កូវីដ១៩ ៖ ឡាវបិទខ្ទប់រដ្ឋធានី ដោយហេតុកូវីដ១៩ឡើងខ្លាំង
ដើម្បីសាកល្បងទប់ស្កាត់ការរីករាតត្បាតនៃជំងឺកូវីដ១៩ បណ្តាប្រជាពលរដ្ឋរស់នៅក្នុងរដ្ឋធានីវៀងចន្ទទាំងអស់ ត្រូវជាប់បម្រាមបិទខ្ទប់ឱ្យនៅតែក្នុងផ្ទះ រហូតដល់ថ្ងៃ៣០កញ្ញា។ នេះបើតាមសេចក្តីជូនដំណឹងរបស់សារព័ត៌មានផ្លូវការឡាវ ចេញផ្សាយនៅថ្ងៃចន្ទទី ២០កញ្ញា។
ចុះផ្សាយនៅថ្ងៃ៖
ប្រជាពលរដ្ឋក្រុងវៀងចន្ទ អាចមានសិទ្ធិចេញក្រៅបាន ដើម្បីទៅស្វែងរកទិញម្ហូបអាហារ ថ្នាំសង្កូវ ឬដើម្បីទៅមន្ទីរពេទ្យតែប៉ុណ្ណោះ។ នេះបើតាមការគូសបញ្ជាក់របស់ភ្នាក់ងារសារព័ត៌មានផ្លូវការឡាវ។
ទីកន្លែងកំសាន្តផ្សេងៗ កន្លែងម៉ាស្សា មជ្ឈមណ្ឌលពាណិជ្ជកម្ម ហាងទំនើប ផ្សាររាត្រី រោងចក្រ ត្រូវបិទទ្វារទាំងអស់។ ពិធីបុណ្យសាសនា និងការធ្វើបំលាស់ទី ពីខេត្តមួយទៅខេត្តមួយ ដែលរងការរាតត្បាតកូវីដខ្លាំង ត្រូវហាមឃាត់ទាំងស្រុង។ រាល់គ្រប់ករណីល្មើសនឹងបម្រាម នឹងត្រូវពិន័យជាប្រាក់ចំនួន ៣១០ដុល្លារ ពោលគឺការពិន័យដ៏ខ្លាំងបំផុត ព្រោះពលរដ្ឋឡាវម្នាក់ៗ មានប្រាក់ចំណូលជាមធ្យមប្រចាំឆ្នាំត្រឹមតែ២៦០០ដុល្លារប៉ុណ្ណោះ ក្នុងមួយឆ្នាំ។
ស្ថិតក្រោមការដឹកនាំផ្តាច់ការពីសំណាក់បក្សកុម្មុយនិស្តតាំងពីឆ្នាំ១៩៧៥មក ឡាវជាប្រទេសដ៏ក្រីក្រជាងគេបំផុតមួយនៅអាស៊ី និងកម្រមានព័ត៌មានក្នុងស្រុកលេចធ្លាយមកក្រៅណាស់។ ប៉ុន្តែនេះគឺជាលើកទីមួយគិតចាប់តាំងកូវីដ១៩បានផ្ទុះឡើងនៅលើពិភពលោកមក ដែលរដ្ឋាភិបាលឡាវបានសម្រេចចាត់វិធានការតឹងតែង ដល់ថ្នាក់បិទខ្ទប់ក្រុងនិងរដ្ឋធានីយ៉ាងដូច្នេះ។
តាំងពីខែមេសា២០២១មក អាជ្ញាធរបានរាប់ឃើញមានករណីវិជ្ជមានកូវីដ១០ចំនួន ២ម៉ឺនករណីនិងស្លាប់១៦នាក់។ តែជាចំនួនដែលទាបជាងតួលេខពិតឆ្ងាយណាស់ ព្រោះឡាវពុំមានសមត្ថភាពធ្វើតេស្តច្រើនទេ។ កាលពីថ្ងៃសៅរ៍ទី ១៨កញ្ញា អាជ្ញាធរបានរកឃើញករណីវិជ្ជមានកូវីដ១៩បានផ្ទុះឡើងជាច្រើនកន្លែងនៅតាមរោងចក្រ។ ជាសរុបក្នុងពេលតែមួយថ្ងៃ ឡាវមានករណីឆ្លងថ្មីដល់ទៅ ៤៦៧នាក់ ដែលជាចំនួនដ៏ច្រើនបំផុតក្នុងកំណត់ត្រាឡាវ។
ស្តីពីវ៉ាក់សាំងវិញ ឡាវបានទទួលថ្នាំបង្ការពីសហរដ្ឋអាមេរិក ចិន និងជប៉ុន។ ក្នុងចំណោមប្រជាពលរដ្ឋសរុបជាង៧លាននាក់ ៤,៥លាននាក់បានទទួលថ្នាំបង្ការរួចហើយ។ នេះបើតាមតួលេខផ្តល់ដោយអាជ្ញាធរឡាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ