ឥណ្ឌូណេស៊ី៖ភេរវកម្មអត្តឃាតប្រឆាំងវិហារកាតូលិកបានបណ្តាលឲ្យរបួសយ៉ាងតិច ១៤នាក់
នៅក្នុងប្រទេសឥណ្ឌូណេស៊ី អំពើភេរវកម្មអត្តឃាតប្រឆាំងនឹងវិហារសាសនាកាតូលិកមួយស្ថិតក្នុងស្រុកម៉ាកាសានៃខេត្តស៊ូឡាវ៉េស៊ីនាប៉ែកខាងកើតប្រទេសបានបណ្តាលឲ្យមានមនុស្សរងរបួសយ៉ាងតិច ១៤នាក់នៅព្រឹកថ្ងៃអាទិត្យ ទី២៨ មីនា។ តាមប៉ូលិស មានភេរវជនចំនួន ២នាក់បានជិះម៉ូតូដោយទាញបំផ្ទុះគ្រាប់បែបជាប់នឹងខ្លួនគេនៅពេលដែលក្រុមគ្រិស្តបរិស័ទកំពុងដើរចេញពីវិហារ។ គួរបញ្ជាក់ថា ឥណ្ឌូណេស៊ីជាប្រទេសដែលមានអ្នកកាន់សាសនាអ៊ីស្លាមច្រើនជាងគេលើលោក ហើយកន្លងមក វិហារកាតូលិកជាផ្ទាំងស៊ីបនៃការវាយប្រហាររបស់ក្រុមអ៊ីស្លាមនិយមជ្រុល។
ចុះផ្សាយនៅថ្ងៃ៖
ស្តាប់ - ០២:០១
គឺនៅពេលដែលក្រុមគ្រិស្តបរិស័ទបានបញ្ចប់ពិធីសូត្រធម៌ និងកំពុងដើរចេញពីវិហារដែលក្រុមភេរវជនបានធ្វើសកម្មភាព។ តាមអ្នកនាំពាក្យប៉ូលិសជាតិឥណ្ឌូណេស៊ីលោកអាហ្កូ យូវ៉ូណូ ភេរវជនចំនួន ២នាក់ដែលជិះម៉ូតូបានព្យាយាមបើកម៉ូតូចូលក្នុងបរិវេណវិហារ និងបានទាញបំផ្ទុះគ្រាប់បែកជាប់នឹងខ្លួនគេ។ លោកយូវ៉ូណូបានបញ្ជាក់ថា កម្លាំងផ្ទុះបានកម្ទេចម៉ូតូខ្ទេចខ្ទីរ ហើយមានបំណែកខ្លួនភេរវជនរាយប៉ាយនៅពេញដី។ អ្នកនាំពាក្យប៉ូលិសរូបនេះដដែលបានបន្ថែមថា ប៉ូលិសបានប្រមូលយកបំណែកខ្លួនភេរវជនទៅវិភាគដើម្បីរកភេទរបស់ភេរវជនអត្តឃាត។ បើតាមប៉ូលិសខេត្តស៊ូឡាវ៉េស៊ី មានភេរវជនម្នាក់យ៉ាងតិចបានស្លាប់នៅក្នុងព្រឹត្តិការណ៍នោះ តែលោកយូវ៉ូណូមិនបានបញ្ជាក់លើព័ត៌មាននេះទេ។ ចំណែកចៅហ្វាយស្រុកម៉ាកាសាបានអះអាងថា មានបំណែកខ្លួនមនុស្សជាច្រើននៅរាយប៉ាយក្បែរវិហារ និងនៅតាមផ្លូវក្បែរនោះ។
តើបំណែកខ្លួនមនុស្សទាំងនោះសុទ្ធសឹងជាបំណែកខ្លួនភេរវជនអត្តឃាត ឬ?។ ប៉ូលិសមិនបានធ្វើអត្ថាធិប្បាយអ្វីបន្ថែមទេ តែគ្រាន់បញ្ជាក់ថា មានគ្រិស្តបរិស័ទយ៉ាងតិច ១៤នាក់បានរងរបួស និងមិនបានបញ្ជាក់ពីស្ថានភាពសុខភាពរបស់ពួកគេនៅឡើយទេ។ តាមអ្នកថតរូបម្នាក់របស់ AFP កម្លាំងផ្ទុះក៏បានធ្វើឲ្យខូចខាតរថយន្តជាច្រើនគ្រឿងដែលចតនៅក្បែរវិហារនោះ។ គួររម្លឹកថាកន្លងមក វិហារកាតូលិកនៅឥណ្ឌូណេស៊ីជាផ្ទាំងស៊ីបនៃការវាយប្រហារពីពួកអ៊ីស្លាមជ្រុលនិយម។ ជាក់ស្តែងក្នុងខែឧសភា ឆ្នាំ ២០១៨ ការវាយប្រហារបង្កឡើងដោយ ៣គ្រួសារបានបណ្តាលឲ្យមានមនុស្សស្លាប់សរុប ១៥នាក់ និងមានស្លាប់ជនដៃដល់ចំនួន ១៣នាក់។ គ្រួសារទាំង ៣ នេះមានចំណងទាក់ទងជាមួយចលនាជ្រុលនិយម Jamaah Ansharut ដែលគេស្គាល់ជាចលនាគាំទ្រអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ