មេក្លោងជួញដូរគ្រឿងញៀននៅអាស៊ី ត្រូវនគរបាលចាប់ខ្លួននៅអាំស្ទែរដាំ
បុរសម្នាក់ដែលគេសង្ស័យថា ជាមេក្លោងជួញដូរគ្រឿងញៀនដ៏ធំបំផុត នៅតំបន់អាស៊ីអាគ្នេយ៍ ត្រូវបាននគរបាលហូឡង់ ចាប់ខ្លួននៅក្រុងអាំស្ទែរដាំ កាលពីថ្ងៃសុក្រទី២២មករា។ អាជ្ញាធរអូស្រ្តាលី ដែលបានតាមចាប់ជននេះ ជាច្រើនឆ្នាំមកហើយ បានជូនដំណឹងនៅថ្ងៃអាទិត្យនេះថា គេបានស្នើសុំឲ្យអាជ្ញាធរហូឡង់ ប្រគល់ខ្លួនជននេះមកឲ្យអូស្ត្រាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជនឈ្មោះ Tse Chi Lop អាយុ៥៧ឆ្នាំ មានដើមកំណើតចិន កាន់លិខិតឆ្លងដែនកាណាដា ត្រូវបាននគរបាលហូឡង់ ចាប់ខ្លួននៅព្រលានយន្តហោះ Schipol ក្រុងអាំស្ទែរដាំ កាលពីថ្ងៃទី២២មករា។
ការិយាល័យប្រយុទ្ធប្រឆាំងគ្រឿងញៀន និងឧក្រិដ្ឋកម្ម នៃអង្គការសហប្រជាជាតិ បានចាត់ទុកជននេះថា គឺជាមេក្លោងនៃបណ្តាញជួញដូរគ្រឿងញៀនដ៏ធំបំផុត នៅតំបន់អាស៊ីគ្នេយ៍។ បណ្តាញឧក្រិដ្ឋដ៏ធំនេះ ឈ្មោះថា « Sam Gor » ដែលធ្វើសកម្មភាព ជួញដូរចែកចាយថ្នាំញៀន ប្រភេទម៉េតំហ្វេតាមីន (Méthamphétamines) ហើយបន្ទាប់មកទៀត ធ្វើសកម្មភាពលាងលុយក្រខ្វក់ តាមរយៈ ការបង្កើតកាស៊ីណូបនល្បែង ក្លឹបកំសាន្ត សណ្ឋាគារ និងក្រុមហ៊ុនសំណង់អចលនទ្រព្យនានា នៅតាមក្នុងតំបន់អាស៊ីអាគ្នេយ៍ ជាពិសេសតាមប្រទេសតំបន់ដងទន្លេមេគង្គ។
ភាគច្រើនបំផុតនៃថ្នាំញៀនម៉េតំហ្វេតាមីន ជួញដូរដោយបណ្តាញនេះ គឺផលិតនៅតំបន់ត្រីកោណមាស ព្រំដែនរវាងភូមា ថៃ និងឡាវ។ មេតំហ្វេតាមីន គឺជាថ្នាំញៀនកែច្នៃ ស្ថិតក្នុងអំបូរសារធាតុញៀនអំហ្វេតាមីន តែមេតំហ្វេតាមីន មានឥទ្ធិពលញៀនខ្លាំង និងយូរជាង។ មេតំហ្វេតាមីន អាចមានឈ្មោះហៅក្រៅច្រើនផ្សេងទៀត ដូចជា Yama Yaba Crack ឬ ម៉ាទឹកកក ជាដើម។
អូស្ត្រាលី គឺជាប្រទេសបានទទួលរងនូវការចាក់បញ្ចូលថ្នាំញៀនប្រភេទនេះ ច្រើនបំផុត។ នៅរវាងឆ្នាំ២០១២-២០១៣ សមត្ថកិច្ចអូស្រ្តាលី បានបើកប្រតិបត្តិការបង្រ្កាប ហើយឈានទៅចាប់ខ្លួនមនុស្សចំនួន២៧នាក់ នៅទីក្រុងមែលបូន ដែលជាសមាជិកនៃបណ្តាញ « Sam Gor »។ ក្នុងប្រតិបត្តិការនេះ នគរបាលអូស្ត្រាលីបានរឹបអូសបាន អល្លង្ការ សម្ភារៈ កាបូបម៉ាក និងសាច់ប្រាក់សុទ្ធ មានតម្លៃសរុបប្រមាណ៩លានដុល្លារអូស្ត្រាលី។
ការចាប់ខ្លួនជនឈ្មោះ Tse Chi Lop ដែលគេស្គាល់ថាជាមេក្លោងធំនាពេលនេះ គឺជាការបោះជំហានទៅមុខដ៏សំខាន់ នៅក្នុងយុទ្ធនាការកំទេចបណ្តាញ « Sam Gor »។ រដ្ឋាភិបាលអូស្ត្រាលី បានជូនដំណឹងនៅថ្ងៃអាទិត្យទី២៤មករានេះថា គេនឹងរៀបចំឯកសារ សុំឲ្យអាជ្ញាធរហូឡង់ ប្រគល់ខ្លួនជនឈ្មោះ Tse Chi Lop ដើម្បីយកទៅកាត់ទោសនៅអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ