នូវែលសេឡង់កំពុងប្រឈមនឹងសន្ទុះកំណើនករណីឆ្លងមេរោគបំប្លែងខ្លួនដែលតា
នូវែលសឡង់កំពុងរងការគំរាមកំហែងពីការឆ្លងរីករាលដាលកូវីដបង្កឡើងដោយមេរោគបំប្លែងខ្លួនដែលតា។ ហេតុដូច្នោះហើយទើបរដ្ឋាភិបាលនូវែលសេឡង់ទទួលស្គាល់នៅថ្ងៃអាទិត្យ ២២ សីហានេះថាយុទ្ធសាស្ត្រ “ហ្សេរ៉ូកូវីដ”របស់ខ្លួនទំនងជាពិបាកនឹងសម្រេចទៅបានណាស់។
ចុះផ្សាយនៅថ្ងៃ៖
ស្តាប់ - ០២:១០
នូវែលសេឡង់ដែលជាប្រទេសទទួលបានការកោតសរសើរយ៉ាងខ្លាំងចំពោះចំណាត់ការឆ្លើយតបនឹងជំងឺកូវីដ ឥឡូវនេះកំពុងតែប្រឈមនឹងកំណើនករណីឆ្លងមេរោគបំប្លែងខ្លួនដែលតា។ រដ្ឋមន្រ្តីនូវែលសេឡង់ទទួលបន្ទុកដោះស្រាយវិបត្តិជំងឺកូវីដលោកគ្រីស ហ៊ីបគីន (Chris Hipkins) បានរាយការណ៍ថាមាន អ្នកឆ្លង ២១ ករណីបន្ថែមទៀតក្រោយការឆ្លងរាលដាលផ្ទុះឡើង នៅទីក្រុងអូកឡិន Auckland កាលពីសប្តាហ៍មុន។
លោកហ៊ីបគីន បានមានប្រសាសន៍ថា មេរោគដែលតាដែលឆ្លងខ្លាំងនិងលឿនរហ័សបណ្តាលឲ្យអាជ្ញាធរមានការពិបាកក្នុងការសម្រេចបាននូវមហិច្ឆតាធ្វើឲ្យករណីឆ្លងកូវីដធ្លាក់ដល់កម្រិតសូន្យ។ ស្ថិតក្នុងករណីនេះ រដ្ឋាភិបាលនូវែលសេឡង់កំពុងចោទជាសួរថាតើយុទ្ធសាស្រ្តលុបបំបាត់កូវីដឬហ្សេរ៉ូកូវីដអាចសម្រេចទៅរួចឬក៏អត់?
បើយោងតាមរដ្ឋអំណាចនូវែលសេឡង់ ទំហំនៃការឆ្លងនិងល្បឿនដែលមេរោគដែលតាបានរីករាតត្បាតបង្ហាញថាគេពិបាកនឹងទប់ស្កាត់មេរោគបំប្លែងខ្លួនដែលតាណាស់ ទោះបីជាវិធានរឹតត្បិតផ្សេងៗដូចជាការបិទខ្ទប់ប្រទេសជាដើមត្រូវបានដាក់ឲ្យអនុវត្តហើយក៏ដោយ។
គួរគូសបញ្ជាក់ថា មុនការផ្ទុះករណីឆ្លងមេរោគបំប្លែងខ្លួនដែលតាកាលពីសប្តាហ៍មុន អស់រយៈពេល៦ ខែមកហើយដែលនូវែលសេឡង់មិនដែលជួបករណីឆ្លងកូវីដទាលតែសោះ។ នូវែលសេឡង់ជាប្រទេសមានកំណត់ត្រាល្អខាងគ្រប់គ្រងជំងឺកូវីដ១៩ និងមានអ្នកស្លាប់តែ ២៦ នាក់ប៉ុណ្ណោះក្នុងចំណោមប្រជាជនសរុបប្រមាណ៥លាននាក់។
ដើម្បីទប់ស្កាត់កូវីដ អាជ្ញាធរពឹងផ្អែកលើការអនុវត្តវិធានការត្រួតពិនិត្យព្រំដែនតឹងរ៉ឹង និងការបិទខ្ទប់ប្រទេស។ ដោយឡែកការផ្ទុះឡើងនៃករណីឆ្លងកូវីដជាថ្មី បានបង្កឲ្យមានការរិះគន់ ថា រដ្ឋាភិបាលនូវែលសេឡង់ មានភាពយឺតយ៉ាវក្នុងដំណើរការចាក់វ៉ាក់សាំង និងជំរុញឲ្យមានការចោទប្រកាន់ដែរថារដ្ឋាភិបាលមានភាពធូររលុង បន្ទាប់ពីទទួលជោគជ័យក្នុងការទប់ស្កាត់កូវីដកាលពីគ្រាដំបូង។
មានប្រជាជននូវែលសេឡង់ប្រមាណតែ ២០ %ប៉ុណ្ណោះដែលទទួលបានថ្នាំវ៉ាក់សាំងបង្ការកូវីដដែលនេះជាអត្រាទាបបំផុតមួយក្នុងចំណោមប្រទេសអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ