ប្រតិបត្តិការបង្ក្រាបគ្រឿងញៀន៖ ប្រធានាធិបតីហ្វីលីពីន នឹងមិនសហការក្នុងការស៊ើបអង្កេតរបស់តុលាការព្រហ្មទណ្ឌអន្តរជាតិ
នៅថ្ងៃទី១៥មិថុនានេះ អ្នកនាំពាក្យប្រធានាធិបតីហ្វីលីពីន បានបញ្ជាក់ថា លោកប្រធានាធិបតី ឌុយទែរតឺ នឹងមិនសហការនៅក្នុងការស៊ើបអង្កេត របស់តុលាការព្រហ្មទណ្ឌអន្តរជាតិ ស្តីពីការសម្លាប់មនុស្ស ក្នុងប្រតិបត្តិការបង្ក្រាបគ្រឿងញៀន នៅហ្វីលីពីនឡើយ។ តុលាការព្រហ្មទណ្ឌអន្តរជាតិ បានបើកការស៊ើបអង្កេតបឋម នៅដើមឆ្នាំ២០១៨ ដោយសង្ស័យថា សមត្ថកិច្ចហ្វីលីពីន បានសម្លាប់មនុស្សក្រៅប្រព័ន្ធច្បាប់ ជាច្រើនពាន់នាក់ នៅក្នុងប្រតិបត្តិបង្ក្រាបគ្រឿងញៀន ក្រោមការបញ្ជាររបស់លោកប្រធានាធិបតី ឌុយទែរតឺ។ ការចោទប្រកាន់ ដែលភាគីហ្វីលីពីន បានប្រកែកជានិច្ច។
ចុះផ្សាយនៅថ្ងៃ៖
ស្តាប់ - ០២:៤៣
នៅថ្ងៃចន្ទ ទី១៤មិថុនា ថ្ងៃចុងក្រោយនៃអាណត្តិរបស់ខ្លួន លោកស្រី ហ្វាទូ បេនស៊ូដា (Fatou Bensouda) រដ្ឋអាជ្ញាតុលាការព្រហ្មទណ្ឌអន្តរជាតិ (CPI/ICC) បានប្រកាសបើកការស៊ើបអង្កេត ស្តីពីករណីសម្លាប់មនុស្សជាច្រើនពាន់នាក់ ឬអាចដល់ម៉ឺននាក់ផង បង្កឡើងដោយសមត្ថកិច្ចហ្វីលីពីន នៅក្នុងប្រតិបត្តិការបង្ក្រាបគ្រឿងញៀន។
លោកស្រីរដ្ឋអាជ្ញា បានអះអាងថា ក្រុមការងាររបស់លោកស្រី មានព័ត៌មាន និងមូលដ្ឋានសមហេតុសមផល ដែលអនុញ្ញាតឲ្យជឿថា មានករណីឧក្រិដ្ឋកម្មប្រឆាំងមនុស្សជាតិ នៅលើទឹកដីហ្វីលីពីន ចន្លោះពីខែកក្កដា២០១៦ ដល់ខែមីនា២០១៩។ លោកស្រីបន្ថែមថា ទោះបី ហ្វីលីពីន បានដកខ្លួនចេញពីសមាជិកភាព នៃតុលាការព្រហ្មទណ្ឌអន្តរជាតិក៏ដោយ តែតុលាការនេះ នៅតែមានអំណាចយុត្តាធិការស៊ើបអង្កេត និងឈានទៅបើកការជំនំជំរះ។
ឆ្លើយតបទៅនឹងការប្រកាសនេះ អ្នកនាំពាក្យប្រធានាធិបតីហ្វីលីពីន បានបញ្ជាក់ឲ្យដឹង នៅថ្ងៃអង្គារទី ១៥មិថុនាថា លោកប្រធានាធិបតី ឌុយទែរតឺ នឹងមិនសហការជាដាច់ខាត នៅក្នុងការស៊ើបអង្កេតនេះ រហូតដល់ចប់អាណត្តិនៅខែមិថុនា ឆ្នាំ២០២២។ មន្ត្រីហ្វីលីពីនដដែល បានលើកឡើងថា ការចោទប្រកាន់មកលើអាជ្ញាធរ ក៏ដូចជាប្រព័ន្ធយុត្តិធម៌ហ្វីលីពីន ថាបានសម្លាប់មនុស្សខុសច្បាប់ វាហាក់បីដូចជាការជេរប្រមាថ មកលើប្រជាជនហ្វីលីពីនទាំងមូល។ លោកអះអាងថា បើការសម្លាប់មនុស្សមានពិតមែន តែវាជាការប្រើកម្លាំងបង្ក្រាប ដោយសមស្របបំផុតដែរ។
គួររំលឹកថា យោងតាមតួលេខផ្លូវការ មានមនុស្សប្រមាណ ៦០០០នាក់ ត្រូវបានសម្លាប់ នៅក្នុងប្រតិបត្តិការបង្រ្កាបគ្រឿងញៀន បន្ទាប់ពីលោក ឌុយទែរតឺ បានចូលកាន់តំណែងនៅឆ្នាំ២០១៦។ក៏ប៉ុន្តែ អង្គការសិទ្ធិមនុស្សមួយចំនួន បានលើកឡើងថា ចំនួនអ្នកស្លាប់អាចមានច្រើនជាងនេះ។ កាលពីខែមិថុនាឆ្នាំ២០២០ ការិយាល័យសិទ្ធិមនុស្ស នៃអង្គការសហប្រជាជាតិ បានចេញរបាយការណ៍មួយ ដោយបានលើកឡើងថា នៅឆ្នាំ២០១៦ នគរបាលហ្វីលីពីន ត្រូវបានថ្នាក់ដឹកនាំហ្វីលីពីនលើកទឹកចិត្ត ឲ្យបាញ់សម្លាប់គ្រប់មនុស្សទាំងអស់ ឲ្យតែសង្ស័យថាជាអ្នកជួញដូរគ្រឿងញៀន។ សមត្ថកិច្ចមូលដ្ឋាន បានធ្វើបញ្ជីឈ្មោះ ជនសង្ស័យទាំងអស់ ដែលត្រូវបាញ់សម្លាប់ចោល។
ក្រោយការប្រកាស អំពីការបើកការស៊ើបអង្កេតជាផ្លូវការនេះ លោកស្រី Agnès Callamard នាយកអង្គការ Amnesty International បានលើកឡើងថា នេះគឺជាការផ្តល់ក្តីសង្ឃឹម ដើម្បីរកយុត្តិធម៌ ជូនជនងរងគ្រោះ ក៏ដូចជាក្រុមគ្រួសារជនរងគ្រោះហ្វីលីពីន។ ដូចគ្នាដែរ អង្គការ Human Rights Watch បានលើកឡើងថា តុលាការព្រហ្មទណ្ឌអន្តរជាតិ ទើបតែបានប្រាប់ទៅប្រធានាធិបតីហ្វីលីពីន ថាមិនអាចសំងំបន្តរស់ ក្នុងនិទណ្ឌភាពបានទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ