អូឡាំពិកតូក្យូដកតំណែងអ្នកគ្រប់គ្រងកម្មវិធីសិល្បៈ នៅមួយថ្ងៃមុនការបើកពិធីជាផ្លូវការ
មានការប្រឆាំងច្រើនមិនឱ្យរៀបចំហើយ អូឡាំពិកតូក្យូ ត្រូវប្រលាក់ប្រលូសដោយរឿងអាស្រូវថ្មីមួយ បន្ថែមទៀត។ នៅមួយថ្ងៃមុនបើកកម្មវិធីកីឡាអូឡាំពិកក្រុងតូក្យូ ប្រធានគ្រប់គ្រងសិល្បៈសម្រាប់ការបើកកម្មវិធី លោក កេនតារ៉ូ កូបាយ៉ាស្ហ៊ី Kentaro Kobayashi ត្រូវបានគេដកចេញពីតួនាទី។ មូលហេតុគឺ បណ្តាលមកពីពាក្យកំប្លែងបែបរើសអើងពូជសាសន៍ ដែលលោកធ្លាប់បានប្រើកាលពី២០ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ការប្រកួតកីឡាអូឡាំពិកក្រុងតូក្យូ ដែលនឹងត្រូវប្រព្រឹត្តទៅក្នុងស្ថានភាពអាប់អួរខុសប្លែកពី កម្មវិធីមុនៗ ដោយហេតុតែខ្លាចជំងឺកូវីដ១៩រាតត្បាតខ្លាំងហើយ ត្រូវប្រឈមនឹងរឿងអាស្រូវ ដកតំណែងប្រធានគ្រប់គ្រង ការបើកកម្មវិធីនៅថ្ងៃ សុក្រទី ២៣កក្កដាស្អែកទៀត។
មានបន្ទុកជាអ្នកសម្របសម្រួលការសម្តែងសិល្បៈ ក្នុងពិធីបើក ការប្រកួតកីឡាអូឡាំពិក លោក កេនតារ៉ូ កូបាយ៉ាស្ហ៊ី មាននិន្នាការបែបរើសអើងពូជសាសន៍ និងស្អប់ខ្ពើមជនជាតិជ្វីហ្វ។ គណៈកម្មការអូឡាំពិកអន្តរជាតិ ទើបបានទទួលដំណឹងថា លោកធ្លាប់បានប្រើភាសាសើចចំអកឱ្យប្រវត្តិសាស្ត្រដ៏ជូរចត់ ហេតុដូច្នេះហើយបានគណៈកម្មការសម្រេចបញ្ឈប់លោកពីតួនាទី។ នេះបើសេចក្តីប្រកាសរបស់លោកស្រី សីកូ ហាស្ហ៊ីម៉ូតូ ប្រធានគណៈកម្មការអូឡាំពិកតូក្យូ-២០២០ ដោយបញ្ជាក់ថាលោកស្រីកំពុងពិចារណា ថាត្រូវចាត់ចែងការបើកកម្មវិធីយ៉ាងណានៅថ្ងៃស្អែក។
សូមបញ្ជាក់ថារឿងហេតុបានកើតឡើងកាលពីឆ្នាំ១៩៩៨។ នៅក្នុងឆាកឈុតវីដេអូនៃរឿងកំប្លែងមួយ លោក កេនតារ៉ូ កូបាយ៉ាស្ហ៊ី និងដៃគូ បានប្រៀបប្រដូចកូនតុក្កតាថាជាល្បែងលេងចុងក្រោយរបស់ជនជាតិជ្វីហ្វ ហើយកំប្លែងបន្តថាម្ចាស់ផលិតកម្មនឹងខឹងព្រោះយកប្រវត្តិសាស្ត្រជ្វីហ្វមកសម្តែងលេង។ ឆាកឈុតនេះបានធ្វើឱ្យអ្នកទស្សនាផ្ទុះសំណើចយ៉ាងខ្លាំង។ លោក កេនតារ៉ូ កូបាយ៉ាស្ហ៊ី ក៏បានសុំទោស ថាពិតជាបានប្រើពាក្យសំដីជ្រុលហួសមែន។
ការដកតំណែងប្រធានគ្រប់គ្រងកម្មវិធីសិល្បៈអូឡាំពិក មិនមែនជារឿងអាស្រូវឯកាទេ។ កាលពីប៉ុន្មានថ្ងៃមុនក៏មានការដកតំណែងអ្នកនិពន្ធបទភ្លេងម្នាក់ដែរ គឺលោក គៃហ្កោ អូយ៉ាម៉ាដា ដោយហេតុតែនៅក្នុងបទសម្ភាសន៍កាលពីឆ្នាំ១៩៩០ លោកបានរំលឹកថាធ្លាប់បានធ្វើ ទុក្ខបុកម្នេញដល់មិត្តរួមថ្នាក់ជាជនពិការ កាលពីលោកនៅក្មេង។ កាលពីខែមីនា អ្នកទទួលខុសត្រូវកម្មវិធីសិល្បៈពេលបើកនិងបិទកីឡាអូឡាំពិក បានសុំលាលែងពីតំណែងបន្ទាប់ពីបានស្នើឱ្យតែងខ្លួនសិល្បការិនីម្នាក់ជាជ្រូក។ នៅមួយខែមុននេះទៀត ប្រធានគណៈកម្មការអូឡាំពិកតូក្យូ២០២០ ដែលជាអតីតនាយករដ្ឋមន្ត្រីជប៉ុនផង បានសម្រេចដើរចេញពីតំណែងបន្ទាប់ពីប្រើភាសាបែបរើសអើងភេទ។
មិនបានទទួលការស្វាគមន៍ពីប្រជាពលរដ្ឋជប៉ុនភាគច្រើនដោយខ្លាចកូវីដស្រាប់ផង រឿងអាស្រូវនេះ បានមកជាន់បង្ខូច រូបភាពនៃកីឡាអូឡាំពិកបន្ថែមមួយកំរិតទៀត និងបានគ្របបាំងបិទនូវប្រធានបទដ៏សំខាន់មួយទៀត គឺវិបត្តិកូវីដ។ កីឡាករវិជ្ជមានកូវីដ ចាប់ប្រកាសបោះបង់ការប្រកួតជាបន្តបន្ទាប់ ដោយហេតុមិនអាចចូលរួមការប្រកួតបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ