រដ្ឋមន្រ្តីការបរទេសជប៉ុន ថា ជប៉ុននឹងអាចផ្អាកជំនួយអភិវឌ្ឍទាំងអស់សម្រាប់ភូមា
ប្រទេសជប៉ុន តាមរយៈ រដ្ឋមន្រ្តីការបរទេស លោក Toshimitsu Motegi បានព្រមានថា ជប៉ុននឹងផ្អាកជំនួយទាំងអស់សម្រាប់ភូមា បើសិន ជាស្ថានការណ៍ នៅភូមា មិនល្អប្រសើរទេនោះ។ នៅក្នុងសន្និសីទកាសែត នៅថ្ងៃសុក្រនេះដែរ អ្នកកាសែត ជប៉ុន ដែលទើបត្រូវរបបសឹកដោះលែង និងត្រលប់ទៅជប៉ុនវិញ កាលពី សប្តាហ៍មុន បានអំពាវនាវសុំឲ្យរដ្ឋាភិបាលជប៉ុន ចាត់វិធានការជាក់ស្តែង សម្រាប់ប្រជាជនភូមា។
ចុះផ្សាយនៅថ្ងៃ៖
ស្តាប់ - ០២:៣០
ជប៉ុន ដែលជាប្រទេសផ្តល់ជំនួយសំខាន់មួយ សម្រាប់ភូមា បានព្រមានផ្អាកជំនួយទាំងអស់បើសិន ជាស្ថានការណ៍នៅភូមា សព្វថ្ងៃនៅតែបន្ត។ នៅក្នុងបទសម្ភាសន៍ជាមួយកាសែតសេដ្ឋកិច្ចជប៉ុន Nikkei ដែលចេញផ្សាយ នៅថ្ងៃសុក្រនេះ រដ្ឋមន្រ្តីការបរទេសជប៉ុន បានអះអាងថា បើសិនគ្មានជម្រើស ជប៉ុននឹងផ្អាករាល់ជំនួយអភិវឌ្ឍសម្រាប់ភូមា ចំណែកក្រុមហ៊ុនឯកជនជប៉ុន ក៏នឹងអាចពិបាក បោះទុនវិនិយោគ ទៅថ្ងៃមុខ នៅភូមា នោះបើទោះបីជាគេចង់ក៏ដោយ។
“ជប៉ុនមិនចង់ឲ្យមានថ្ងៃនោះទេ ប៉ុន្តែ ជប៉ុនចង់បញ្ជាក់ដោយម៉ឺងម៉ាត់ថា វាលំបាក ដែលគេត្រូវបន្តផ្តល់ជំនួយ ក្នុងកាលៈទេសៈ សព្វថ្ងៃនេះ” នេះជាប្រសាសន៍របស់រដ្ឋមន្រ្តីការបរទេសជប៉ុន លោក Toshimitsu Motegi។ ក្នុងនាមខ្លួនជាប្រទេសមិត្តរបស់ភូមា និងជាអ្នកគាំទ្រ ដំណើរការលទ្ធិប្រជាធិបតេយ្យ នៅភូមា រហូតមក ជប៉ុន ត្រូវតំណាងសហគមន៍អន្តរជាតិ និងនាំយកសារមួយនេះ ទៅប្រាប់យោធាភូមា។
ជប៉ុនជាប្រទេសផ្តល់ជំនួយសំខាន់ សម្រាប់ការអភិវឌ្ឍន៍នៅភូមា ដោយបានផ្តល់ជំនួយទៅឲ្យប្រទេសនេះ ប្រមាណ ១ពាន់ ៤រយលានអឺរ៉ូ ក្នុងមួយឆ្នាំ (ពីឆ្នាំ២០១៩ ដល់ឆ្នាំ ២០២០)។
ប្រតិកម្មទៅនឹងរដ្ឋប្រហាររបស់មេដឹកនាំយោធាភូមា កាលពីថ្ងៃទី ១ខែកុម្ភៈកន្លងទៅ ជប៉ុនធ្លាប់បានប្រកាសផ្អាកគម្រោងការផ្តល់ជំនួយថ្មី ប៉ុន្តែ មិនបានចាត់វិធានការ ដាក់ទណ្ឌកម្មសេដ្ឋកិច្ចជាលក្ខណៈបុគ្គលទៅលើមេក្រុមដឹកនាំយោធាភូមា ដូចដែលអាមេរិក សហភាពអឺរ៉ុបនិងអង់គ្លេស បានធ្វើនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ