លោក ស៊ី ជីនពីង បំពេញទស្សនកិច្ចតំបន់ ទីបេ លើកទី១ ក្នុងនាមជាប្រធានាធិបតី
ប្រធានាធិបតីចិន ស៊ី ជីនពីង ទើបតែបញ្ចប់ដំណើរទស្សនកិច្ចផ្លូវការ ចំនួនពីរថ្ងៃ នៅតំបន់ ទីបេ។ នេះបើតាមទីភ្នាក់ងារព័ត៌មានរដ្ឋចិន ។ បើគិតត្រឹម៣១ឆ្នាំចុងក្រោយ, នេះជាលើកទី១ហើយ ដែលប្រមុខរដ្ឋចិន បានទៅជាន់ដី ទីបេ។
ចុះផ្សាយនៅថ្ងៃ៖
ស្តាប់ - ០២:០៩
ជាបឋម គួរសូមរម្លឹកជូន ថា លោក ស៊ី ជីនពីង បានទៅជាន់ដី ទីបេ ម្តងដែរ កាលពី១០ឆ្នាំមុន គឺឆ្នាំ២០១១ តែគ្រានោះ គឺលោកនៅកាន់មុខតំណែងជា អនុប្រធានាធិបតីចិន នៅឡើយ។ ថ្ងៃទី២១និង២២កក្កដា បុរសខ្លាំងលេខ១របស់ក្រុងប៉េកាំង បានធ្វើទស្សនកិច្ចនៅទីនោះជាថ្មី ក្នុងនាមជាប្រមុខរដ្ឋចិន។ មិនមែនជារឿងចៃដន្យឡើយ ដ្បិតដំណើរទស្សនកិច្ចនេះ ជួនចំ ខួប៧០ឆ្នាំ នៃការវាយលុករបស់កងទ័ពកុម្មុយនីស្តចិន ទៅលើតំបន់ ទីបេ។ ព្រឹត្តិការណ៍នេះ ត្រូវរដ្ឋអំណាចនិងកាសែតរដ្ឋចិន ចាត់ទុកថា ជា«ការជួយរំដោះដោយសន្តិភាព»ទៅវិញ។
តាមរូបភាពពីកញ្ចក់ទូរទស្សន៍ជាតិចិន ប្រជាជននៅទីបេ ស្លៀកពាក់បែបប្រពៃណីចិន និង គ្រវីទង់ជាតិចិន បក់រវិចៗ ដើម្បីស្វាគមន៍លោក ស៊ី ជីនពីង ដែលចុះពីលើយន្តហោះ ហើយបន្តជិះរថភ្លើងសំដៅ ឡាសសា Lhassa ទីក្រុងរបស់ ទីបេ។ ទូរទស្សន៍ CCTV រៀបរាប់ថា លោកប្រធានាធិបតីចិន បានទទួលស្វាគមន៍ដោយក្តីកក់ក្តៅពីជួរថ្នាក់ដឹកនាំមូលដ្ឋាន និងប្រជាពលរដ្ឋចិននៅទីបេ ជម្រុះជាតិពន្ធុ។
ក្នុងដំណើរទស្សនកិច្ចពីរថ្ងៃ មានការយាមកាមសុវត្ថិភាពសម្បើមណាស់។ ក្រុមអ្នកប្រឆាំងប៉េកាំងនិងដែលគាំទ្រការផ្តាច់ទឹកដីនិយម ក៏ត្រូវនគរបាលចិនតាមដានសកម្មភាពយ៉ាងជាប់លាប់មែនទែន។
គួរជ្រាបថា ទីបេ ជាជំរំរបស់ក្រុមពុទ្ធសាសនា គាំទ្រព្រះសង្ឃ Dalaï-Lama ដែលត្រូវរដ្ឋអំណាចចិនចាត់ទុកថា ជាជនផ្តាច់ទឹកដីនិយម។ ព្រះសង្ឃ Dalaï-Lama រស់និរទេសព្រះកាយ គង់នៅក្រៅស្រុក តាំងតែពីឆ្នាំ១៩៥៩ មក។ ទីនេះ ក៏ជាដែនដីយុទ្ធសាស្ត្រស្លាប់រស់ដ៏សំខាន់មួយរបស់ចិន ព្រោះថា វាឋិតនៅចន្លោះព្រំដែន រវាងមហាយក្សឥណ្ឌានិងចិន។ កាលពីឆ្នាំទៅវិញ មហាយក្សទាំងពីរ ប៉ះទង្គិចគ្នានឹងអាវុធ មានស្លាប់និងរបួស ទាំងពីរខាង ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ