ជប៉ុនគ្រោងបន្តនិងបន្ថែមដាក់តំបន់មួយចំនួនក្នុងភាពអាសន្នរហូតដល់ចុងខែឧសភា
ប្រឈមនឹងវិបត្តិកូវីដ១៩ ដែលតែគួរឱ្យព្រួយបារម្ភខ្លាំងដដែលនោះ រដ្ឋាភិបាលជប៉ុនទំនងជាត្រូវប្រកាសនៅថ្ងៃសុក្រទី ៧ឧសភានេះ បន្តការដាក់តំបន់មួយចំនួនក្នុងភាពអាសន្នរហូតដល់ថ្ងៃទី ៣១ឧសភា ២០២១។ ក្រុងតូក្យូដែលត្រូវទទួលរៀបចំការប្រកួតកីឡាអូឡាំពិករដូវក្តៅ ឆ្នាំនេះ ក៏ជាប់ក្នុងភាពអាសន្ននេះដែរ។ វិធានការថ្មីនេះមានបញ្ចូល តំបន់ពីរបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៤
ត្រូវផុតឱសានវាទនៅថ្ងៃអង្គារទី ១១ឧសភា ការដាក់តំបន់បួន មានអាទិ៍ក្រុងតូក្យូ អូសាកា ក្យូតូ និងហ៊ីអូហ្កូ ក្នុងភាពអាសន្នតាំងពីថ្ងៃទី ២៥មេសាមក នឹងត្រូវបន្តរហូតដល់ថ្ងៃទី ៣១ឧសភា។ នេះបើតាមសេចក្តីប្រកាសរបស់រដ្ឋមន្ត្រីទទួលបន្ទុកគ្រប់គ្រងវិបត្តិសុខាភិបាល លោក Yasutoshi Nishimura ទៅកាន់សភា នាថ្ងៃសុក្រទី ៧ឧសភា។ ក្រៅពីពន្យារពេល ការដាក់តំបន់ក្នុងភាពអាសន្នក៏ត្រូវពង្រីកបន្ថែមទៀត ៖ តំបន់អៃឈី នៅភាគកណ្តាលនៃប្រទេស និង តំបន់ហ្វូគូអូកា នៅប៉ែកនីរតី បានក្លាយជាតំបន់ពីរថ្មីដែលត្រូវជាប់ក្នុងភាពអាសន្ន ស្របតាមវិធានការថ្មី។
នេះជាលើកទីបីហើយ ក្នុងរយៈពេលតែជាងមួយឆ្នាំបន្តិច ដែលជប៉ុនបានសម្រេចបើវិធានការដាក់តំបន់ក្នុងភាពអាសន្នដើម្បីប្រយុទ្ធប្រឆាំងនឹងជំងឺរាតត្បាតកូវីដ១៩។ ប៉ុន្តែ វិធានការ “ដាក់ក្នុងភាពអាសន្ន” របស់ជប៉ុនមិនសូវតឹងតែងខ្លាំង ដូចការចំណាត់ការបិទខ្ទប់ប្រទេសនៅតាមបណ្តាប្រទេសមួយចំនួនលើពិភពលោកទេ។
តាមរយៈវិធានការនេះ បាររង្គសាលត្រូវបិទជាបណ្តោះអាសន្ន អាហារដ្ឋានមិនអាចលក់គ្រឿងស្រវឹងដល់ភ្ញៀវទេ។ បើល្មើសនឹងត្រូវបង់ពិន័យ។ ហាងទំនិញខ្លះ ក៏ត្រូវស្នើឱ្យបិទទ្វារដែរ។ ចំណែកព្រឹត្តិការណ៍កីឡា អាចប្រព្រឹត្តទៅបាន តែដោយគ្មានអ្នកចូលរួមទស្សនា។ ប៉ុន្តែបើតាមប្រភពសារព័ត៌មានក្នុងស្រុក រដ្ឋាភិបាលជប៉ុនត្រូវអនុម័តសម្រេចនៅថ្ងៃនេះ ថាគួរឱ្យទស្សនិកជនចូលស្តាត បានមួយភាគ។
ជប៉ុនរាប់ឃើញមានករណីឆ្លងថ្មី ៥៣០០នាក់ ជាមធ្យមក្នុងមួយថ្ងៃ។ មិនច្រើនខ្លាំងទេ ប្រសិនបើប្រៀបធៀបទៅប្រទេសដទៃ ប៉ុន្តែប្រព័ន្ធសុខាភិបាលជប៉ុនសោះខ្យល់ហើយ ហើយយុទ្ធនាការចាក់ថ្នាំបង្ការអូសជើងយ៉ាងខ្លាំង។ សន្ទុះកំណើនអ្នកឆ្លងថ្មីនេះ កំពុងគំរាមកំហែងយ៉ាងខ្លាំងពិធីប្រកួតកីឡាអូឡាំពិក ដែលបានលើកពេលអស់មួយឆ្នាំហើយ ត្រូវប្រពឹត្តទៅនៅថ្ងៃទី២៣កក្កដាដល់ថ្ងៃទី៨សីហា២០២១នេះ។ រដ្ឋាភិបាលជប៉ុន អ្នករៀបចំ និងគណៈកម្មការអូឡាំពិកអន្តរជាតិ ធានាថាកម្មវិធីនឹងប្រព្រឹត្តទៅដោយសុវត្ថិភាព និងដោយគ្មានទស្សនិកជន។ តែពលរដ្ឋជប៉ុននៅតែព្រួយបារម្ភ ចំពោះវត្តមាននិងការមកដល់នៃក្រុមកីឡាករដល់ទៅជាង២០០ប្រទេស ទើបនាំគ្នាធ្វើញ្ញាត ទាមទារលុបចោល ការប្រកួតកីឡាអូឡាំពិកក្រុងតូក្យូ តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ