តុលាការឥណ្ឌូណេស៊ីកាត់ទោសប្រហារជីវិតអ្នកទោស ដោយប្រើប្រព័ន្ធវីដេអូ Zoom
រក្សាគម្លាតសង្គម កាត់បន្ថយការជួបជុំគ្នា ដើម្បីទប់ស្កាត់ការឆ្លងរីករាលដាលជំងឺកូវីដ១៩។ វិធានការរក្សាគម្លាត សង្គម ក្នុងកាលៈទេសៈ កូវីដ ១៩មិនបានធ្វើឲ្យតុលាការឥណ្ឌូណេស៊ី កាត់បន្ថយ ការងាររបស់ខ្លួននោះទេ។ ទោះជាត្រូវរក្សាគម្លាតសង្គម ដើម្បី កុំឲ្យឆ្លងជំងឺកូវីដ តុលាការឥណ្ឌូណេស៊ី នៅសម្រេចបានដាក់ទោសប្រហារជីវិត អ្នកទោសដល់ទៅ ១០០នាក់ ដោយប្រើប្រព័ន្ធវីដេអូ ដូចជា កម្មវិធី វីដេអូ Zoom ជាដើម។ ការណ៍នេះ បានទាក់ទាញឲ្យមានសំឡេងរិះគន់ តុលាការឥណ្ឌូណេស៊ី ថា បានចេញសេចក្តីថ្កោលទោស ដែលគ្មានលក្ខណៈមនុស្សធម៌។
ចុះផ្សាយនៅថ្ងៃ៖
ស្តាប់ - ០៣:០០
សម្រេចដាក់ទោស ប្រហារជីវិត តាមវីដេអូ ហ្ស៊ូម។ នៅប្រទេសឥណ្ឌូណេស៊ី បើទោះបីជាប្រទេសត្រូវបិទខ្ទប់ដោយកន្លែង និងត្រូវអនុវត្តវិធានការ រក្សាគម្លាតសង្គម ដែលធ្វើឲ្យជនជាប់ចោទមិនអាចបង្ហាញមុខ នៅ តុលាការក្តី ប៉ុន្តែ តុលាការនៅតែអាចដំណើរការកាត់ក្តីជាធម្មតា គ្មានរអាក់រអួលនោះទេ។ នោះគេត្រូវអរគុណទៅដល់ប្រព័ន្ធវីដេអូ ដែលមានដូចជាកម្មវិធីវីដេអូហ្ស៊ូម Zoom ជាដើម។
ចាប់តាំងពីដើមឆ្នាំមុន អ្នកទោស ប្រមាណ ១០០នាក់ ត្រូវបានតុលាការសម្រេចដាក់ទោស ប្រហារជីវិត តាមរយៈ ប្រព័ន្ធវីដេអូ។ ដោយមិនបានចូលរួមដោយផ្ទាល់ក្នុងសវនាការ អ្នកទោស ដែលជាប់ចោទពី បទមនុស្សឃាត ឬ ជួញដូរថ្នាំញៀន បានស្តាប់លឺ ចៅក្រមប្រកាសទោសប្រហារជីវិត ពួកគេ តែតាមប្រព័ន្ធវីដេអូតែប៉ុណ្ណោះ។
នៅខែ នេះ តុលាការក្រុងហ្សាកាតារបានប្រើប្រព័ន្ធ វីដេអូផងដែរ ដើម្បីប្រកាសថា ក្រុមជួញដូរថ្នាំញៀន ចំនួន ១៣នាក់ដែលក្នុងនោះ មាន ៣នាក់ ជាជនជាតិអ៊ីរ៉ង់ និង១នាក់ ជាជនជាតិប៉ាគីស្ថាន នឹងត្រូវ កាត់ទោស ប្រហារជីវិត ដោយគ្រាប់កាំភ្លើង ក្នុងបទឧក្រិដ្ឋជួញដូរថ្នាំញៀន ៤០០ក្រាម ចូលប្រទេសឥណ្ឌូណេស៊ី។ កាលពីថ្ងៃពុធកន្លងទៅទៀតសោត សកម្មជនអ៊ីស្លាម ៦នាក់ ដែលជាប់ចោទពីបទសម្លាប់ មន្រ្តីប្រឆាំងភេរវកម្ម ក្នុងកុបកម្មហែកគុក នៅ ឆ្នាំ ២០១៨ ក៏ត្រូវតុលាការឥណ្ឌូណេស៊ី កាត់ទោស ប្រហារជីវិត តាមប្រព័ន្ធវីដេអូដែរ។
សម្រាប់ ប្រធានអង្គការការពារសិទ្ធិមនុស្ស Amnesty International នៅ ឥណ្ឌូណេស៊ី ជាទី ដែលតុលាការ សម្រេចដាក់ទោស ធ្ងន់ធ្ងរ គឺកាត់ទោស ប្រហារជីវិត សម្រាប់ អ្នកជួញដូរគ្រឿងញៀនរួចហើយនោះ ការប្រើកម្មវិធី ហ្ស៊ូម ប្រព័ន្ធវីដេអូ ដើម្បី កាត់ទោស ពីចម្ងាយ រឹតតែបង្កើត ភាពអយុត្តិធម៌ និងអមនុស្សធម៌សម្រាប់ជនជាប់ចោទ។
ជាក់ស្តែង ដោយសារតែបណ្តាញអ៊ីនធ័រនែតខ្សោយនៅតាមមន្ទីរឃុំឃាំង មួយចំនួន ប្រព័ន្ធវីដេអូត្រូវរអាក់រអួល ធ្វើឲ្យអ្នកទោស ស្តាប់មិនបានអស់សេចក្តី ឬតាមមិនទាន់ ដំណើរការសវនាការនោះទេ។
នៅក្នុងរបាយការណ៍ស្តីពីការកាត់ទោសប្រហារជីវិតអ្នកទោស អង្គការកាត់បន្ថយគ្រោះថ្នាក់អន្តរជាតិ Harm Reduction International វាយតម្លៃថា ការប្រើប្រព័ន្ធវីដេអូ សម្រាប់សវនការកាត់ទោស ប្រហារជីវិត រំលោភធ្ងន់ធ្ងរ សិទ្ធិរបស់ជនសង្ស័យ ក្នុងការទទួលបានការជំនុំជម្រះប្រកបដោយសុចរិតយុត្តិធម៌ ហើយនិងប៉ះពាល់ផងដែរ ដល់ការងាររបស់មេធាវី ការពារជនជាប់ចោទ។
មេធាវីឥណ្ឌូណេស៊ីម្នាក់ ដែលចេញមុខការពារជនជួញដូរថ្នាំញៀន បានតវ៉ាថា ដោយសារតែវិធានការរឹតបន្តឹង ការធ្វើដំណើរ ក្នុងបរិបទកូវីដ គេមិនបានអនុញ្ញាតឲ្យលោកបានជួបកូនក្តីរបស់លោកនោះទេ។ មេធាវីការពារក្តីមួយនេះអះអាងថា បើសិន កូនក្តីរបស់លោក ចូលរួម ដោយផ្ទាល់ បង្ហាញ មុខនៅមុខចៅក្រម នោះការសម្រេច ដាក់ទោស នឹងអាចស្រាលជាង ការកាត់ក្តី តាមរយៈប្រព័ន្ធវីដេអូ ដែលនៅក្នុងនោះ ចៅក្រម មិនបានឃើញ ទឹកមុខច្បាស់ និងអារម្មណ៍ សោកស្តាយរបស់ជនជាប់ចោទនោះទេ។
តាមទីភ្នាក់ងារព័ត៌មានបារាំង AFP តុលាការកំពូលឥណ្ឌូណេស៊ី ដែលជាសម្រេចឲ្យគេបន្តបើកសវនាការក្នុងកាលៈទេសៈ កូវីដ បានបដិសេធមិនធ្វើអត្ថាធិប្បាយអ្វីទាំងអស់។ ផ្ទុយទៅវិញ គណៈកម្មការយុត្តិធម៌របស់រដ្ឋាភិបាលឥណ្ឌូណេស៊ីបាននិយាយថា គេបានដាក់ពាក្យសុំឲ្យតុលាការកំពូល សម្រេចថា សវនាការសម្រាប់បទឧក្រិដ្ឋធ្ងន់ធ្ងរ ដែលអាចឈានទៅដល់ការដាក់ទោសប្រហារជីវិត គួរតែធ្វើ ដោយមានការចូលរួមផ្ទាល់ ពីជនជាប់ចោទ ប៉ុន្តែ មិនមែនធ្វើតាមប្រព័ន្ធវីដេអូនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ