុគ្គលិកសុខាភិបាល និងពលរដ្ឋក្រុមប្រឈម មានអាទិភាពទទួលថ្នាំបង្ការមុនគេ។ យុទ្ធនាការចាក់ថ្នាំបង្ការដែលមានរយៈពេល១៥ខែ អាចចាប់ផ្តើមបាន បន្ទាប់ពីភ្នាក់ងារគ្រប់គ្រងឱសថ បានផ្តល់ការយល់ព្រមឱ្យប្រើប្រាស់ថ្នាំបង្ការប្រឆាំងនឹងកូវីដ១៩ របស់ក្រុមហ៊ុនចិន Sinovac។
ប៉ុន្តែយុទ្ធនាការចាក់ថ្នាំបង្ការក្នុងប្រទេសកាន់សាសនាអ៊ីស្លាមដ៏ធំជាងគេនៅលើពិភពលោក កាន់តែត្រូវបានសម្រួលទៀត ដោយកាលពីសប្តាហ៍មុន អាជ្ញាធរសាសនាដ៏កំពូលនៅឥណ្ឌូណេស៊ី បានប្រកាសថាថ្នាំបង្ការប្រឆាំងកូវីដ១៩ របស់ក្រុមហ៊ុនចិន មានលក្ខណៈ Halal ពោលផលិតឡើងតាមក្បួនខ្នាតសាសនាអ៊ីស្លាម។ ថ្នាំបង្ការនេះ បានឆ្លងកាត់ការធ្វើតេស្តសាកល្បងទាំងបីដំណាក់កាលនៅក្នុងប្រទេសឥណ្ឌូណេស៊ី តែមានប្រសិទ្ធភាពត្រឹមតែ៦៥,៣% ប៉ុណ្ណោះ។
តាមគម្រោង ឥណ្ឌូណេស៊ី បានបញ្ជាទិញថ្នាំបង្ការកូវីដ១៩ ចំនួន ៣៣០លានដូស ក្នុងនោះ១២៥លានដូសជាថ្នាំរបស់ក្រុមហ៊ុនចិន Sinovac។ ហ្សាការតា ក៏បានចុះហត្ថលេខាសន្យាទិញថ្នាំវ៉ាក់សាំងរបស់ក្រុមហ៊ុនអង់គ្លេស AstraZeneca, Pfizer/BioNTech និងSinopharm តែក្នុងបរិមាណតិចតួច ហើយទើបទទួលបានប្រមាណមួយ-ពីរលានដូសប៉ុណ្ណោះ នៅពេលនេះ។
នៅទ្វីបអាស៊ី ឥណ្ឌូណេស៊ី ជាប្រទេសរងគ្រោះកូវីដ១៩ខ្លាំងជាងគេទីពីរ បន្ទាប់ពីឥណ្ឌា។ ជាផ្លូវការឥណ្ឌូណេស៊ីរាប់មានឃើញមានអ្នកស្លាប់ចំនួនជិត២៥០០០នាក់ និងឆ្លងជាង៨សែន៥ម៉ឺននាក់។ ប៉ុន្តែស្ថិតិនេះទំនងតិចជាងការពិតឆ្ងាយណាស់ព្រោះពុំសូវមានការធ្វើតេស្តទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ