ជប៉ុនប្រកាសភាពអាសន្នកូវីដ នៅ៣ខែមុនព្រឹត្តិការណ៍អូឡាំពិក
ប្រទេសជប៉ុនបានប្រកាសនៅថ្ងៃសុក្រ ទី២៣ មេសា ដាក់ទីក្រុងតូក្យូ និងតំបន់ចំនួនបីផ្សេងទៀតក្នុងភាពអាសន្នជាថ្មី ដោយសារកំណើនករណីឆ្លងកូវីដ។ នៅខណៈនេះ អាជ្ញាធរជប៉ុនកំពុងតែប្រឹងប្រែងយ៉ាងខ្លាំងក្នុងការប្រយុទ្ធទល់នឹងការឆ្លងរាតត្បាតកូវីដ ជាពិសេសនៅមុនព្រឹត្តិការណ៍កីឡាអូឡាំពិកដែលនឹងត្រូវបើកជាផ្លូវការហើយក្នុងរយៈពេល ៣ ខែទៀត។
ចុះផ្សាយនៅថ្ងៃ៖
ស្តាប់ - ០២:៤៦
នេះគឺជាការប្រកាសភាពអាសន្នកូវីដលើកទី៣ហើយសម្រាប់ទីក្រុងតូក្យូ និងតំបន់បីផ្សេងទៀត។ តាមពិតទៅ ករណីឆ្លងរាលដាលកូវីដនៅក្នុងប្រទេសជប៉ុនមានចំនួនតិចជាងឆ្ងាយ បើប្រៀបធៀបនឹងប្រទេសជាច្រើនទៀត។ ក៏ប៉ុន្តែ កំណើនករណីឆ្លងជាងមុនចុងក្រោយនេះ បានធ្វើឲ្យមន្រ្តី និងអ្នកជំនាញផ្នែកវេជ្ជសាស្រ្តជប៉ុនមានការព្រួយបារម្ភ ព្រោះថាព្រឹត្តិការណ៍ប្រកួតកីឡាអូពិករដូវក្តៅនៅតូក្យូខិតកៀកមកដល់ខ្លាំងហើយ។
"នៅថ្ងៃសុក្រនេះ យើងបានសម្រេចប្រកាសពីភាពអាសន្នកូវីដនៅក្នុងទីក្រុងតូក្យូ ក្យូតុ អូសាកា និងហ៊ីយោហ្គូ”។ នេះគឺជាប្រសាសន៍របស់លោកនាយករដ្ឋមន្ត្រីជប៉ុន យ៉ូស្ហ៊ីហ៊ីដេ ស៊ូហ្កា ដោយបញ្ជាក់ថាវិធានការខាងលើនឹងចាប់ផ្តើមចាប់ពីថ្ងៃទី ២៥ មេសា ដល់ថ្ងៃទី ១១ ខែឧសភា។
សេចក្តីប្រកាសរបស់រដ្ឋាភិបាលជប៉ុននេះ ធ្វើឡើងក្នុងគោលបំណង បញ្ឈប់ពលរដ្ឋមិនឲ្យដើរហើរ និងចម្លងមេរោគកូរ៉ូណាវីរុស ក្នុងអំឡុងពេលវិស្សមកាល "សប្តាហ៍មាស" (Golden Week) របស់ប្រទេសជប៉ុន ដែលនឹងចាប់ពីចុងខែមេសាដល់សប្តាហ៍ដំបូងនៃខែឧសភា។
គួរជ្រាបថា ស្ថានភាពអាសន្នកូវីដនឹងបិទបញ្ចប់នៅថ្ងៃទី១១ ឧសភា ពោលគឺនៅមុនដំណើរទស្សនកិច្ចរបស់ប្រធានគណៈកម្មាធិការអូឡាំពិកអន្តរជាតិលោក Thomas Back ទៅកាន់ប្រទេសជប៉ុន។ ការណ៍នេះបានធ្វើឲ្យមានមន្ទិលសង្ស័យថា រដ្ឋាភិបាលរបស់លោកស៊ូហ្កា កំពុងផ្តល់អាទិភាពដល់ព្រឹត្តិការណ៍កីឡាអូឡាំពិក ជាជាងសុខភាពរបស់ប្រជាជន។
ក្រុមអ្នកជំនាញបារម្ភចំពោះកំណើនករណីឆ្លងកូវីដបណ្តាលមកពីមេរោគបំប្លែងខ្លួនថ្មីដែលបានរីករាលដាលយ៉ាងឆាប់រហ័សនៅទូទាំងប្រទេសជប៉ុន។ មេរោគប្រភេទថ្មីនេះមានឥទ្ធិពលនិងអាចចម្លងលឿនខ្លាំងជាងមេរោគបំប្លែងខ្លួនដែលរកឃើញនៅអង់គ្លេស។
មន្ត្រីជប៉ុនខ្លះចង់ឲ្យរដ្ឋាភិបាលដាក់ចេញវិធានការតឹងរ៉ឹងជាងនេះ ពីព្រោះម្យ៉ាងករណីឆ្លងថ្មីមានច្រើន ហើយនៅតាមមន្ទីរពេទ្យមួយចំនួនចេញហៀហូរទៅដោយអ្នកជំងឺ។ ម្យ៉ាងទៀត រដ្ឋាភិបាល ក៏មានភាពយឺតយ៉ាវដែរក្នុងការចាក់វ៉ាក់សាំងប្រឆាំងកូវីដជូនប្រជាជន មុនការប្រកួតកីឡាអូឡាំពិកចាប់ផ្តើមនាថ្ងៃទី ២៣ ខែកក្កដា។
យ៉ាងណាក៏ដោយ មានបានអះអាងថា ស្ថានការណ៍បច្ចុប្បន្ន នឹងមិនប៉ះពាល់ដល់ការរៀបចំសម្រាប់ព្រឹត្តិការណ៍អូឡាំពិកនោះទេ។ ប្រធានរៀបចំកីឡាអូឡាំពិកតូក្យូឆ្នាំ ២០២០ អ្នកស្រីសៃកូ ហាស្ហ៊ីម៉ូតុ (Seiko Hashimoto) បានប្រាប់អ្នកយកព័ត៌មាននៅថ្ងៃសុក្រនេះថា គេមិនបានគិតទេ អំពីការលុបចោលព្រឹត្តិការណ៍កូឡាំពិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ