សិង្ហបុរីបើកសម្ភោធ មណ្ឌលផលិតចរន្តអគ្គិសនីដើរដោយផ្ទាំងសូឡា ដ៏ធំបំផុតមួយ
ថ្ងៃពុធ ទី១៤កក្កដា នៅសឹង្ហបុរីមានការសម្ភោធ បើកឲ្យដំណើរការ មណ្ឌលផលិតចរន្តអគ្គិសនីដើរដោយផ្ទាំងសូឡា ដ៏ធំបំផុតមួយ ដែលគេសាងសង់បណ្តែតពីលើផ្ទៃទឹកបឹងសិប្បនិម្មិត។ នេះគឺជាគម្រោងផលិតចរន្តអគ្គិសនីស្អាតស្អំ ដោយប្រើប្រាស់បច្ចេកវិទ្យា និងពន្លឺព្រះអាទិត្យ ដើម្បីឆ្លើយតបទៅនឹង ផែនការកាត់បន្ថយ ការបញ្ចេញឧស្ម័នកាបូនិកទៅក្នុងបរិយាកាស របស់រដ្ឋាភិបាលសិង្ហបុរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ផ្ទាំងសូឡាសរុបផ្ទៃក្រឡា ស្មើនឹងទីលានបាល់ទាត់៤៥ដង ត្រូវបានគេសាសង់ឡើង នៅលើផ្ទៃបឹងសិប្បនិម្មិតមួយកន្លែង នៅប្រទេសសិង្ហបុរី។ ជាមួយនឹងផ្ទាំងសូឡាសរុប ប្រមាណ១២២០០០ផ្ទាំង វាគឺជាមណ្ឌលផលិតអគ្គិសនី ដើរដោយពន្លឺព្រះអាទិត្យ ដ៏ធំមួយ ក្នុងពិភពលោក។
យោងតាម ក្រុមហ៊ុន Sembcorp Industries និងរដ្ឋករទឹកសិង្ហបុរី ដែលជាអ្នកសហការគ្នា សម្រេចគម្រោងនេះ គឺផ្ទាំងសូឡាទាំង ១២២០០០ផ្ទាំងនេះ នឹងអាចផលិតចរន្តអគ្គិសនី បានចំនួន ៦០ម៉េហ្កាវ៉ាត់ ដើម្បីផ្គត់ផ្គង់រោងចក្របន្សុទ្ធទឹក ចំនួន៥ទីទាំង។ ការផលិតអគ្គិសនីដោយប្រើពន្លឺព្រះអាទិត្យនេះ នឹងអនុញ្ញាតឲ្យគេអាច កាត់បន្ថយការបញ្ចេញឧស្ម័នកាបូនិក ស្មើនឹងរថយន្ត៧០០០គ្រឿង ជារឿងរាល់ឆ្នាំ។
គួរបញ្ជាក់ថា បើប្រៀបធៀបទៅនឹងចំនួនប្រជាជន សិង្ហបុរីគឺជាប្រទេសដែលបានបញ្ចេញឧស្ម័នកាបូនិក ទៅក្នុងបរិយាកាស ច្រើនបំផុត។ តែយ៉ាងណា ប៉ុន្មានឆ្នាំចុងក្រោយនេះ រដ្ឋាភិបាលសិង្ហបុរី បានប្រកាសអំពីគម្រោងជាច្រើន ក្នុងការកាត់បន្ថយឧស្ម័នកាបូនិក។ ក៏ប៉ុន្តែជាមួយនឹង ផ្ទៃដីតូចចង្អៀត គឺវាមិនមែនជារឿងងាយស្រួលទេ ក្នុងការសាងសង់ ទីតាំងផលិតថាមពលស្អាតស្អំ។
កាលពីខែកុម្ភៈ រដ្ឋាភិបាលសិង្ហបុរី បានបង្ហាញនូវ « ផែនការបៃតង » របស់ខ្លួន ដែលមានកំណត់នូវ ការដាំដើមឈើ ការកាត់បន្ថយកាកសំណល់សំរាម ព្រមទាំងការសាងសង់បន្ថែម នូវបង្គោលសាកថ្មរថយន្តដើរដោយប្រព័ន្ធអគ្គិសនី ជាដើម។ សិង្ហបុរីមានបំណងផលិតចរន្តអគ្គិសនី បានមកពីផ្ទាំងសូឡា ឲ្យបាន៣% នៅរវាងឆ្នាំ២០៣០ ដែលស្មើនឹងចរន្តអគ្គិសនីប្រើប្រាស់នៅតាមផ្ទះ ចំនួន៣៥០០០០ផ្ទះ ក្នុងមួយឆ្នាំ។
ទោះជាយ៉ាងនេះក្តី ផែនការបៃតង របស់រដ្ឋាភិបាលសិង្ហបុរី នៅតែត្រូវបានអ្នកជំនាញបរិស្ថាន ចាត់ទុកថាមិនគ្រប់គ្រាន់ទេ ខណៈដែលប្រទេសដ៏តូចនេះ នៅតែរំពឹងចរន្តអគ្គិសនីចំនួន៩៥% បានមកពីចំហេះឧស្ម័នធម្មជាតិ និងប្រេងឥន្ធនៈ។ ជាងនេះទៀត វិស័យឧស្ម័ន និងប្រេងឥន្ធនៈ គឺជាដង្ហើមសេដ្ឋកិច្ចមួយ ដែលមានប្រហែសបាន សម្រាប់សិង្ហបុរី។
លោក Red Constantino នាយក Institute for Climate and Sustainable Cities បានលើកឡើងថា ត្រឹមសាងសង់មណ្ឌលផលិតអគ្គិសនីដើរដោយផ្ទាំងសូឡា គឺវាមិនគ្រប់គ្រាន់ទេ។ ដើម្បីកាត់បន្ថយកម្រិតឧស្ម័នកាបូនិកឲ្យបាន១ភាគ២ នៅរវាងឆ្នាំ២០៣០ សិង្ហបុរីត្រូវតែមានវិធានការ និងគម្រោងក្លាហាន រឹងមាំជាងនេះ ដែលឈានទៅកាត់បន្ថយការបញ្ចេញឧស្ម័នកាបូនិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ