ប្រទេសលោកខាងលិច សម្តែងការខកចិត្ត ក្រោយក្រុមតាលីបង់បង្ហាញសមាសភាពរដ្ឋាភិបាល
ក្រុមតាលីបង់ បានបង្ហាញសមាសភាពមួយផ្នែក នៃរដ្ឋាភិបាលបណ្តោះអាសន្នរបស់ខ្លួន កាលពីថ្ងៃពុធ ទី៨កញ្ញា។ ក្នុងចំណោមសមាជិកនៃរដ្ឋាភិបាលនេះ មានមួយចំនួនធ្លាប់ជាប់ពាក់ព័ន្ធនឹងបណ្តាញភេរវកម្មអាល់កៃដា និងជាប់ក្នុងបញ្ជីរខ្មៅរបស់អង្គការសហប្រជាជាតិថែមទៀតផង។ សហរដ្ឋអាមេរិក និងសហភាពអឺរ៉ុប បានថ្លែងការខកចិត្ត និងការព្រួយបារម្ភ ដោយលើកឡើងថា រដ្ឋាភិបាលក្រុមតាលីបង់ ជារដ្ឋាភិបាលដែលគ្មានមនុស្សស្រីចូលរួម និងជារដ្ឋាភិបាលដែលគ្មានការប្រមូលឯកភាព ជាមួយតំណាងភាគីផ្សេងៗទៀត របស់អាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:២៦
រដ្ឋាភិបាលថ្មីរបស់ក្រុមតាលីបង់ នឹងដឹកនាំដោយ Mohammad Hassan Akhund អតីតមនុស្សស្និទ្ធនឹងស្ថាបនិកក្រុមតាលីបង់ Mollah Omar។ យោងតាមលោក Bill Roggio និពន្ធនាយកកាសែត Long War Journal គឺឈ្មោះ Mohammad Hassan Akhund នេះហើយ ដែលជាអ្នកបញ្ជាឲ្យក្រុមតាលីបង់ កម្ទេចព្រះពុទ្ធបដិមាដ៏ធំ នៅBamiyan កាលពីឆ្នាំ២០០១។
ក្នុងចំណោមសមាសភាព ដែលក្រុមតាលីបង់បានប្រកាស រដ្ឋាភិបាលថ្មីនេះគ្មានមនុស្សស្រីសូម្បីតែម្នាក់ ហើយភាគច្រើនគឺសុទ្ធតែជាមនុស្ស មកពីក្រុមជនជាតិប៉ាឆទូន។ ជាងនេះទៀត ក្នុងចំណោមរដ្ឋមន្ត្រីរបស់ក្រុមតាលីបង់ គឺមានមួយចំនួន ស្ថិតនៅក្នុងបញ្ជីរខ្មៅរបស់អង្គការសហប្រជាជាតិ និងខ្លះទៀតធ្លាប់ជាប់ឃុំនៅមន្ទីរឃំឃាំង Guantanamo របស់អាមេរិកថែមទៀតផង។ សមាជិកខ្លះនៃបណ្តាញ Haqqani ដែលស្និទនឹងក្រុម អាល់កៃដា ហើយដែលអាមេរិក ចាត់ទុកថាជាក្រុមភេវកម្មនោះ ក៏មានឈ្មោះដឹកនាំក្រសួង ក្នុងរដ្ឋាភិបាលថ្មី របស់ក្រុមតាលីបង់ដែរ។
សហភាពអឺរ៉ុប បានប្រតិកម្មថា រដ្ឋាភិបាលរបស់ក្រុមតាលីបង់ ពុំមានលក្ខណៈបង្រួមបង្រួមជាតិ និងតំណាងពីគ្រប់មជ្ឈដ្ឋានសង្គមអាហ្វហ្កានីស្ថាននោះទេ។ នេះសបង្ហាញឲ្យឃើញថា ក្រុមតាលីបង់ មិនបានគោរពលក្ខខណ្ឌ មួយក្នុងចំណោមលក្ខខណ្ឌធំៗទាំង៥ ដើម្បីអាចទទួលបានការទទួលស្គាល់ផ្នែកការទូត ពីសំណាក់អឺរ៉ុប។ ដោយឡែក លោកលោក អង់តូនី ប្លីងកិន ប្រមុខការបរទេសអាមេរិក បានលើកឡើង ពីអវត្តមានស្ត្រី នៅក្នុងរដ្ឋាភិបាលតាលីបង់ ព្រមទាំងបង្ហាញការបារម្ភដែលឃើញ រដ្ឋមន្ត្រីខ្លះរបស់ក្រុមតាលីបង់ គឺជាមនុស្សធ្លាប់ចូលរួមក្នុងបណ្តាញភេរវកម្ម។ នៅថ្ងៃពុធទី៨កញ្ញា លោកប្រមុខការបរទេសអាមេរិក បានចាប់ផ្តើមនិយាយជាមួយប្រទេសសម្ព័ន្ធមិត្តនៅអឺរ៉ុប ដើម្បីកំណត់គោលជំហររួមមួយ ដែលត្រូវប្រកាន់ ជាមួយរដ្ឋាភិបាលថ្មីរបស់ក្រុមតាលីបង់។
យ៉ាងណាក៏ដោយ អ្នកនាំពាក្យក្រុមតាលីបង់ បានអះអាងថា សមាសភាពដែលគេទើបតែប្រកាស គឺមិនទាន់ពេញគ្រប់គ្រាន់ នៅឡើយទេ។ ចលនាតាលីបង់ នឹងព្យាយាមបញ្ចូលមនុស្សបន្ថែមទៀត ជាតំណាងភាគីនយោបាយ និងជនជាតិផ្សេងៗនៅអាហ្វហ្កានីស្ថាន។ គួរបញ្ជាក់ថា គិតត្រឹមពេលនេះ ក្រៅពីបានរក្សាស្ថានទូតខ្លួនប្រចាំក្រុងកាប៊ុល ឲ្យបន្តការងារធម្មតា ចិនគឺជាប្រទេសតែមួយគត់ ក្នុងចំណោមប្រទេសមហាអំណាច ដែលបានថ្លែងអបអរ ចំពោះការប្រកាសសមាសភាពរដ្ឋាភិបាលក្រុមតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ