រដ្ឋមន្ត្រីការពារជាតិអាេមរិកទៅអាហ្វហ្កានីស្ថាន ខណៈកាលបរិច្ឆេទត្រូវដកទ័ព កាន់តែខិតជិតមកដល់
លោករដ្ឋមន្ត្រីការពារជាតិអាមេរិក ដែលចេញដំណើរពីឥណ្ឌា បានឆៀងចូលអាហ្វហ្កានីស្ថាន ដោយប្រថុចញ៉ុចបំផុត ដើម្បីជួបជាមួយថ្នាក់នាំអាហ្វហ្កានីស្ថាន និយាយអំពីស្ថានការណ៍សន្តិសុខ និងផែនការដកទ័ពរបស់អាមេរិក។ តាមការគ្រោងទុក អាមេរិកត្រូវដកទ័ពនៅដើមខែឧសភា ក៏ប៉ុន្តែ លោកប្រធានាធិតបី ចូ បៃដិន បានបង្ហើបឲ្យដឹងថា ការដកទ័ពនេះ ប្រហែលជាពិបាកធ្វើណាស់ ព្រោះស្ថានការណ៍សន្តិសុខ នៅដុនដាបខ្លាំង។
ចុះផ្សាយនៅថ្ងៃ៖
ស្តាប់ - ០២:៣១
ពេលទៅដល់ក្រុងកាប៊ូលភ្លាម លោក Lloyd Austin រដ្ឋមន្ត្រីការពារជាតិអាមេរិក បានចូលទៅជួបលោក Ashraf Ghani ប្រធានាធិបតីអាហ្វហ្កានីស្ថាន ដើម្បីនិយាយពីផែនការដកទ័ពរបស់អាមេរិក។ នៅក្រោយជំនួប ដែលឥតព្រាងទុកមុននេះ លោក រដ្ឋមន្ត្រីការពារជាតិអាមេរិក បានអះអាងថា ភាគីអាហ្វហ្កានីស្ថាន មានបំណងចង់ឲ្យអាមេរិក បន្តទុកកងទ័ពនៅអាហ្វហ្កានីស្ថាន ឲ្យបានយូរកាលណាល្អកាលណោះ ព្រោះថារដ្ឋាភិបាលអាហ្វហ្កានីស្ថាន ត្រូវការជំនួយការពារពីលើផ្លូវអាកាស របស់កងទ័ពអាមេរិក។
ដោយឡែក លោករដ្ឋមន្ត្រីការពារជាតិអាមេរិក មិនបានបញ្ជាក់ទេ អំពីកាលវិភាគថ្មី នៃដំណាក់កាលដកទ័ព។ លោកគ្រាន់តែបានប្រាប់អ្នកកាសែតថា នេះគឺជាការសម្រេចរបស់មេរបស់លោក គឺលោកប្រធានាធិបតី ចូបៃដិន។
សូមបញ្ជាក់ថា បច្ចុប្បន្ន មានទាហានអាមេរិកប្រចាំនៅអាហ្វហ្កានីស្ថាន ចំនួនប្រមាណ២៥០០នាក់។ យោងតាមកិច្ចព្រមព្រៀង ចុះហត្ថលេខាដោយរដ្ឋាភិបាលលោកដូណាល់ ត្រាំ ជាមួយក្រុមតាលីបង់ កាលពីខែកុម្ភៈ ឆ្នាំ២០២០ គឺអាេមរិកនឹងដកទ័ពចេញពីអាហ្វហ្កានីស្ថាន ចាប់ពីថ្ងៃទី១ខែឧសភាខាងមុខ។
ក៏ប៉ុន្តែ ចាប់តាំងពីបានចូលកាន់តំណែង លោកចូ បៃដិន បានបង្ហើបឲ្យដឹងថា បើស្ថានការណ៍សន្តិសុខមិនប្រសើរឡើង ហើយក្រុមតាលីបង់ នៅតែមិនផ្តាច់ទំនាក់ទំនង ជាមួយក្រុមភេរវកម្មអាល់កៃដាទេនោះ នោះអាមេរិក នឹងពិចារណាឡើងវិញ អំពីការដកទ័ព។ ជាក់ស្តែងកាលពីប៉ុន្មានថ្ងៃមុននេះ លោកចូ បៃដិន បានបញ្ជាក់ថា បើតាមស្ថានភាពពេលនេះ គឺអាមេរិកត្រូវតែរក្សាទ័ពឲ្យបន្តនៅអាហ្វហ្កានីស្ថានបន្តទៀត។
ដោយឡែក ការចរចាសន្តិភាពនៅក្រុងដូហា រវាងភាគីរដ្ឋាភិបាលអាហ្វហ្កានីស្ថាន និងក្រុមតាលីបង់ បាននៅជាប់គាំងមិនទៅមុខទាល់តែសោះ ខណៈដែលក្នុងស្រុកឯណេះ មានការវាយប្រហារគ្នាកាន់តែញឹកញាប់។ កាលពីថ្ងៃព្រហស្បតិ៍ទី ១៨មីនា រុស្ស៊ីបានរៀបចំសន្និសីតមួយ នៅក្រុងម៉ូស្គូ ដើម្បីស្វែងរកសន្តិភាពឲ្យអាហ្វហ្កានីស្ថាន ដោយមានការចូលរួមពីភាគីអាហ្វហ្កានីស្ថាន ចិន អាមេរិក និងប៉ាគីស្ថាន។ សន្និសីទនេះ បានមូលមតិគ្នាអំពាវនាវ ឲ្យភាគីទាំង២របស់អាហ្វហ្កានីស្ថាន ត្រូវបញ្ឈប់រាល់ការវាយប្រហារដោយអាវុធ ហើយត្រូវពន្លឿនការចរចាសន្តិភាពនៅដូហា។
លោក Abdullah Abdullah ប្រធានក្រុមប្រឹក្សាបង្រួបបង្រួមជាតិអាហ្វហ្កានីស្ថាន បានអះអាងទាំងភាគីរដ្ឋាភិបាលអាហ្វហ្កានីស្ថាន ទាំងភាគីតាលីបង់ សុទ្ធតែបានបង្ហាញឆន្ទៈ ពន្លឿនការចរចាសន្តិភាពនៅដូហា កាលពីឱកាសសន្និសីតនៅម៉ូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ