ជប៉ុន៖វិបត្តិកូវីដ១៩ បានធ្វើឲ្យផលិតផលសរុបក្នុងស្រុកដាំក្បាលចុះនៅត្រីមាសទី១ ឆ្នាំ ២០២១
នៅក្នុងប្រទេសជប៉ុន ទិន្នន័យបឋមផ្លូវការចេញផ្សាយក្នុងថ្ងៃអង្គារ ទី១៨ ឧសភាឲ្យដឹងថា ៖វិបត្តិកូវីដ១៩ បានធ្វើឲ្យផលិតផលសរុបក្នុងស្រុកដាំក្បាលចុះចំនួន ១,៣% នៅត្រីមាសទី១ចន្លោះខែមករា និងមីនាឆ្នាំ ២០២១។ ការធ្លាក់ចុះនេះមានចំនួនច្រើនជាងការព្យាកររបស់ក្រុមសេដ្ឋវិទូ Bloomberg ដែលមានត្រឹម ១,១%។ ការធ្លាក់ចុះនូវចាយវាយរបស់ពលរដ្ឋជាមូលហេតុសំខាន់នៃការដាំក្បាលចុះនូវផលិតផលសរុបក្នុងស្រុក។ ភាពគ្មានសុទិដ្ឋិនិយមក៏មានសម្រាប់ត្រីមាសទី២ ចន្លោះខែមេសា និងមិថុនាដែរ។ តែជប៉ុនអាចនឹងស្គាល់កំណើនសន្ទុះសេដ្ឋកិច្ចឡើងវិញនៅឆមាសទី២ ខាងមុខ ប្រសិនបើមានការពន្លឿនយុទ្ធនាការចាក់វ៉ាក់សាំង។
ចុះផ្សាយនៅថ្ងៃ៖
ការចាយវាយរបស់ពលរដ្ឋជប៉ុននៅត្រីមាសទី១ ឆ្នាំ ២០២១ បានធ្លាក់ចុះ ១,៤% ក្រោមសូន្យ។ ចំណែកការធ្លាក់ចុះនៃការចាយវាយរបស់ពលរដ្ឋនេះបានចេញពីការដាំក្បាលចុះជាថ្មីនូវវិបត្តិកូវីដ១៩ ធ្ងន់ធ្ងរ និងការប្រកាសដាក់តំបន់មួយចំនួនក្នុងភាពអាសន្នបិទខ្ទប់កាលពីដើមខែមករា។ វិធានការអាសន្នមួយនេះដែលគ្រោងលើកចេញវិញចាប់ពីខែកុម្ភៈត្រូវបានរដ្ឋាភិបាលបន្តរហូតខែមីនាសម្រាប់ទីក្រុងតូក្យូ និងតំបន់ចំនួន ៣ នៅជុំវិញក្រុងតូក្យូ។ បន្ទាប់មកក្នុងខែមេសា និងប្រឈមនឹងកំណើនករណីឆ្លងកូវីដ១៩ ជាថ្មី រដ្ឋាភិបាលបានប្រកាសដាក់ភាពអាសន្នឡើងវិញជាមួយនឹងវិធានការតឹងតែងជាងមុន។ វិធានការអាសន្នថ្មីនេះនឹងបន្តរហូតដល់ថ្ងៃទី៣១ ឧសភា។
មានការលើកឡើងថា ភាពអូសជើងរបស់ជប៉ុននៅក្នុងវិបត្តិកូវីដ១៩ បានកើតឡើងពីភាពយឺតយ៉ាវនៅក្នុងយុទ្ធនាការចាក់សវ៉ាក់សាំង។ បើធៀបនឹងប្រទេសឧស្សាហកម្មផ្សេងទៀត មានប្រជាជនជប៉ុនតែជាង ១% ប៉ុណ្ណោះដែលបានចាក់វ៉ាក់សាំងបង្ការកូវីដ១៩ ចំនួនពីរដូស។ Pfizer ជាវ៉ាក់សាំងតែមួយគត់ដែលរដ្ឋអំណាចសុខាភិបាលជប៉ុនអនុញ្ញាតឲ្យប្រើ។ ប្រឈមនឹងការរិះគន់ក្នុងរឿងចាក់វ៉ាក់សាំងនេះ រដ្ឋាភិបាលបានបង្កើតឡើងនូវមជ្ឈមណ្ឌលចាក់វ៉ាក់សាំងនៅក្រុងតូក្យូ និងអូសាកា ហើយបានប្រើកម្លាំងស្វ័យកាពារឲ្យចូលរួមនៅក្នុងយុទ្ធនាការចាក់វ៉ាក់សាំង។ កម្មវត្ថុរបស់រដ្ឋាភិបាល គឺចាក់លើមនុស្សអាយុពី ៦៥ឆ្នាំឡើងទៅ ពោលមានប្រមាណជា ៣៦លាននាក់នៅដំណាច់ខែកក្កដា។
ដោយឡែក ជប៉ុនត្រៀមធ្វើជាម្ចាស់ផ្ទះរៀបចំកីឡាអូឡាំពិកពីថ្ងៃទី២៣ កក្កដាដល់ថ្ងៃទី៨ សីហា។ ព្រឹតិ្តការណ៍កីឡាមួយនេះត្រូវបានរដ្ឋាភិបាលសង្ឃឹមចូលរួមជួយឲ្យមានការចាយវាយ។ តែបញ្ហានៅត្រង់ថា ប្រជាជនជប៉ុនភាគច្រើនបានទាមទារឲ្យលុបចោលព្រឹត្តិការណ៍កីឡានេះវិញដោយបារម្ភពីការធ្លាក់ដុនដាបថែមទៀតនូវវិបត្តិកូវីដ១៩។ យ៉ាងណាក៏ដោយ ក្រុមសេដ្ឋវិទូបានភ្ជាប់ការមានសន្ទុះសេដ្ឋកិច្ចឡើងវិញនៅឆមាសទី២ ឆ្នាំ ២០២១ ទៅនឹងការពន្លឿនយុទ្ធនាការចាក់វ៉ាក់សាំង។ មូលនិធិរូបិយវត្ថុអន្តរជាតិបានព្យាករថា ជប៉ុននឹងមានកំណើនសេដ្ឋកិច្ច ៣,៣% សម្រាប់ឆ្នាំ ២០២១។ តែអង្គការនៃកិច្ចសហប្រតិបត្តិការ និងអភិវឌ្ឍន៍សេដ្ឋកិច្ចបានព្យាករត្រឹម ២,៧%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ