ភេរវកម្មអត្តឃាតនៅក្នុងតំបន់ដែនអំណាចរបស់តាលីបង់ សម្លាប់មនុស្ស៣៣នាក់
អាហ្វហ្កានីស្ថាន ក្រោមការដឹកនាំរបស់រដ្ឋាភិបាលតាលីបង់ បានរងគ្រោះសាជាថ្មី ដោយសារអំពើភេរវកម្មអត្តឃាត។ នៅថ្ងៃសុក្រ ទី ១៥តុលា អត្តឃាតជនបានចូលទៅបំផ្ទុះគ្រាប់បែក នៅក្នុងវិហារអ៊ីស្លាមក្នុងទីក្រុងកង់ដាហារភាគខាងត្បូង អាហ្វហ្កានីស្ថាន ក្នុងវេលាដែលអ្នកកាន់សាសនាអ៊ីស្លាមនិកាយឈីអ៊ីតកំពុងធ្វើពិធីសូត្រធម៌។ នេះបើតាមមន្រ្តីមូលដ្ឋានតាលីបង់ ដែលស្រង់សំដីដោយទីភ្នាក់ងារព័ត៌មានបារាំងAFP។ សាខារបស់ក្រុមជីហាតរដ្ឋអ៊ីស្លាម នៅអាហ្វហ្កានីស្ថានធ្លាប់ចេញមុខទទួលខុសត្រូវ លើការវាយប្រហារភេរវកម្មអត្តឃាត ទៅលើវិហារអ៊ីស្លាម នៅខេត្តKunduz ដែលបានសម្លាប់មនុស្ស៥០នាក់ កាលពីថ្ងៃសុក្រសប្តាហ៍មុន។
ចុះផ្សាយនៅថ្ងៃ៖
ស្តាប់ - ០២:៣៤
កាលពីថ្ងៃសុក្រសប្តាហ៍មុន ការវាយប្រហារភេរវកម្មរបស់ក្រុមជីហាតរដ្ឋអ៊ីស្លាម នៅភាគខាងជើងអាហ្វហ្កានីស្ថាន បានសម្លាប់មនុស្ស ៥០នាក់ ចំណែក ភេរវកម្មអត្តឃាត នៅថ្ងៃសុក្រម្សិលមិញ បានផ្តាច់ជីវិតអ្នកកាន់សាសនាអ៊ីស្លាមនិកាយ ឈីអ៊ីត ៣៣នាក់ នៅទីក្រុងកង់ដាហារ ភាគខាងត្បូងប្រទេស។
នៅអាហ្វហ្កានីស្ថាន ក្នុងរយៈពេល តែមួយសប្តាហ៍ អ្នកកាន់សាសនាអ៊ីស្លាមនិកាយឈីអ៊ីតបានរងគ្រោះ ដោយសារការវាយប្រហារភេរវកម្មដល់ទៅ២លើក។ ក្នុងករណីក្រុមជីហាតរដ្ឋអ៊ីស្លាមប្រកាសទទួលស្គាល់ ថា ការវាយប្រហារភេរវកម្មអត្តឃាតនៅទីក្រុងកង់ដាហារ ជាស្នាដៃរបស់ខ្លួន នោះជាលើកទី១ ដែលក្រុមនេះ ហ៊ានចេញធ្វើសកម្មភាពបង្កអសន្តិសុខ ក្នុងតំបន់ដែនអំណាចរបស់តាលីបង់។
នៅពេលជាក្រុមឧទ្ទាមប្រឆាំងរដ្ឋាភិបាលអាហ្វហ្កានីស្ថាន ក្រុមតាលីបង់ ដែលមកពីនិកាយស៊ុននីត ដូចក្រុមជីហាតរដ្ឋអ៊ីស្លាម ធ្លាប់បើកការវាយប្រហារភេរវកម្ម សម្លាប់ប្រជាជនអ៊ីស្លាមនិកាយឈីអ៊ីត ដែលតំណាងឲ្យ២០%នៃប្រជាជនអាហ្វហ្កានិស្ថានសរុប ៤០លាននាក់។ ប៉ុន្តែ ចាប់តាំងពីត្រលប់ចូលកាន់អំណាចនៅអាហ្វហ្កានីស្ថាន ក្រុមតាលីបង់បានចាត់ទុកសន្តិសុខជានយោបាយអាទិភាព និងសន្យាធានាសុខសុវត្ថិភាពឲ្យប្រជាជនអាហ្វហ្កានីស្ថានមកពីគ្រប់និកាយសាសនា។
ដោយបើកការវាយប្រហារភេរវកម្មអត្តឃាត ក្រុមជីហាតរដ្ឋអ៊ីស្លាម ខូរ៉ាសាន់ ដែលជាសាខារបស់ក្រុមជីហាតរដ្ឋអ៊ីស្លាមនៅអាហ្វហ្កានីស្ថាន កំពុងប្រជែង ផ្គើនអំណាចរបស់ក្រុមតាលីបង់ ដែលតាំងខ្លួន ជាអ្នកដឹកនាំផ្តាច់មុខ ប្រទេសអាហ្វហ្កានីស្ថាន។ នៅប៉ុន្មានសប្តាហ៍ចុងក្រោយនេះ ក្រុមនេះបានសំដៅវាយប្រហារ ទាំងទាហានតាលីបង់ និងក្រុមនិកាយឈីអ៊ីតនៅអាហ្វហ្កានីស្ថាន។
វត្តមានដ៏សកម្មរបស់ក្រុមភេរវនិយម ដូចជាក្រុមជីហាតរដ្ឋអ៊ីស្លាម ក្រុមអាល់កៃដា នៅអាហ្វហ្កានីស្ថាន ជាក្តីបារម្ភផងដែររបស់ប្រធានាធិបតីរុស្ស៊ី លោកវ្លាឌីមៀរ ពូទីន។ នៅក្នុងជំនួបកំពូលរបស់ក្រុមប្រទេស អតីតសហភាពសូវៀត កាលពីថ្ងៃសុក្រ ប្រមុខរដ្ឋរុស្ស៊ី បានអះអាងថា នៅភាគខាងជើង អាហ្វហ្កានីស្ថាន ក្រុមជីហាតរដ្ឋអ៊ីស្លាម បានប្រមូលកកផ្តុះនៅអាហ្វហ្វានីស្ថាន ដោយសមាជិកប្រមាណ ២០០០នាក់។ តាមប្រធានាធិបតីពូទីន ក្រុមអង្គការរដ្ឋអ៊ីស្លាម ដែលធ្លាប់ពង្រីកឈ្លានពានទឹកដីនៅស៊ីរី និងអ៊ីរ៉ាក់ កាលពីឆ្នាំ ២០១៤ កំពុងមានគម្រោងការរើសសមាជិក ពង្រីកឥទ្ធិពលរបស់ខ្លួន ទៅក្នុងប្រទេសនៅតំបន់អាស៊ីកណ្តាល និងនៅក្នុងតំបន់មួយចំនួនរបស់រុស្ស៊ី តាមរយៈ ការញុះញង់ឲ្យមានជម្លោះ រវាងជនជាតិភាគតិច និងរវាងអ្នកកាន់សាសនា។
នៅប៉ុន្មានថ្ងៃមុនធ្វើជាម្ចាស់ផ្ទះ រៀបចំជំនួបកំពូលស្តីពីអាហ្វហ្កានីស្ថាន ប្រធានាធិបតីរុស្ស៊ីបានអំពាវនាវឲ្យរដ្ឋាភិបាលតាលីបង់ ផ្សះផ្សារជាមួយកម្លាំងផ្សេងទៀតក្នុងប្រទេស ដើម្បីប្រយុទ្ធប្រឆាំងនឹងក្រុមភេរវនិយម ដូចជាក្រុមជីហាតរដ្ឋអ៊ីស្លាមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ