ជប៉ុនជំរុញឲ្យភូមាដោះលែងអ្នកកាសែតជប៉ុនដែលរបបសឹកចាប់ឃុំខ្លួន
ប្រទេសជប៉ុនបានជំរុញឲ្យអាជ្ញាធរភូមាដោះលែងអ្នកកាសែតជប៉ុនម្នាក់ដែលជាប់ក្នុងមន្ទីរឃុំឃាំងនៅឯទីក្រុងរ៉ង់ហ្គូន។ អ្នកកាសែតជប៉ុនម្នាក់នេះ ស្ថិតក្នុងចំណោមអ្នកយកព័ត៌មានយ៉ាងតិច ៦៥ នាក់ផ្សេងទៀតដែលត្រូវបានចាប់ខ្លួន ក្នុងអំឡុងពេលនៃការបង្ក្រាបរបស់កងទ័ពភូមា ទៅលើបាតុករប្រឆាំងនឹងរដ្ឋប្រហារ។
ចុះផ្សាយនៅថ្ងៃ៖
ស្តាប់ - ០២:៣២
របបយោធាភូមានៅតែបន្តការបង្ក្រាបហិង្សាលើចលនាបាតុកម្មរបស់ប្រជាជនដែលនៅតែបន្តពុះពារមិនខ្លាចស្លាប់ ចេញធ្វើការតវ៉ាប្រឆាំងនឹងការទម្លាក់រដ្ឋាភិបាលជាប់ឆ្នោតរបស់លោកស្រីអ៊ុងសាន ស៊ូជី។ មកទល់នឹងពេលនេះ មានស្លាប់បាតុករយ៉ាងហោច ៧៣៧នាក់ ហើយវិស័យសារព័ត៌មានវិញកំពុងរងការវាយប្រហារខ្លាំង។
អ្នកកាសែតឯករាជ្យជប៉ុនម្នាក់ឈ្មោះ យូគិ គិតាហ្សូមិ (Yuki Kitazumi) ត្រូវបានអាជ្ញាធរភូមាឃុំខ្លួនកាលពីថ្ងៃអាទិត្យម្សិលមិញ។ អ្នកនាំពាក្យស្ថានទូតជប៉ុនម្នាក់បានអះអាថាលោកគិតាហ្សូមិ ត្រូវបានគេបញ្ជូនចេញទាំងយប់ពីទីស្នាក់ការប៉ូលិសទៅកាន់ពន្ធនាគារអ៊ីនសេនក្នុងទីក្រុងរ៉ង់ហ្គូន។
អ្នកនាំពាក្យស្ថានទូតជប៉ុនដដែលរូបនេះបានប្រាប់ទីភ្នាក់ងារព័ត៌មាន AFP នៅថ្ងៃចន្ទ ១៩ មេសានេះថាលោកគិតាហ្សូមិ មិនទាន់ត្រូវបានចោទប្រកាន់នៅឡើយទេ ហើយមន្ត្រីទូតកំពុងស្វះស្វែងសុំការអនុញ្ញាតឲ្យចូលទៅជួបគាត់នៅក្នុងពន្ធនាគារអ៊ីនសេន ដែលគេល្បីឈ្មោះថាជាកន្លែងសម្បូរដាក់ទៅដោយអ្នកទោសនយោបាយជាច្រើនក្នុងប្រទេសភូមា។
គួរគូសបញ្ជាក់ថា នាខណៈពេលនេះរដ្ឋាភិបាលជប៉ុនកំពុងខ្នះខ្នែងជាខ្លាំងដើម្បីជួយឲ្យអ្នកកាសែតឯករាជ្យជប៉ុនលោកគិតាហ្សូមិ រួចខ្លួនពីការឃុំឃាំង។ ហេតុផលនៃការចាប់ខ្លួន និងឃុំខ្លួនយ៉ាងណានោះ ស្ថានទូតជប៉ុននៅទាន់មិនដឹងច្បាស់នោះទេ និងកំពុងធ្វើការសិក្សាព័ត៌មានលម្អិតជុំវិញរឿងនេះ។
យ៉ាងណាក៏ដោយ ជប៉ុនកំពុងជំរុញឲ្យរបបសឹកភូមាដោះលែងអ្នកកាសែតជាមុនសិន ហើយអ្នកនាំពាក្យរដ្ឋាភិបាលជប៉ុនបានបញ្ជាក់ថា រដ្ឋាភិបាលនឹងប្រឹងប្រែងឲ្យអស់ពីសមត្ថភាពដើម្បីការពារជនជាតិជប៉ុនរបស់ខ្លួន។
គួរជ្រាបថា នេះជាលើកទី ២ ហើយដែលអ្នកកាសែតជប៉ុនលោក គិតាហ្សូមិ ត្រូវបានចាប់ឃុំខ្លួនដោយរបបសឹកភូមាចាប់តាំងពីរដ្ឋប្រហារមក។ កាលពីខែកុម្ភៈលោកត្រូវបានគេវាយដំ និងត្រូវគេឃុំឃាំងរយៈពេលខ្លីក្នុងអំឡុងពេលនៃការបង្ក្រាបទៅលើក្រុមអ្នកតវ៉ា ប៉ុន្តែក្រោយមកត្រូវបានដោះលែងឲ្យមានសេរីភាពវិញ។
បច្ចុប្បន្ននេះ វិស័យសារព័ត៌មាននៅក្នុងប្រទេសភូមាកំពុងរងការវាយប្រហារគួរឲ្យបារម្ភ។ ចាប់តាំងពីឡើងកាន់អំណាចមក របបយោធាព្យាយាមរឹតបន្តឹងការគ្រប់គ្រងលើលំហូរព័ត៌មានរបស់ប្រព័ន្ធផ្សព្វផ្សាយក្នុងស្រុកជាច្រើន។ យ៉ាងហោចណាស់ មានអ្នកកាសែតនិងអ្នកថតរូបចំនួន ៣៤ នាក់កំពុងជាប់ឃុំឃាំងនៅទូទាំងប្រទេសភូមា។ នេះបើយោងតាមក្រុមឃ្លាំមើលរបស់សមាគមអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ