ទាហានឥណ្ឌាស្លាប់៥នាក់ ក្រោយការផ្ទុះអាវុធជាមួយក្រុមឧទ្ទាមតំបន់កាស្មៀរ
យ៉ាងហោចណាស់ មានទាហានឥណ្ឌា ស្លាប់ចំនួន៥នាក់ ក្រោយការផ្ទុះអាវុធនៅតំបន់កាស្មៀរ រវាងទាហានឥណ្ឌា និងក្រុមឧទ្ទាមបំបែកទឹកដី។ គួរបញ្ជាក់ថា តំបន់កាស្មៀរ ដែលជាតំបន់ជម្លោះព្រំដែន រវាងឥណ្ឌា និង ប៉ាគីស្ថាន បានផ្ទុះកក្រើកការវាយប្រយុទ្ធគ្នា និងអំពើហិង្សា សាជាថ្មី កាលពីសប្តាហ៍មុន បន្ទាប់ពីមានករណីធ្វើឃាត សម្លាប់ប្រជាជនស៊ីវីល និងអ្នកនយោបាយឥណ្ឌានិយមចំនួន៧នាក់។ អាជ្ញាធរឥណ្ឌាបានចាត់ទុកថា គឺជាស្នាដៃរបស់ក្រុមឧទ្ទាម ដែលមានប៉ាគីស្ថាននៅពីក្រោយ។
ចុះផ្សាយនៅថ្ងៃ៖
ស្តាប់ - ០១:៥២
យោងតាមអ្នកនាំពាក្យកងទ័ពឥណ្ឌា ប្រចាំតំបន់កាស្មៀរ ទាហានឥណ្ឌា៥នាក់ បានរងរបួសស្លាប់ ក្រោយការបាញ់តបត ជាមួយក្រុមឧទ្ទាម នៅថ្ងៃចន្ទទី១១តុលា នៅតំបន់ភ្នំមិនឆ្ងាយប៉ុន្មានពីព្រំដែនជាមួយប៉ាគីស្ថាន។ នេះ គឺជាករណីហិង្សា ផ្ទុះអាវុធ ធ្ងន់ធ្ងរបំផុត បន្ទាប់ពី ឥណ្ឌានិងប៉ាគីស្ថាន បានចុះកិច្ចបទឈប់បាញ់នឹងគ្នា កាលពីខែកុម្ភកន្លងទៅ។
ហើយព្រមពេលជាមួយគ្នានេះ សមត្ថកិច្ចឥណ្ឌា បានអះអាងថាគេបានបាញ់សម្លាប់ សមាជិកក្រុមឧទ្ទាម ចំនួន២នាក់ ដែលគេជឿថា គឺជាក្រុមជនដៃដល់ សម្លាប់មនុស្សជាច្រើននាក់ កាលពីសប្តាហ៍មុន។
គួររំលឹកថា ស្ថានភាពនៅតំបន់កាស្មៀរ ប៉ុន្មានថ្ងៃចុងក្រោយនេះ មានភាពតានតឹងជាខ្លាំង បន្ទាប់ពីមានករណីឃាតកម្ម សម្លាប់មនុស្សជាច្រើននាក់ ដែលភាគច្រើនគឺជាក្រុមមនុស្ស ដែលមានទំនោរនយោបាយ ងាកទៅរកឥណ្ឌា។ ក្រុមឧទ្ទាម ឈ្មោះ « សមរភូមិតស៊ូ » ដែលទាមទារបំបែកទឹកដីតំបន់កាស្មៀរ ហើយដែលឥណ្ឌាចោទថាមានប៉ាគីស្ថាននៅពីក្រោយនោះ បានចេញមុខទទួលស្គាល់ថា គឺក្រុមខ្លួន ដែលបានសម្លាប់មនុស្ស ចំនួន៧នាក់ កាលពីសប្តាហ៍មុន ព្រោះថាមនុស្សទាំងនោះ សុទ្ធតែជាអាយ៉ងរបស់ឥណ្ឌា។
ក្រោយករណីឃាតកម្មទាំងនេះ សមត្ថកិច្ចឥណ្ឌា បានបង្កើនការរិតបន្តិងសន្តិសុខ និងបានតាមប្រមាញ់ បំបែកបណ្តាញក្រុមឧទ្ទាម។ យោងតាមអាជ្ញាធរឥណ្ឌា គិតចាប់ពីដើមឆ្នាំមក មានប្រជាជនស៊ីវីល ប្រមាណ២៩នាក់ ត្រូវបានក្រុមឧទ្ទាមសម្លាប់ ដោយក្នុងនោះមាន ២២នាក់ ជាអ្នកកាន់សាសនាអ៊ីស្លាម។
យ៉ាងណាក៏ដោយ សមត្ថកិច្ចឥណ្ឌា ក៏ត្រូវបានគេចោទផងដែរ ថាបានបើកប្រតិបត្តិការ តាមប្រមាញ់ ធ្វើទារុណកម្ម និងសម្លាប់ក្រុមឧទ្ទាម ក្រៅប្រព័ន្ធច្បាប់។ កាលពីថ្ងៃសៅរ៍ អង្គការ Human Rights Watch បានអំពាវនាវ ឲ្យភាគីទាំងសងខាង ទទួលខុសត្រូវ ចំពោះទង្វើរបស់ខ្លួន ហើយឈប់ប្រើអំពើហិង្សា ធ្វើបាបប្រជាជនតំបន់កាស្មៀរតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ