ចិនចេញមុខការពារការប្រើប្រាស់ធ្យូងថ្ម នៅក្នុងគម្រោងវិនិយោគរបស់ចិន នៅបរទេស
ក្នុងហេតុផលថា គេគ្មានដំណោះស្រាយអ្វីផ្សេងសម្រាប់ជំនួសការប្រើប្រាស់ធ្យូងថ្ម នៅតាមបណ្តាប្រទេសកំពុងអភិវឌ្ឍ ប្រទេសចិន តាមរយៈ ប្រធានផ្នែកប្រែប្រួលអាកាសធាតុ បានចេញមុខការពាររោងចក្រដុតធ្យូងថ្ម ដែលចិនសាងសង់ នៅទឹកដីបរទេស។ នៅក្នុងសន្និសីទកាសែត កាលពីថ្ងៃអង្គារទី២៨ មេសា ២០២១ ប្រធានផ្នែកប្រែប្រួលអាកាសធាតុ របស់ក្រសួងបរិស្ថានចិនបានអះអាងថា ចិននៅតែបន្តគាំទ្រ ការសាងសង់រោងចក្រ ប្រើធ្យូងថ្ម នៅបរទេស។
ចុះផ្សាយនៅថ្ងៃ៖
ស្តាប់ - ០២:៥១
សម្រាប់មន្រ្តីចិន ទទួលបន្ទុក ការប្រែប្រួលអាកាសធាតុ នៅមានប្រទេសកំពុងអភិវឌ្ឍជាច្រើនដែលនៅមិនទាន់អាចផលិតអគ្គិសនីប្រើប្រាស់គ្រប់គ្រាន់នៅឡើយ។ នៅក្នុងកាលៈទេសៈនេះ តើគេអាចមិនប្រើរោងចក្រធ្យូងថ្ម ដើម្បីផលិតអគ្គិសនីបានយ៉ាងម៉េច? តើថាមពលកកើតឡើងវិញ ដូចជាផ្ទាំងស្រូបកំដៅព្រះអាទិត្យ មានគ្រប់គ្រាន់ សម្រាប់ ពួកគេដែរឬទេ។ ដរាបណា គេនៅមិនទាន់ ដំណោះស្រាយថ្មី សម្រាប់ជំនួស ថាមពលធ្យូងថ្មទេ ចិននៅតែ គាំទ្រ គម្រោងសាងសង់មជ្ឈមណ្ឌលថាមពលធ្យូងថ្ម នៅទឹកដីបរទេស។ នេះជាការអះអាងរបស់ប្រធានផ្នែកប្រែប្រួលអាកាសធាតុ នៅក្រសួងបរិស្ថានចិន ដោយសង្កត់ធ្ងន់ថា គេមិនអាចឈប់វិនិយោគ លើរោងចក្រអគ្គិសនី ដើរដោយថាមពលធ្យូងថ្ម នៅប្រទេសកំពុងអភិវឌ្ឍ ភ្លាមៗនោះទេ។ ការប្រយុទ្ធប្រឆាំង នឹងការប្រែប្រួលអាកាសធាតុ ត្រូវតែអនុញ្ញាតផងដែរ ឲ្យប្រជាជននៅប្រទេសទាំងនោះ ទទួលបានលក្ខខណ្ឌរស់នៅ ល្អប្រសើរមុន។
តាម មន្រ្តីចិន មជ្ឈមណ្ឌលថាមពលធ្យូងថ្ម ឆ្លើយតបនឹងតម្រូវការជាក់ស្តែងរបស់ប្រទេសកំពុងអភិវឌ្ឍ។ មួយវិញទៀត វានឹងសាងសង់ឡើង ជាមួយបទដ្ឋានខ្ពស់ជាងមុន ដោយមិនបញ្ចេញឧស្ម័នកាបូនិក ច្រើនដូចមុននោះទេ។
ថាមពលធ្យូងថ្មជាអ្នកបង្កើតឲ្យមានឧស្ម័នផ្ទះកញ្ចក់ ប្រមាណ៤០ភាគរយ នៃឧស្ម័នផ្ទះកញ្ចក់សរុបលើផែនដី។ តាម អង្គការតាមដាន ឧស្ម័នកាបូនិក ដែលមានទីស្នាក់ការនៅប្រទេសអង់គ្លេស ៨០ភាគរយនៃរោងចក្រ ប្រើធ្យូងថ្ម នៅបរទេស ជាការវិនិយោគរបស់ក្រុមហ៊ុនចិន។
សកម្មជនបរិស្ថានធ្លាប់បានអំពាវនាវឲ្យចិនឈប់វិនិយោគ ឈប់ផ្តល់ជំនួយហិរញ្ញវត្ថុដល់មជ្ឈមណ្ឌលធ្យូងថ្ម និងហេដ្ឋារចនាសម្ព័ន្ធផ្សេងទៀតពាក់ព័ន្ធនឹងធ្យូងថ្ម ជាពិសេសនៅទឹកដីអាហ្វ្រិក ដើម្បី ឲ្យស្របគ្នានឹងការសន្យារបស់ប្រធានាធិបតីចិន ដែលថាចិន សន្យាកាត់បន្ថយ ការបញ្ចេញឧស្ម័នកាបូនិក នៅឆ្នាំ ២០៣០ និងសម្រេចឲ្យបាន កម្មវត្ថុ អព្យាក្រឹតកាបូន ឬ កាត់បន្ថយ ការបញ្ចេញឧស្ម័នផ្ទះកញ្ចក់ ឲ្យដល់កម្រិត សូន្យ នៅ៣០ឆ្នាំក្រោយ។
ប៉ុន្តែ ជាថ្មីម្តងទៀត ចិនដែលជាប្រទេសបញ្ចេញឧស្ម័នកាបូនិកច្រើនជាងគេក្នុងពិភពលោក ពោលគឺ ២៩%នៃឧស្ម័នកាបូនិក សរុបដែលបញ្ចេញទៅក្នុងបរិយាកាស គ្មានចេតនាលះបង់ចោលថាមពលធ្យូងថ្មនោះទេ។ ក្រៅពីបង្កើនមជ្ឈមណ្ឌលថាមពលធ្យូងថ្ម ក្នុងស្រុកចិន ដើម្បីជំរុញសេដ្ឋកិច្ច នៅក្រោយ វិបត្តិកូវីដ ចិនជាអ្នកវិនិយោគធំជាងគេ លើគម្រោងការសាងសង់ រោងចក្រធ្យូងថ្ម នៅទឹកដីបរទេស ជាពិសេស នៅតាមបណ្តាប្រទេស ដែលមានឆ្លងកាត់ គម្រោងផ្លូវសូត្រ ឬផ្លូវមួយ ខ្សែក្រវ៉ាត់ របស់ចិន ដែលមានតាំងពីឥណ្ឌូណេស៊ី នៅទ្វីបអាស៊ីទៅដល់ស៊ីមបាវ៉េ នៅទឹកដីអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ