អាហ្វហ្កានីស្ថានក្រោមការដឹកនាំរបស់តាលីបង់នឹងចាប់មាន ជើងហោះហើរពាណិជ្ជកម្មធម្មតាឡើងវិញ
បន្ទាប់ពីត្រូវ បិទ មិនដំណើរការ អស់ប៉ុន្មានថ្ងៃ ដោយសារ ការដកទ័ពអាមេរិក ទាំងស្រុង ចេញពីអាហ្វហ្កានីស្ថាន សកម្មភាពដឹកជញ្ជូន នៅព្រលានយន្តហោះ ក្រុងកាប៊ូលបានចាប់ដំណើរការមកវិញ។ នៅថ្ងៃព្រហស្បតិ៍ និងថ្ងៃសុក្រ យន្តហោះរបស់ក្រុមហ៊ុនកាតារ បានដឹកជម្លៀសជនបរទេស ជិត ២០០នាក់ ចេញពី ទីក្រុងកាប៊ុល។ ប៉ាគីស្ថានអះអាងកាលពីថ្ងៃសៅរ៍ថា នឹង ផ្តើមជើងហោះហើរពាណិជ្ជកម្មធម្មតាឡើងវិញ ជាមួយ ក្រុងកាប៊ុលចាប់ពីថ្ងៃចន្ទ ស្អែក (ទី ១៣ កញ្ញា)។
ចុះផ្សាយនៅថ្ងៃ៖
ស្តាប់ - ០៣:៣១
២០ឆ្នាំក្រោយ ភេរវកម្មវាយប្រហារក្រុងញូវយ៉ក ១១កញ្ញា ដែលឈាន ទៅផ្តួលអំណាចរបស់ខ្លួន នៅអាហ្វហ្កានីស្ថាន ក្រុមតាលីបង់ ដែលឈ្នះសង្រ្គាម ត្រលប់មកគ្រប់គ្រង ប្រទេស ឡើងវិញ នៅពាក់កណ្តាល ខែសីហា បានព្យាយាម បញ្ជាក់អំណាចដឹកនាំ របស់ខ្លួន តាមរយៈ ការដាក់ឲ្យដំណើរការសេដ្ឋកិច្ច ជាធម្មតាឡើងវិញ។
ជើងហោះហើរពាណិជ្ជកម្ម រវាងទីក្រុងអ៊ីស្លាម៉ាបាត ទៅទីក្រុងកាប៊ុល ចាប់ពីថ្ងៃចន្ទ ជាសញ្ញាបញ្ជាក់ពីការទទួលស្គាល់អំណាចគ្រប់គ្រងរបស់រដ្ឋាភិបាលតាលីបង់ នៅអាហ្វហ្កានីស្ថាន។ តាមក្រុមហ៊ុន ហោះហើរជាតិប៉ាគីស្ថាន យន្តហោះ ដឹកអ្នកដំណើរចេញពីទីក្រុងអ៊ីស្លាម៉ាបាត ទៅកាន់ទីក្រុងកាប៊ុល នឹងចាប់ដំណើរការ ជាប្រក្រតីឡើងវិញ នៅថ្ងៃចន្ទ។ គិតរហូតមកដល់ថ្ងៃសៅរ៍ មានអ្នកដំណើរ ៧២នាក់ ដែលមានតាំងពីអ្នកកាសែត និងបុគ្គលិកផ្នែកមនុស្សធម៌ ចង់ធ្វើដំណើរចូលទៅអាហ្វហ្កានីស្ថាន។
ក្រុមហ៊ុនហោះហើរជាតិប៉ាគីស្ថាន ជាក្រុមហ៊ុនអន្តរជាតិ លើកដំបូងគេ ដែលចាប់អនុវត្តជើងហោះហើរ ពាណិជ្ជកម្ម ទៅកាន់អាហ្វហ្កានីស្ថាន ក្រោម របបដឹកនាំថ្មីរបស់ពួកតាលីបង់។ ការបើកឲ្យមានជើងហោះហើរ អន្តរជាតិ នៅព្រលានយន្តហោះកាប៊ុល ជាផ្នែកមួយនៃការប្រឹងប្រែងការទូតរបស់អាមេរិក ដែលបានសន្យា ជម្លៀស បញ្ជូនចេញ ប្រជាជនអាមេរិកាំង និងប្រជាជនអាហ្វហ្កានីស្ថាន ដែលចង់ចេញពីអាហ្វហ្កានីស្ថាន នៅក្រោយ អាមេរិកដកទ័ពចេញទាំងស្រុងពីអាហ្វហ្កានីស្ថាន។
សូមបញ្ជាក់ថា ចាប់តាំងពីក្រុមតាលីបង់ ធ្វើឲ្យគេភ្ញាក់ផ្អើល ដោយធ្វើសង្រ្គាមតែប៉ុន្មានខែ ឈ្នះចូលគ្រប់គ្រង ប្រទេសឡើងវិញ អាមេរិក និងប្រទេសលោកខាងលិច ជាច្រើនបានដឹកជម្លៀសប្រជាជនរបស់ខ្លួន ដោយប្រថុចញ៉ុច បំផុត ចេញពីអាហ្វហ្កានីស្ថាន។ នៅអំឡុងតែ ២សប្តាហ៍ មុនដកខ្លួនចេញពីអាហ្វហ្កានីស្ថាន អាមេរិក បានជម្លៀស ជនជាតិរបស់ខ្លួន ជនបរទេស ជាង ១សែន ២ម៉ឺននាក់ ដែលនៅក្នុងនោះ មួយភាគបី ជាប្រជាជនអាហ្វហ្កានីស្ថាន ដែលខ្លាចការសងសឹក របស់ទាហានតាលីបង់។
នៅថ្ងៃ ព្រហស្បតិ៍ និងថ្ងៃសុក្រ ជនជាតិអាមេរិកាំង បារាំង កាណាដា និងជនជាតិអឺរ៉ុប ជាង ១០០នាក់ ដែលនៅជាប់គាំង មិនអាចចាកចេញ ទាន់ពីទីក្រុងកាប៊ុល កាលពីថ្ងៃទី ៣១សីហា បានធ្វើដំណើរចាកចេញពីកាប៊ុល តាមជើងហោះហើររបស់ក្រុមហ៊ុនកាតា។
នៅថ្ងៃសៅរ៍ អេមីរ៉ាត អារ៉ាប់រួម ដែលទទួលបន្ទុក ធ្វើឲ្យព្រលានយន្តហោះកាប៊ុល មានដំណើរការធម្មតាឡើងវិញ បានប្រកាសថា ខ្លួនបានប្រើច្រកហោះហើរអន្តរជាតិ ដើម្បីដឹកជញ្ជូន ជំនួយមនុស្សធម៌ សម្រាប់ប្រជាជនអាហ្វហ្កានីស្ថាន ដែលជួបវិបត្តិខ្វះស្បៀងអាហារ។ តាមប្រធានក្រុមហ៊ុនដឹកជញ្ជូន អេមីរ៉ាត អារ៉ាប់រួម ដែលជាអ្នកចាត់ចែង សកម្មភាព នៅព្រលានយន្តហោះកាប៊ុល ចាប់តាំងពីថ្ងៃទី ៣កញ្ញា ក្រុមហ៊ុនបានទទួលយន្តហោះ ដឹកជញ្ជូនជំនួយមនុស្សធម៌ ចំនួន ១១គ្រឿង។ នៅថ្ងៃសៅរ៍ យន្តហោះពីរគ្រឿង មកពីអេមីរ៉ាត អារ៉ាប់រួម បានដឹកនាំជំនួយ ដូចជា សាច់ ម្សៅទឹកដោះគោ ប្រេងឆា និងសម្ភារៈ ថ្នាំពេទ្យផ្សេងទៀត សម្រាប់ប្រជាជនអាហ្វហ្កានីស្ថាន។
អេមីរ៉ាត អារ៉ាប់រួម ជាប្រទេស ដ៏កម្រមួយ ដែលធ្លាប់បានទទួលស្គាល់ អំណាចគ្រប់គ្រងរបស់តាលីបង់ នៅអាហ្វហ្កានីស្ថាន ពីឆ្នាំ ១៩៩៦ ដល់ឆ្នាំ ២០០១។ ប៉ុន្តែ ជាសម្ព័នមិត្តរបស់អាមេរិក អេមីរ៉ាត អារ៉ាប់រួម បច្ចុប្បន្ននេះ ក៏កំពុងផ្តល់ជំរកនយោបាយ ដល់អតីតប្រធានាធិបតីអាហ្វហ្កានីស្ថាន ដែលបានរត់ចាកចេញពីប្រទេស នៅថ្ងៃដែល ទាហានតាលីបង់ចូលកាន់កាប់ ក្រុងកាប៊ុល កាលពីថ្ងៃទី ១៥សីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ